SERMON - PATHIAN RORELNA FAIR LO!

PATHIAN RORELNA

FAIR LO!

(Sam 103 : 10, Ephesi 2 : 4 - 10)

            Pathian hmangaihna emaw khawngaihna emaw tiin kan thupui hi vuah zawk awm tak a nih rualin, kan thlir ngai loh zawnga han dah hian a fiahin kan tun hun nen pawh hian inmial riau zawkna te a awm a. Chuvangin, Pathianin min hmangaih avanga Ama thu tiam ngei pawh bawhchhia a kan chunga fair lo taka ro a rel dan zirho kan tum dawn a ni.

  1.     KHAWVEL HI A FAIR LO!:

            Mihringte hian a dinhmun chhe zawk leh chan chhe zawk chang nia kan inhriat chauhvin a fair lo kan ti \hin. Infiamna khawvelah pawh fair lo taka chak zawk ten ‘fair lo takin kan chak’ kan ti ngai lo, a chaklo zawkin a fair loh thu kan sawi a, a chak zawk erawh chuan ‘kan vannei’ kan ti hlauh \hin. Tin, officer, mi chanai ngawih ngawih eiru te pawhin fair lo kan inti lem lo, Pathian malsawmna, kan la ti \alh \alh a nih hi maw! Khawvelah hian lungawina reng reng kan hmu lo a, engkim hi a fair tak tak lo a ni ber mai. "Survival of the fittest" kan ti tak nain, a fit chiah lo te pawh kan la inham tang thei zel tho si!  

                                               

            Mimal leh chhungkaw dinhmunah pawh hian a fair lo kan ti thei hle. Midang te dinhmun phak lo bik nia inhriatna kan nei hma em em a. Miten hlawhtlinna an hmuhin lawmpui har kan tih chang a awm fo. Eizawnna kawng kan zawh a, hlawhtlin mai theih loh chang kan nei a, chutiang hunah chuan "Enga ti nge keini bik hi le?" Tiin, Pathian rorel danah fair lo kan ti fo. Nula tlangval ten kan ngaihzawng neihna kawngah pawh tluang lo leh vanduai bik ta riauva inhriatna kan nei hma em em a. "Enga ti nge ka chungah hetiang hi a thlen bik le," kan tih thin hi.  Chuvangin, khawvel hi kan thlir thui poh leh a fair lo kan ti tawlh tawlh a ni ber mai, a dik viau ta ve ang.

2.       PATHIANIN FAIR LO TAKA RO A REL VANGIN TUN DINHMUN HI KAN THLENG THEI:-

            Pathian hian fair takin rorel dawn se, mihring te hian tuna kan dinhmun hi kan thleng thei kher lovang. Phuba lak hmang Pathian a ni a, kan tihsual ang hian kan chungah phuba la dawn se tihboral kan ni tawh hial ang. Exodus 34:7-ah chuan "Thiam lova ruatte chhuah ngai lo, pate khawlohna avanga fate, fate fa lehte, chhuan thumna leh chhuan lina thleng pawha hrem thin chu" tih kan hmu. Tin Leviticus 26:21 ah pawh, "Mi kalh zawnga in awma, ka thu inpawm loh chuan in sualnate a zirin, a leh sarihin inchungah hremna ka thlentir ang" tih kan hmu bawk. Chuvangin, Pathian hian fair takin kan chungah rorel dawn se, kan thiltih sual ang hian min hrem dawn ta se, damin tun hun hi kan thleng zo tawh hauh lovang. Mahse, min hmangaih leh khawngaih avangin fair lo taka kan chungah ro a rel avangin min la zuah chauh mai zawk a ni.

            Amah aia midang/thil dang kan thlan lai hian min hlamchhiahin keini lo hi thlang ta se engtin nge kan awm ang? Pathian venna leh a thu lo chuan second khat pawh engmah kan ti thei lo a ni a. Kan sual leh tlin lohna ang anga min thungrul lo hi kan va vannei em. Phuba lak hmang Pathian khan min hmangaih avang leh a khawngaihna nasa tak avangin, Ama thutiam ngei pawh hlen lovin fair lo takin kan chungah ro a rel a ni si a!

3.       PATHIAN RORELNA FAIR LO VANG CHAUHVA VANRAM KAI THEI KAN NI:-

            Thianghlimna Pathian hnena awm tur chuan mihring te thianghlimna hian a tlin lo. Isaia 64:6-ah chuan "Mi bawlhhlawh angin kan lo awm ta vek si a, kan felna zawng zawngte pawh silhfen bawlhhlawh ang a ni" tih kan hmu. Chuvangin, Pathian hian fair takin kan chungah rorel dawn se, mihringte thianghlimna hian Vanrama awm theihna turin a tlin lo hrim hrim a ni. Vanram chu "Mithianghlimte khawpui" a ni si a.

            Tin, Vanram kai thei tura Qualification hrang hrang te hi mihringte hian engtikawng mahin kan zawm famkim thei lo. Kan bawhchhiatna avanga rorelna chu Eden huanah khan zawh fel a ni tawh. Mahse, min hmangaih leh min khawngaih em avangin Pathianin ama thutiam ngei pawh bawhchhia in, Mosia hmangin Vanram kan kai theihna tur Dan min pe a. Mahse, chu dan pawh chu kan zawm famkim thei lo. Mahse, chatuana kan boral tur chu phal lovin a fapa mal neih chhun kan tan min pe ta ringawt mai a ni. Anihna takah chuan heng zawng zawng hi rorelnaah chuan a fair lo takzet a ni. Mahse, min hmangaih avanga Pathianin fair lo taka kan chunga ro a rel ta mai hi a makin mihring te hian Pathian hmangaihna hi kan hre thiam phak ngai lovang.Fair lo taka kan chunga ro a rel avang chauhvin Vanram kan kai ve thei a nih chu.

4.       PATHIAN RORELNA FAIR LOH AVANG CHAUHVA A RAWNG BAWL VE THEI KAN NI:-

            Van hmuna a rawngbawlsaktu leh Amah faka chawimawitute chu mithianghlim, sualna reng reng nei lo an ni. Thuthlunghlui lam kan thlir pawhin Pathian rawngbawltute chu 'Chi bik' thlan, Puithiam te chauh an nih kha. Chung a rawngbawltu, Puithiamte pawh chu an thinlung mai ni lovin a pian hmang pawh a duhtui hle. Leviticus 21:18 - 20-ah pawh kan hmu a ni. Chuvangin, kan thinlung chhungril chu sawi loh, kan pianphungah hrim hrim pawh hian Fair takin Pathian hian a rawngbawltu hi thlang dawn se, keiniho hi thlan tur kan awm kher lovang.

            Kan thiam leh finna avanga rawngbawl tur ni ila, khawvel mihring zingah tumah tling zo kan awm lo. A khawngaihna avang chauh a ni tih kan hriat a duhawm hle. Tin, kan felna leh thatna avang hian rawngbawltu tling zo tumah kan awm bawk lo a ni. I Petera 4:18-ah chuan "Mifel mah chhandam hram hram a nih chuan, Pathian ngaihsak lo leh mi sual chu engtin tak ni ang maw?" tih kan hmu. Bible hian Mifel a tih te zingah hian kan tel hauh lovang. Chuvangin, kan felna leh thatna avang hian a rawngbawl chu sawi loh chhandam kan ni zo lo a nih chu. Eng dang vang ni lovin, A khawngaihna avang chauhvin a rawng kan bawl ve thei a ni. Fair takin ro rel dawn se, a rawngbawltu zingah hian kan tel hauh lovang le.

            Pathian rorelna fair lo kan sawi zawng zawng hi Mihringte min hmangaih em avanga ‘fair lo’ chauh a ni. Vanram kai ve tlaka kan lo thianghlim ve theihnan Dan zawm tur min pe a, chu pawh a khawngaihna a ni. Mahse, mihringte hian kan zawm famkim thei lo. Ama fapa ngei kan sual te tlanna atan a rawn tir leh ta ngawt mai a, a khawngaihna lehchhawnna ava ni tehlul em! Pathianin fair lo taka ro a rel avangin  khawngaihnaa chhandam kan ni kan ti thei awm e. Hetiang khawpa min hmangaiha, min khawngaihtu hi kan nun zawng zawnga a hmangaihna chhan let hi kan va ba tehlul em.

            A hrechiangtute chuan "Van khi lehkha phek ni se, Thingzar zawng zawng hi pen ni se, Tuifinriata tui zawng zawng hi pen tui ni se, chung zawng zawng chuan Pathian hmangaihna hi ziak chhuak dawn ila, tuifianriat pawh hi a kang zo ngei ang, Vanah pawh khian a leng dawn lo, a hlai tawk lo," an lo ti hial a ni. Heti em a min hmangaih hi a mak a ni. Kan tan, kan Pathian hi a fair loh a ngai si a.

            Lalpan a thu malsawm rawh se...