ARTICLE - Nu leh Pa Ni

Nu leh Pa Ni

            Nilai leh Beihrual thupui bu-in a sawi angin vawiin chawhnu hi Nu leh Pa Ni programme in hun kan hmang dawn a ni a, a pawimawhin a ngaih hlutawm hle a ni.

            Pathian thua kan hmuh angin kan nu leh pa te chawimawi hi kan tih ngei ngei tur thupek a ni. Chutihrual chuan nu leh pa hlutna leh zahawmna te kan hre thiam lo tulh tulh a tih theih awm e. A bikin Mizo te hian nu leh pa zah kawngah hian hnam dang te hi kan tluk lo emaw`n chu aw a tih theih. Hemi kawngah hian Mizo te kan than harh a ngai hle a ni. Kan nu leh pa te chu keini aia mawl mang zawk pawh ni se, hnuai chhiah tak leh tawngkam dengkhawng taka biak leh chhan hi kan Pathian thu hian a phal hauh lo. Tin, engmah ti thei tawh lova kum upa tak an lo nih pawhin an zahawm hlei hlei zawk a ni tih i hria ang u. Mahse, kan tawngka loah “Tar a” kan ti fo mai. He ngaihdan pawh hi kan ban san a hun tawh hle. Pathian pawi kan sawi ang tih te pawh a hlauhawm e.

            He hun a lo thlena rilrua lo lang fo thin chu, Nu leh Pa nei tawh lo te hi an ni. Kohhranin hetianga hun pawimawh tak kan hman lai hian mittui nen rilruna taka he hun hmang ve mek mi tam tak an awm a ni tih pawh kan hriat a duhawm hle.  Kum upa lam chu lo dah tha ta ila, a bikin kum naupang taka nu leh pa nei tawh lo te rilru tur han ngaihtuah chang phei chuan he programme tha tak hi  hman fo chi a ni ang em? Hetiang zawnga programme siam lo pawh hian  inzirtirna tha tak hi kan nei thei tho lo`ng maw tih ngaih dan pawh awm thei tak tur a ni. Chutihrualin heng te hlei hlei hian Nu leh Pa te hlutzia a tilang chiang hle mai. Engpawh nise, Nu leh Pa chawimawi tur kan neih lai hian i chawimawi ang u.