ARTICLE - Inngaihsan tawn

Inngaihsan tawn

            Mahni mihringpui inngaihsan hi thil har tak a ni. Tunlai hunah phei chuan tu amah hi kan inngaisang vak tawh lem lo. Mite ngaihsan ni tur phei chuan mi bik, leh chungchuang nih a ngai hial awm e. Din hmun leh nihnaah kan aia sang ngawih ngawih pawh “A neih ka ei hleinem” ti tlat thin mihring kha kan ni miau a, chuvangin, inngaihsan leh inzahtawnna kan tlachham sawt tawh em em a ni.

            Eng tehual ni mah suh ila, engahmaha min ngai lotu leh mi hnuaichhiah tak tute bula awm ai chuan min lo ngaisang der a, mi zah thiam tak te bula awm chu nuam kan ti zawk theuh awm e. Chuvangin, kan tualzal nun leh kan khawsakhona hrim hrimah pawh hian kan mihringpuite zahawmna te hriat saka kan ngaihsan thiam phawt chuan midangte tan malsawmna kawng khat chu kan ni phawt. Chuta tang chuan nunho leh thiltihho reng reng a nuamin a awlsam tawh em em bawk a ni.

            Ringtu nun atan hian a pawimawhin ringtu nun dan tur niawm tak pawh a ni awm e. A bikin rawngbawltute tan ngat phei chuan a pawimawh lehzual hle. Kan rawngbawlpuite kan ngaihsan thiam phawt chuan keimahni ngaihsan-awmah kan insiam a lo ni reng zawk a, chu chuan rawngbawlhona leh thawhhona tha a siam bawk a ni. Rawngbawlpui te that lohna leh tlin lohna hre ran chunga rawngbawl chu a hahthlak mai bakah rawngbawlpui hrehawm tak kan la ni zui bawk. Chumai nilovin nasa takin Kohhran hmalakna pawh a tithuanawp thei bawk. Chuvangin, rawngbawltute hian kan rawngbawlpuite thatna lai te kan inthlirsaka kan ngaihsan thiam hram hram a duhawm hle a ni. Mite zahawmna kan inhriatsak leh kan zahsak phawt chuan an hnena rawngbawl pawh a awlsamin Pathian thu takah pawh hruai an awl phah ngei ang.