ARTICLE - Pathian tana hun pek

Pathian tana hun pek

            Khawvel changkang zelah mihring kan buai ta hle mai a, zirna leh eizawna kawng hrang hrang zawhin kan hmanhlel ta viau mai. Chutiang a nih avang chuan hun awl kan nei ta meuh lo. Kan hun awl chauh Pathian tana hun pek kan tum a nih phei chuan min siamtu Pathian hian keimahniah hmun a chang tam lo telh telh dawn ni te pawhin a hriat a ni.

            Chawlhkar khat chhunga kan Pathian biak Inkhawm hun neih thin te pawh a tam lutuk nia sawi thawm a ri ta fo mai, thlirtu thenkhat ngaihdan erawh kan dem lutuk love. Amaherawhchu, zantin inkhawm pawh ni ila, nikhata kan hun neih te ngaihtuah chuan Pathian tana kan inserhhran hun tawite hi a tam lo khawp mai. Darkar 24 chhunga darkar hnih khat lek Pathian tana han pek chu engatinge harsa kan tih viau le? Biak Inah chauh lo pawh Pathian biakna leh pawlna hun a neih theih a lawm kan ti a ni mai thei e. Mahse, tunge mahni hnathawhna hmun emaw mahni chauha fianriala Pathian tana nitin darkar khat tal pawh inserh hrang thin kan awm em le? Mizo te hian Kohhran Pathian biak inkhawm tluka Pathian kan biakna leh atana inserh hranna hun tha kan la nei lo.

            Tunlai chu ka tulin ka buai lutuka tiin Pathian pawl hman lo leh a rawngbawl hman lo niin kan lo inhre palh ang tih a hlauhawm thin. Nunna min pek mai bakah hna thawk thei turin hriselna min la pe lehzel a. Tin, Eizawnna hna min pe a, chumi thawhna atan chuan hun tha tak min pe bawk a, kan mamawh tinreng kan hriat phak bak thlengin malsawmna min pe a ni si a. Heng zawng zawng hi mihringten kan  chakna leh theihna avanga tih theih kan nei hauh lo. Amah avang chauha hetiang dinhmun a ding kan nih avang hian nikhat atana kan hun tlemte Pathian tana pek hi i ui lovang u.