ARTICLE - Rilru hrisel

Rilru hrisel

            Kan taksain natna a tawh chuan kan hrisel lo kan ti thin. Mahse, kan rilru erawh chuan eng ang pawhin hliam tawkin eng ang pawhin na se ka rilru a hrisel lo kan ti ve hauh lo! Midang te chunga kan rilru put dan atang hian rilru hrisel leh hrisel lo kan teh ta ber niin a lang ta ber awm e.

            Mihringte hi chu kan mak khawp a, rilru hrisel tak nia kan ngaih lai hian thenkhat tan chuan “A rilru a hrisel lo hle mai” tih tur kan awm ve thei ngei ang. Chuvangin, mahni inhriat chian a har em avang hian kan inenfiah fo a ngai reng a ni. Rilru hrisel lo bula awm leh thawhpui an hahthlakzia kan hriat rual hian Rilru hrisel tak bula awm leh thawhpui an nawmzia pawh kan hai hauh lo vang. Ram leh khawtlanga kan nunhona hrim hrimah pawh hian rilru hrisel kan neih a duhawm hle a ni.

            Kohhran chhunga kan rawngbawlnaah leh kan chet velnaah hlei hlei hian rilru hrisel kan neih a pawimawh tak zet a ni. Rawngbawlpuite emaw hruaitute emaw tai reng, an chanchin a nihna bak baka sawi duh mai pawh a awm theih. Hetiang rilru kan pu a nih chuan kan rilru a hrisel hauh lo vang le. Heng te hian Kohhran inpumkhatna a tichhiain thawhona a tichhia tih i hria ang u. Tin, hmaichhana infak luam, hmun danga inrel chhunzawm leh mai hreh lo te rilru pawh a hrisel chuang lo. Kan sawisel duh a nih chuan hmai chhanah emaw direct-a an hriat mai theih tura inhrilh mai hi a puitlingin a rilru hrisel zia hle zawk a ni. Kan lungawi lohna emaw kan hlimna emaw a thlenna tur dik taka kan inhrilh mai hi a tha hle. Hetianga mahni rilru ang tak phawrh chhuak ngam a, min sawisel hreh lotu leh fakna awma min fak hreh lotute hi Rilru hrisel kan tih chu a ni awm e.