ARTICLE - Lalpa Lungngaihna

Lalpa Lungngaihna

            Khawvelah lungngaihna tam tak kan tawk thin. Mahse, thihna khawp hial lungngaihna tawk sawi tur an awm awm love. Mahse, kan Lalpa Isua khan kan sual avanga a tuar tur leh thihna a hma chhawn dawn a ni tih a hriat khan, “ka lungngaihna hi a nasa em a, thihna khawp hial a ni” a ti a nih kha. Tin, hla phuahtu pawhin “Heti ang em hian mi an lungngai ngai em?” a ti hial a nih kha. Chutiang khawpa nasa lungngaihna chu zuk hrethiam vek lo mah ila, lungngaihna nasa tak, mihringten  lungngaihna kan tawh thin zawng zawng aia nasa a ni ngei ang.

            Kha lungngaihna rapthlak pumpelh tur khan kawng chu a awm teh meuh mai. Mahse, keini min chhandamna a tan chu pumpelh kawng chu a thlang thei lo a nih chu! Mihringte hriatthiam rual loh hmangaihna mak ava ni tehlul em. Mihringte thlir dan atang chuan Hmangaihna atthlak a ni. Min hmangaihtu tan chuan engemaw chen chu tuar kan huamin a tul chuan a thih hial pawh thi ngam kan awm ve mahna? Mahse, hmangaihtu chu sawi loh Amah hmusit a diriamtu leh a thih hial pawh duh ngawih ngawihtute tana a inpekna leh an tana thihna khawp hial lungngaihna a tuar hi hmangaihna mak tih loh rual a ni lo. Tin, a harsa lai tak pawh a ni ngei ang. Chutiang taka min hmangaihtu chu kan Pathian a ni si!

            Hetiang khawpa min hmangaihtu hmangaih let ve hi lawmman dawn tur awm miahlo mahse mihringte hian kan ba ngawih ngawih a ni. Chutah a hmangaihna kan chhanlet ve avang chuan chatuana a hnena chengin lawmman hlu tak, mihring rilruin a suangtuah phak baka ropui kan la chang dawn zui a ni a, kan vanneih zia leh kan chan ropuizia hi i hre thar mawlh teh ang u. Kan tana a lungngaihna tawmpui vein a hmangaihna chhanglet turin a hnen i pan ang u.