ARTICLE - EASTER HLUTNA

EASTER HLUTNA

            Min chhandam turin Pathian chuan a fapa mal neih chhun khawvelah a rawntir a, tlawm takin Ran thlengah bul a rawn tan a nih kha! Van miten ui takin an rawn thlah liam a, mihringte tan chanchin lawmawm lo thlengin chu chhandamtu lo piang chuan lei a nghawr nghing a ni. Min chhandam tura a lo pianna champha pawh hlim leh lawm takin Kristian ten kan lawm thin reng a, chutiang taka lawm pawh chu a phu em em bawk a ni.

            Khawvelah rawngbawlin, damlo a ti dam a, mitthi hial kai thovin, Pathian thu ropui taka hrilin thil mak tam tak a ti bawk a ni. Mahse, chung a thiltih zawng  zawng chu min chhandamna atan a la tawk mai lo. Kan sualna leh bawhchhiatna thaibo turin lungngaihna vawrtawp paltlangin, misual ber te thihna hmun Kraws-ah kan aia a tuar a lo ngai ta si! Chutiang lungngaihna leh thihna rapthlak tak tuar chuan keini chhandama kan awm theihna’n Pathian fapa chuan a tuar a ni! Min chhandamna kawng hi a va bumbohvin ava rapthlak ngai em! Chhandama kan awm theihna’n Pathian thisen meuh a luang si a!

            Min chhandamna tura a lo pianna leh kan tan hrehawm tinreng tuara Kraws-a a thihnaah hian a la famkim mai lo. Chhandamna famkim kan channa tur atan hian tlawm taka Ran thlenga bul tana, tlawm taka misual ber anga khenbeha ngei kha Ropui taka kaih thawhin a awm leh ta. Chu chu kan chhandamna a famkimna leh Kristiante tana ‘EASTER’ a hlut em emna a ni. Chu Kraws kaltlanga a thawhlehna tawmpuitute chu ropui taka kaih thawhin kan la awm leh dawn a ni, a va ropui em! Hmana a thawhlehna chauh thlir lovin, ‘Vawiinah hian sual leh thihna hnehin,  ropui takin a tho leh ta’  i ti theuh ang u. Chuvangin, vawiinah hian kan nunah sual leh thihna hnehin Isua Krista hi lo tho leh mawlh rawh se.