ARTICLE - Ka indah ‘Value’ tawh dawn...

Ka indah ‘Value’ tawh dawn...

            Kan tawngka lamah fiamthuin ‘Ka indah value tawh dawn’ kan ti chawk a, kan innuih liamsak mai mai rual hian rilru erawh a kal thui thei viau mai. Tun hma atanga kan Value System dik lo kan buaipui tawh laia he tiang tawngkam lo piang chhuak hian ngaihtuahna min siam thar leh hle mai. Mahni leh mahni value inpek chi lah ni hek suh. A bikin Mizo thalai te hian kan value system hi kan her dik a tul takzet a ni. Chu chu kan ram kan hnam leh Kohhran ngei pawhin a mamawh takzet a ni.

Nula Value neilo

            Mahni hlu kan intih viau rual hian midang hian eng angin nge min ngaih tih kan thlir tel fo a duhawm hle. Nula chu a hmelthatna leh piannalhnaah te, a thiamna leh chhungkaw dinhmunin a hlutna a pe zo hauh lo. Chu a hlutna ber chu a invawn thianghlimna kha a ni tlat. Sum leh paiin a lei thei lova, Pathian tihna nena invawn thianghlimna avang chauhva chu hlutna neih theih a ni. “Hmeichhiain a nulat thianghlimna a hloh tawh chuan a hlutna 50% in a tlahniam nghal” an lo ti reng a ni. Chuvangin, tuna Thalai tleirawl te te te hian hei hi kan hriatna kan vawn reng a duhawm hle. Chuti a nih loh chuan hmeltha leh pian nalh tak, thiamna leh din hmun sang tak si khan Nula Value nei lo kan lo ni hlauh dah ang e.

            Hum sual dai palh avanga lo tisual tawh pawh tam tak kan awm ang. Amaherawhchu, kan hlutna tihniam zel tur chuan i tisual nawn tawh lo vang u. Insiamthatna atan tun hun hi a la tlai lo a ni tih hriain zahawm taka kan nun a duhawm hle. Tuma hriat lohvin thilsual a tih tak tak theih loh tih hi kan pawm a tul. Mihringte mithmuh maha kan inthup hlen theih loh chuan englai pawha min hmu rengtu kan Pathian hian min hre chiang hle a ni. Kan tan khua a la tlai lo a ni tih hriain i invawng thianghlim ang u.

Tlangval value nei lo

            Mihring chu kan nih tur ang kan nih loh emaw kan tih loh tur kan tih emaw hian kan hlutna/zahawmna kan hloh fo thin. Kan pi leh pu te hunah  khan tlangval nula ngai hnem leh sakap thei chu an ngai hlu viau a nih kha. Mahse tunah erawh a ni tawh hauh lo. Kan thil tih thin leh kan nun dan hian a hril tawh a, mahni kan inngaih dan ngawt ni lovin mite min tehna zawk kha a pawimawh zel zawk a ni. Zu kan ruih laiin pa ta viaua inhriatna te, chak leh thiltithei tak niawma inhriatna te hian kan ruih chhung bak a daih lova, heng zu leh ruihhlo chi hrang hrang kan tih hian kan hlutna/zahawmna a tihniam em em a ni tih kan hriat fo a pawimawh.

            Tlangval hnathawh na chang hre lo, inchhung khura tangkaina nei lo, mahse, rui reng mai, midangte hmai eng zahna chang hre lo leh nunphung pawh hre lo, mahni duh ang anga khawsa te hi ‘Tlangval value nei lo’ an nih mai bakah midangte harsatna thlentu mai an ni tih kan hriat a duhawm hle. Chutiang kan nih lohna atan ruih theihthil lakah theih tawpin invawng thianghlim ila, mahni kutke a ding thei tur khawpin taimak chhuah bawk ila, midang te tanpuitu tlangval tlawmngai nih i tum ang u.

            Mahni indah value vanga value tur kan ni lo. Kan value-na tak tak zawk chu hlawhchhuah a ngai tih i hre thar leh ang u.