ARTICLE - Mahni lama pet

Mahni lama pet

            Kum 4 dana khelh thin, kar hmasa maia an khelh zawh tak FIFA World Cup kha Khawvel mihring 46.6% zetin an thlir anga ngaih a ni nghe nghe. Chung zingah chuan keini India ram kilkhawr taka awm pawh kan bang chuang bik hauh lo. Zan khaw tairek thleng thlengin kan menpui a, mahni ram ni hlei lo tanin kan lo au ve chiam chiam a nih kha maw. Kan dem awm loh e, a tui mi tan phei chuan atchilh tham hial khawpa game ropui a ni.

            Football kheltutena an tum ber chu an khingpuite goal-a pet luh a ni. Chumi atan chuan tactic hrang hrang hmangin an thiamna leh an theihna zawng zawngin an tang a, a khelh hun chhungin tumah an inthlahdah hman hek lo. Hun tlem tawh karah goal mamawh em em a an khelh lai pawhin a chang chuan mahni lamah an han pet let leh rih bawk a, a lo thlirtu tan chuan hmanhmawh a na thin teh e. Khingpuite goal a pet lut turin mahni lama han pet fo mai chu a hre thiam lo tan chuan tul lo tak pawh a ni ta ve ang.

            Amaherawhchu, engvangin nge goal mamawh tak khan mahni lamah an pet fo? A chhan chu an tan hmun siamthatna tur te, mumal taka lehlam goal a an pet luh theihna tur a kalkawng pawimawh tak a lo ni reng zawk a ni. Chutiang chiah chuan Kohhranho te pawh hi han inngaihtuah ta i la. Kohhranin hma a sawn a, a lo chak zawkna tur atan te, Pathian rawngbawlna chak zawkleh mumal zawka kalpui a nih theihna tur atan te mahni lamah kan pet a ngaih fo chang a awm ang. Kan that tlanna tur a tana kan infuihna leh kan insawiselna te, thahnemngaihna avanga kan hruaitute leh rawngbawltuten min fuih thinna thu te hi kan dawnsawn thiam thin a duhawm hle. Tawngkam hriam deuh an lo hman a nih pawhin lung lo a la mai lovin, kan thatna tur zawk a ni i ti zawk ang u.