ARTICLE - Hla hril

Hla hril

            Hla hriltuin a key dik taka thiam tak mai a hla an han hril dap dap hi chuan zai a nuam in zaiho boruak pawh nasa takin a chawi kang thin a ni. Hei hian hla hriltute pawimawhzia a tarlang chiang hle awm e.

            Kohhran Inkhawmah pawh hla hriltu kan awm ta zel a, tunhnuah hian aurinna (mic) hmangin hla kan hril tak zel avang hian hla hriltute mawhphurhna hi a lian lehzual hle a ni.  Hetia aurinna hmanga hla kan hril tak thin avang hian a tui mi leh mihlim kan tih te lam chunga hla hril dap dap thin te tan pawh inthlahrun phahna tur a awm chuang lo tih hria ila, a leng vek tho a ni.

            A nihna takah chuan Lengkhawm hla (Khuang hnih hla) kan tihah lo hi chuan hla hril a ni lutuk lo thin. Mahse tunah erawh eng hlaah pawh kan hril ta vek mai a, a that viau rualin hla bu en kawngah erawh min ti thatchhe ta deuh niin a lang. Tin, hla zawng zawnga a tlar tin hril vek hian a hnawk a ni tih kan hriat pawh a duhawm hle. Hla hril nawn chungchang thlengin mipui zai boruak thlir thiam a a awm tawk hriat pawh a tul hle.

            Kohhran mipuite pawh hian kan hla hriltute din hmun hi kan hriatthiampui a duhawm hle. Kan rawngbawltute leh Music Committee lam te pawhin kan hla hriltute hnenah hian “Hla zawng zawngah hril a ngai kher lo e, inkhawm boruak a zir te, Kohhran mipui inkhawm kan tlem tumah te chuan hril kher ngaih loh hun pawh a awm ve a ni” tiin an hrilh ve bawk a. He mi kawngah hian mipui lam pawhin dawh thei taka kan thlir thiam a duhawm hle. Kan hruaituten kan that tlanna tur an ngaihtuah zel turah ngai ila, thurawn inpek erawh a inthlahrunawm chuang lo e.