Monday, 21 January 2019

ARTICLE - INPEKNA KIMAH LAWM A KIM



INPEKNA KIMAH LAWM A KIM

            Pathian rawng kan bawlnaah hian a pawimawh ber te zing a mi chu inpekna a ni awm e. Mi thiam leh mi ropuite Pathianin a rawngbawl turin a thlang ringawt lova, tling leh fel intite a thlang ringawt hek lo. Tin, a chak leh phur nazawng pawh a hmang ngawt chuang lova, A thu awiha atana inpe a piang a hmang mai thin zawk a ni. Chuvangin, mithiam tak inpe lemlo aiin thiamna nei sang lem lo pawh ni se, Pathian tan an inpek na na na chuan a hmang mai zawk niin a lang.

            Pathian rawng kan bawlna kawnga kan inpek phawt chuan kan Pathian hian min tanpui a inpeih reng a ni. Mihringte hian kan rilru leh kan theihna zawng zawng kan pekna lamah chuan thil nasa tak kan tithei thin ang hian, a rawng kan bawlna kawngah pawh hian kan zawng zawnga kan inpek phawt chuan Pathianin keimahni kaltlangin a ropuina a puang lo thei lo. “Kan rawngbawlna te hian awmzia a nei ta lo em ni?” kan tih fo chhan te hi Pathian tana kan inpek tawk loh vang a ni mai lo maw? Kan duh chin leh kan peih chin chauhva inpe thin kan ni em? Mahni ngaih dan leh duh dan chin chauhva kal thin kan ni em? Eng chenin nge kan lo inpek thin reng reng le?

            Hla siamtu chuan “Inpekna kimah lawm a kim thin” a lo ti a. Mahse, lawmna kim nei tur khawp hian inpek a lo har dawn hle mai. Pathian tana inpe ve viaua kan inhriatna te, midang aia hah leh titam deuh bik ni a kan inhriat chang te hian, lawm ai chuan vuivaih kan awlsam zawk fo thin. Pathian aia mahni kan indah len vang te pawh a ni mahna. Chutiang nun kan neih chhung chuan kan inpekna hi a la kim lo a ni mai lo`ng maw? Kan zawng zawnga Pathian tana kan inpek phawt chuan kan lo titam deuh bik emaw, kan lo hah ta deuh bik emaw pawh ni se, chu chuan keimahniah lawmna min pe zawk tur a ni dawn lawm ni?

No comments:

Post a Comment