ARTICLE - KUTDWH KAN NI LO

KUTDWH KAN NI LO

            Ringtuten chakna kan lakna leh kan intuaitharna chu Kohhran Pathian biak inkhawm hi a ni awm e. Kohhran pawhin a ngai pawimawh hle a, Kristian nun kaihhruainaah pawh ringtu zawng zawng tih tur a sawi te zingah Amah be tura Biak Ina kal thin tur a nih thu kan hmu bawk a ni. Chuvangin, ringtuten Inkhawm hi kan ngaipawimawh ngei ngei tur a ni.

            Kan inkhawm hian eng rilru puin nge ka inkhawm thin tih hi kan inzawt ngai em aw? Inkhawm hi kan ningin kan peih lo fo em le? Thusawitu a zirin inkhawm kan peihin kan peih lo thin em? Chutiang mi kan nih chuan eng nge kan inkhawm chhan ni ang le? Tin, then khat chuan, “Kan inkhawm dan pawh hi tih dan leh programme ngai reng, ninawm lamah a kal lek lek” ti a sawi kan hre zeuh thin! Ni e, hlim leh nuam taka inkhawm chu a tha teh meuh mai. Amaherawhchu, a hlimawm zawng leh a nuam tur ang zawng ringawta kan inkhawm hi kalpui a tha ber lo maithei. Kan inkhawm chhanah chiang ila tun aiin takna leh tihtakzetna lamah la thang deuh deuh zawk ila a duhawm hle.

            Inkhawm hi a inchhirawm loh mai bakah a hlawkthlak kan ti thin, a dik viauin a rinawm. Chutihrualin, mahni lama hlawk tum lutuk erawh a dik ber lo maithei? Kohhranho te hi Kutdawh kan ni lova, Pathian kan biakna leh Amah chibai kan buknaah lehzel chuan kutdawh rilru i pu lovang u.Biak Inah hian Pathian bia a Amah chibai buk turin ka kal a ni tih inhria ila, chumi rilru pu chung chuan i inkhawm thin ang u. Dawn tumna rilru ringawt pu-a inkhawm thin te hi an vuivai chawk thin. Thusawitu leh chanvo neitu dang thiam leh thiam loh lam ni lovin, tihtakzeta Amah chibai kan bukna zawk khan kan nunah hlawkna min pe zawk dawn a ni. Chuvangin, kutdawh rilru pu lovin, ‘Pathian chibai buk turin Biak Inah ka kal dawn a ni’ i ti thin ang u.