ARTICLE - INKHAWMPUI

INKHAWMPUI

            Presbyterian Kohhran chu kumtin inkhawmpui hmanga rorel thin kan ni a, inkhawmpui mai bakah ‘Meet leh intawhkhawmna dang’ kan nei fo bawk thin. Heng Inkhawmpuiah te hian Kohhran inrelbawlna leh rawngbawlna hrang hrang atana kan hmalakna tur te ngaihtuahin a rel thin a ni.

            Khawvel hmasawnna thang duang tak karah Kohhran pawh hma sawnin a thang ve zel a. Chutihrual  chuan, kan Kristianna leh Kohhrana rawng kan bawlna kawng hrang hrangah erawh kan tlahniam telh telh niin a lang. Chung zingah chuan kan Inkhawmpui hrang hrang neih te ngaihpawimawh kawngah ngei pawh hmasawn kan mamawh hle a tih theih.

            Kan hriat angin naktip maiah Bial KTP Conference pawh kan Kohhranah kan thleng dawn a ni a. KTP member mai bakah Kohhran mipuite pawhin kan hlut a, kan ngaihpawimawh thiam a duhawm hle. Tisa leh thlarau lama hlawkna leh hmasawnna duhawm tak kan neih theihna atan inbuatsaih ila, Inkhawmpui hlawhtling tak kan neih theih ngeina tur atan tawngtaiin Pathian hnenah i thlen fo ang u.

           

            Kan rawngbawltuten an sawi fo thin a, inkhawmpui kan thlen tum hian Kohhran mipui tam tak ten hahchawlhna atan hmangin kan inkhawm lo fo mai! Hei hi kal san a duhawm hle a ni. Inkhawmpui kan thlen thin hi KTP emaw Kohhran Hmeichhia emaw Pavalai Pawlin emaw a thleng a ni lova, Kohhranin kan thleng a ni tih hriain Vantlang Pathian Biak Inkhawmah te intineitu takin inkhawm theuh ila, Inkhawmpui hlawhtling tak kan neih ngei a rinawm.