ARTICLE - Beihrual kum 100-na

Beihrual kum 100-na

            Kum 1918-ah khan kan Kohhran chuan khawvel nekna leh ringtu nun tlak hniamna hmachhawn turin ‘Beihrual’ neih a lo rel a. Kum za lai a lo ral ta, tun kum zabi 21-naah hian hian hun thar danglam tak tak a lo inher chhuak zel bawk a. Hetianga hun inher danglam chho zelah hian Beihrual hi eng angin nge kan rilruah a tlak tih pawh kan inzawh fo a duhawm hle a ni.

            Khawvel changkanna nasa taka a than chhoh mek rual hian, sualna chi hrang hrang leh ruihhlo chi hrang hrang pawh a pung ve zel a. Tunah phei chuan kan Sawrkar meuh in zu hial a zuar ta bawk a. Kan ringtu hmasa te hunlai ai khan tunlai hunah hian kan ringtupui beihna tur hi a let engemaw zatin a tam ngei a rinawm. Beihrual an lo hmanchhan te nena thlir phei chuan hman tan tirh ai maha bei ngawrh lehzual tur kan ni hial awm e. Hemi kawngah hian Kohhran mipui te pawhin kan rilru kan siam thar deuh deuh a duhawm hle a ni.

            Tunhnaia Beihrual kan lo hman tawh thin dan te thlir erawh chuan Kohhranho te hian kan hlut tawk lo em aw a tih theih. Tin, Beihrual thla a zan tin maia hun hman hi a tul ti lem lo pawh kan awm ta niin a lang. Kan ringtu pui te nena intichak tawn tur leh ringtu hnungtawlh mek te inkaih harhna atana Beihrual an lo hmang thin a nih lai hian keini chuan kan chauhpui ta emaw chu aw a tih theih. Pathian khawngaihnain a kum 100-na lai kan lo thleng ta, a lawmawm takzet a ni. Kan ringtu hmasa ten intihchak tawnna atan leh ringtu hnungtawlh mek te kaih hrahna atan Beihrual hun an lo hmang thin ang khan keini pawhin he lam kawnga nasa lehzuala ke penna hun atana kan hman a duhawm hle a ni.