ARTICLE - Hmanlai Nula Vrs Tunlai Nula

Hmanlai Nula Vrs Tunlai Nula

            Hmanah chuan Nula inleng nei ngah thei tak te kha nula luck tehna ber a ni a. Tunlaiah erawh chuan a ni chiah tawh lo maithei e. Hmanah chuan nula/tlangval inngaizawng ten midang hriat hlau takin an inngaizawng thin a, han indem fiam chang pawhin nula tam tak phei chu an zak chhe der thin. Tunlaiah erawh chuan a ni ta hauh lo, ‘Miin kan inngaizawng tih hi an hre lo ang e’ tih niawm hrimin zahah kan la ta lem lo. A tarlan theihna apiangah kan tar lang emaw chu tih tur a ni. Inngaizawng tam tak hi chu tunlai nupa tam tak ai pawh hian an inzui nasa zawk hial ta ve ang.

            Hmanah chuan tlangval tana nuam leh hlimawm tak ni a an sawi thin chu ‘Nula rim’ a ni. Nula, ngaihzawng nei lai rengin a inleng tlangval tam tak karah a ngaihzawng ber hriat hauh lovin a inleng te a dawngsawng thin a ni a, an felin an lo va hawihhawm ngai ve le! Tunlaiah erawh chuan, midangte kawm leh chuankaina ngam loh khawpin ngaihzawng kan nei a ni ber awm e. Inleng dang neih aichuan ‘Mahni te nen chauhva awm’ kan duh reng zawk a, mahni chhungte ngei pawh hnawk kan ti tan ta ve ang?

            Hmanah chuan nula ten an ngaihzawngte ‘chance’ an siamsak ngai meuh lo a ni awm e, nula sihhnip leh buan chaklo anga lan kha an hlauh ber te zing a mi a ni hial ang. Hming hliau leh tlangrel hlauvin zahawm taka awm an tum tang tang thin. Tunlaiah erawh chuan a ni ta ber hauh lo mai! Kan nula te hian kan ngaihzawng te tan ‘chance’ kan zawnpui zawk emaw tih tur a ni ta. Mipa leh hmeichhia a fala awm tam lutuk chuan insum theih loh chin a awm duh fo a nia.

            Hengte kan sawi te hi kan sel ta viau e tihna a ni chuang lo. Kan khawvel changkanna hian tam tak hi chu a keng tel ve reng bawk a, chutiang  khawvelah chuan kan cheng miau bawk si a ni. Amaherawhchu, Mizo kan nihna ang leh Kristian kan nihna ang pawhin a awm tawk leh mawi tawk kan hriat a duhawm hle. Rawngbawltute tan ngat phei chuan a pawimawh lehzual hle a ni.