CHHUK EN
Mihring kan
nihphungah hian kan aia chungnung leh thil tithei zawk ngei nia kan hriat te
pawh hian an nihna hre rana min chhuk en tlat chuan tumah kan lawm lo maithei
e. Amaherawhchu, a duh lo tute ngei pawh chuan kan aia hniam zawk nia kan hriat
te lakah ngei pawh insiamrem harsa kan
ti viau tho si. Chutiang rilru pu mihring kan ni miau avangin Kohhran, pawl leh
khawtlang nunah ngei pawh midangte thawhpui thiam leh thawhpui nuam ni tur
chuan nitina kan inzir fo a ngai reng a ni.
Kan khawtlang nunah ngei pawh hian
kan chhungkaw dinhmunin a zir avang te, Sawrkara kan hna chelhin a zir avang
tea sang leh ropui ta riaua inhriatna a awm thei ni awm tak a ni. Officer
thenkhat, an awmna khawtlang Roreltute leh YMA thu hial pawh zahpah lem lo,
mahni khawtlanga Officer emaw la inti tlat sawi tur pawh kan awm ta nawk niin a
lang! Mizo kan nihna ang leh Kristian kan nihna avang pawh hian kan insiamrem
thiam a midangte tana malsawmna ni tura kan inzir reng a duhawm hle a ni.
Kohhran rorelna huang chhungah hlei hlei hian a pawimawh
lehzual. Rawng kan bawlnaah chak zawka hma kan lak theihnan leh rorelna felfai zawk kan neih
theihnan Kohhran rorelna chhawng heng; Tualchhung, Bial, Presbytery, Synod leh
Assembly thlengin kan nei reng a ni. Tualchhung Kohhran hnuaiah pawh
Sub-Committee hrang hrang a awm leh a, chutiangin KTP leh Kohhran hmeichhe
hnuaiah pawh a awm bawk a. Hengah hian en dan dik a kan inen zel a duhawm hle.
A him chianah chuan rorelna inzahsak kawngah te, hmalakna inhlutsak kawngah te,
a dawm kang zawng leh a intiphur tawn zawnga kan inthlirsak fo a duhawm hle.
Kohhran chhung mah ni se, rorelna sang zawk a awm lo thei lova. Chuvangin,
rorelna sang zawkin a hnuai a mite engahmah ngai lo ang ziazanga a chhuk en
luih tlat chuan thawhhona tha a chhuak in a rinawm loh. Chutihrualin, rorelna
hniam zawka kan ngaih te pawhin rorelna sang zawk thu kan ngaihchan thiam a
ngai hle a ni.
No comments:
Post a Comment