ARTICLE - MASIHI SANGATI

MASIHI SANGATI

            Masihi Sangati rawngbawlna hi hun rei tawh tak atang khan kalpui a lo ni tawh a. Kohhran pawhin thlarau bo kan hmuhna lian ber a ni kan ti thei awm e. He rawngbawlna hi a pawimawhzia leh a tulzia hre chiangtu apiangin an tuipuiin thahnem an ngai a, an vei em em bawk a ni.

            He rawngbawlna hi Zoram Kristiante kan vanneihna a tih theih hial awm e. Ram pawn hmun hla tak taka kal chhuak thei lo te tana chanchintha puan darhna field pawimawh tak a ni. Heng kan ram chhunga ringlo mite hi hmun hla taka ring lo te nen an dang chuang lo tih kan hriat nawn fo a duhawm hle mai. Keini a kal chhuak thei lo te tan Lalpan mission field min chhawp hnaih sakah hian thahnem ngai taka kan beih a tul hle a ni.

            Kan rama ringlo mi, hnathawk leh thil dang ti a rawn lutte hi Kristiana kan lo siam hian ram chhung mai ni lo, ram pawn thlengin awmzia a nei tih ka hriat a tul hle. Heta Kristiana kan lo siam hian anmahni rama an haw hnuah, chu an Kristianna chu hawpuiin; chung mite chuan an rama ringlo te hnenah rawng an bawl chhunzawm thin reng bawk a ni. Pathian ram zauna hmanraw pawimawh tak an ni ta zel a ni.

            He Masihi Sangati rawngbawl-naah hian Kohhranhote hi kan thanharh a duhawm hle a ni. A bikin KTP member-te pawh Kohhran dang te ngaihtuah phei chuan Masihi Sangati rawng-bawlnaah hian kan inchiah tlem deuh em aw a tih theih. Nu leh pa leh  kan hruaitute kutah chauh dah lovin, a pawimawhna leh a tulna te hre tha ila, kan tih theih tawk leh phak tawk theuhah he Masihi Sangati rawngbawlna kawngah hian tan i la thar teh ang u.