ARTICLE - Thu neih duhna

Thu neih duhna

            Thuneih duh lo mihring kan awm awm love, tlawmngai thei tak leh midang ngaichang thiam tak a, “in thu thu a ni mai e” ti thin te pawh hian eng emaw chenah chuan thuneih duhna chu kan nei tho awm e. Mihring nuna bet tlat a nih avang hian a hun leh a hmun a zira kan insiamrem thiam erawh a tul hle a ni. Bible thu ngei pawh “ka ngaih dan chuan...” la ti hram hram thin mihring kan nih avang hian inzir thar reng kan mamawh a ni.

            Thu neih duhna hian ram rorelnaah a tha lo zawngin nghawng a nei nasa em em a, thuneitu nih duhna avangin dawt thu pawh kan palzam mek zawng a nih hi maw! Kan tih theih loh tur pui pawh ti tura intiamin mipui kan bum chamchi a, kan zawh loh nghawngkawl inbahtirin ram roreltuten mipui kan puh let leh ang lawi a. Chutiang tho chuan mipuite pawhin kan ram roreltute an thu tiamah an ding lo tiin kan sel luai luai bawka, tu ber nge thiam lo tih pawh hriatthiam a har hle a ni. Heng zawng zawng hi thuneih kan duh luat avanga kan ngaihtuahna bual ata a awm vang te pawh a ni mahna?

            Kohhranah ngei pawh hian thuneih duhna hi thil hnawksak leh Kohhran tana pawi nasa tak khawih thei a ni tih kan hriat reng a tul hle. Kohhran thenkhat chu he thuneih duhna avang hian an lo inthen darh tawh reng a ni. Thiam ve tawk leh hre ve tawk ni a inhriatna te, midang ngaih dan aia ngaih dan nei tha bik riaua inhriat pawh thil awm thei tak a ni. Chu mai ni lovin, kan chhungkaw khawsak leh din hmun a that deuh a vang emaw, ka eizawnnah hna sang leh zahawm tak ka thawh avang emaw a Kohhran huang chhungah pawh thu neih tumna rilru kan pu ang tih a hlauhawm hle. Kohhran chhungah phei chuan a pawi lehzual hle a ni tih kan hriat reng a tul. Chuvangin, he mi kawngah hian kan inven a, kan inzir thar reng a duhawm hle a ni.