Naupang Inkhawmpui
Kumtina kan hman thin Naupang Sunday
School Inkhawmpui pawh kan lo thleng leh ta reng mai. He hun hi Naupangte hian
an nghakhlel ve em em a, thu leh hla intihsiakna tur zirin a hma deih atang
tawh khan an inbuatsaih ve bawk a, anmahni tawkah an phurin an hmunawm em em a
ni.
Tunlai khawvel changkang zelah
Inkhawmpui kan kalpui dan pawh kan her danglam chho hret hret a, a lawmawm hle.
Chutihrual erawh chuan item tam zawk intihsiakna atan kan la hmang chho zel a,
hei hi a thatna tam tak awm mah se kumtina intihsiak ziahna atan chuan a tul
ber em? A aia hlawk zawka kalpui dan a awm em tih te pawh Sunday School lama
kan hotuten an ngaihtuah zel turah ngai ila. Naupangte nghahhlelh em em an
puala inkhawmpui an neih ve chhunah intihsiakna discipline khawng tak nena hun
an han hmang zo deuh vek thin hi chu a tha lo e tih rual ni mah suh se, a aia
hlawk zawk leh an hlimpui zawk programme a awm maithei e.
Inkhawmpuiin a
ken tel ni hiala kan ngaih tak chu ‘Inkhawmpui kawr thar’ hi a ni ta ngawt mai
a, Sunday School lama kan hotuten ‘Inkhawmpui kawr thar hi neih kher a ngai
love’, han ti ti thin mah se, kan fate an rualawt bik ang tih hlauin nu leh pa
te bawkin kan leisak leh nge nge thin. Chhungkaw dinhmun a inchen lo a,
Chuvangin chhungkaw thenkhat tan chuan ‘Inkhawmpui huphurhawmah’ kan chhuah ta
a ni ber a, a pawi hle a ni. Kum dangah pawh Naupang Inkhawmpui hi kan la hmang
chhunzawm zel anga, ngaihtuahna thar kan sen deuh deuh a duhawm hle a ni.
Sunday School lama kan hotute pawhin nasa lehzualin zirtirna in pe zel ila.
Tin, nu leh pa te pawhin kan inzirtirna hi i tihlawhtling ngam bawk ang u.
No comments:
Post a Comment