ARTICLE - Kohhran Zaipawl

Kohhran Zaipawl

            Kohhrana Thalai tena kan rawngbawlna pawimawh tak leh langsar ber te zinga mi chu Kohhran Zaipawl rawngbawlna hi a ni awm e. Kohhran pawhin a dah pawimawhin a ngaihlu thiam thin em em reng a ni. Mizo kristian, a bikin keini Presbyterian Kohhranah ngat phei chuan Kohhran hunpui leh hun pawimawh dangah pawh Kohhran Zaipawl hi kan beisei ngei ngei a tih theih awm e.

            Ziak ni lemlo a Kohhran dinhmun kan inteh fo thinna chu Kohhran Zaipawl that leh that lohvah a ni fo thin. Kohhran Zaipawl nei tha tak Kohhran chu tumahin kan dah hniam ngai lo hrim hrim a, kan chung en fo zawk a nih kha. Tun hnuah erawh chuan Zaipawl rawngbawlna hian tunhma angin ngaihhlut a hlawh lo tial tial ni te pawhin a lang. A enkawltu leh member-ten kan zir tawk loh vang te pawh a ni a nge. Engpawh ni se, thahnem kan ngaih thar leh erawh a duhawm hle mai.

            KTP member, Kohhran Zaipawla tel nachang hre lo, telloh pawh zahna chang hre chuang lo kan ni fur tawh a, a pawimawhna leh a hlutna kan hriat tawk loh vang te pawh a ni ange. Kan rual u te hunah kha chuan, KTP member mipangai china inchhal chuan thahnemngai takin an tel vek thin ti ila kan sawi uar lutuk lawng chu maw? Kohhran Zaipawlin hla an rem zana hla remlova lo inkhawm ve pawh a zahthlak viau zawk thin a nih kha. Tunah erawh chuan zah chu sawiloh ka tel ve na awm a ni tih pawh hre lemlo kan awm ta fur mai. Kan thiamna leh finna sang zel leh changkang kan intih tawh viau lai hian Kohhran mi kan nihna anga kan tih awm tak te leh Kohhran ze mawi tak kan rawngbawltu hmasa tena an lo tih thin te hi i changkan san lo hram ang u. Kohhran Zaipawl tha tak leh nung tak nei turin tan lain theih tawp i chhuah thar teh ang u.