ARTICLE - Pathian Fak

Pathian Fak

            “Zingah savaten Pathian an fak a, Pangparin a ropuizia a entir fo; A thil siam zawngin amah an chawimawi, Mihring chauh lo chu zirtir an ngai lo.”  tiin fak hla kan sa thin. Naupang te kan nih lai ata kan hla thiam hmasak ber te zing a mi a ni hial awm e. He hlain a thu ken leh a tarlan tum tak pawh ngaihtuah lem lovin kan lo sa liam ve mai mai thin reng a nih kha.

            Savaten anmahni hram dan ang theuhva an hram a, Pangparten an nihphung pangai a an par avang te hian Pathian an fak leh an chawimawina bik vak kan hre lo maithei e. Chumai nilovin, A thilsiam zawng zawng, mihring tih loh chuan Amah an chawimawi thu ala tarlang cheu mai! A anpuia a siam Mihringte hian faka chawimawi viau zawk awm tak hi zirtir ngai kan ni tlat si a ni.

            Pathian fak leh chawimawi nia kan inhriatna te hi a tling zo lo fova. A ram tana thahnemngai taka thawk ve ni a kan inhriatna te pawh hian awmzia a nei lo fo thin a nih hi. Kohhran hnapui ber pawh Chanchintha hril a nih mek lai hian Kohhranho te hian Pathian kan fakin kan chawimawi tawk lo fo bawk si. Chuvangin, Pathian fak leh chawimawi tur hian theih tawp kan chhuah zel hi a tulin a pawimawh tak zet a ni.

            Sava hram mai mai ten Pathian an fak a; Pangpar, an nihphung anga par ve mai ten Pathian ropuizia an entir bikna chhan chu, Pathianin a siam ang taka an awm vang mai a lo ni! Mihringte hi thil tha ti tura siam kan ni a, chumai nilovin A rawngbawl tura chhandam kan la ni lehzel bawk a. Chuvangin, Pathianin min siam ang leh min chhandam chhante hre thar zelin chu mi ang taka nung tur chuan theihtawp chhuah zel ila. Tichuan, Pathian kan fakin a ropuizia kan entir ve ngei a rinawm a ni.