ARTICLE - Zai Kawnga Hmasawn

Zai Kawnga Hmasawn

            ‘Mizote hi zai ngaina hnam kan ni’ kan ti thin a. Ni e, a dik viauin a rinawm. Kan lungngaihin kan zai a, kan hlimin kan zai bawk a. Pathian fakna leh hla dangte sain kan zai fo thin a nih hi. Chuvangin, zai hrim hrim pawh hian kan nunah hmun pawimawh tak a luah kan ti thei awm e.

            Kohhranho ten a huhova Pathian kan fak leh chawimawina pawimawh tak chu Amah faka zai hi a ni. Kan inkhawmah pawh kan hun zatve dawn lai a luah thin nghe nghe a. Tin, Pathian biak inkhawm mai bakah, Fellowship leh inpawlkhawmna dangah pawh kan zaiho fo thin bawk a ni. Zai lama tui  tak leh nuam ti tak kan awm rualin, he lam kawnga tui lem lo pawh kan awm bawk a. Amaherawhchu, kan thiam leh thiam loh te, kan tui leh tui loh lam ai mahin Pathian kan chawimawina a ni tih hi a pawimawh zawk a ni.

            Kan Pathian Biak Inkhawm zai han thlir hian thahnemngaih ana thin hle mai. Theih tawp chhuaha thahnemngai taka zai hmel hmuh tur kan vang ta! A tam zawk chuan run dalah kan hmui kan phun lep lep peih chauh ni te pawhin a hriat. Chumai ala ni lo, hmui phun tak ngial pawha zawm peih lo, zai laia hmui chip hmak a lo thut emaw lo ti ti mai mai emaw pawh hreh lemlo kan awm ta nual mai! Kan fak Pathian hi kan hre chiang tawk lo emawni chu aw a tih theih hial a ni. Kan theih tawp chhuaha kan fak hi a phu a sin.

            Kan Kohhran ngei pawh hemi kawngah hian hmasawn kan ngai ta hle niin a lang. Theih tawp chhuahin Amah faka zai turin tan i la thar leh teh ang u. Tin, kan Hla bua hla awm thiam tam kawngah te, solfa thiam belh kawngah te pawh hmasawn zel turin theih tawp i chhuah thar theuh ang u.