TLANGVAL MOSIA
“Rinnain Mosia
chuan a lo puitlin hnu khan Pharoa fanua fapaa vuah a duh lova, rei lo te atan
sual nawmna hlimpui ai chuan Pathian mi te nena tihduhdah tuar a thlang ta zawk
a.”
Pharoa In atanga seilian, Aigupta
finna leh thiamna hrang hrang zir chhuak, Aigupta ram roreltu ni thei tura
chher chhuah, Mosia nun atang hian entawn tur kan ngah hle mai. Tlangval niin
rilru puitling, chhia leh tha hria a lo nih hnu khan, a hmabak (future) kha a
hre chiang viau awm e. Nakina Aigupta ram roreltu la ni mai tur, chutih hunah
chuan engkim a thu thua la awm mai tur a nih zia pawh a hai hauh lovang le.
Chutiang khawpa din hmun tha leh
awhawma a din lai pawh chuan Pathian hriatna leh tihna tak a nei reng kha a
entawn tlak takzet a ni. Kha dinhmun ropui tak atang khan Pathian rawng nasa
taka bawl thei nia inhriatna pawh a neih ngei a rinawm. Nakinah Pharoa a la ni
anga, chumi hunah chuan Israel fate kha a duh leh a chhuah zalen anga, a duh
leh dinhmun tha takah a dah thei dawn si a. Mahse, Hebrai mi ni si a, Aigupta
mi anga awma, Pathian mite chunga thil
tha leh thil ropui tak nia lang tih kha Pathian thil tum a ni hauh lo. Pathian
ropuina a lan theihna atan kha din hmun kha a kal san a ngai zawk a ni.
Setana huang chhung atanga Pathian
tana thil tha leh ropui tak tih hi Pathian thil tum a ni lem lo. Pathian thil
tum leh a duh ang ti hlawhtling tur hian kan mihring rilru hi paihthlak a ngai
fo thin. Kan ngaih dan leh duh dan chin mai te, tha leh tawk nia kan hriat chin
mai te hi a tawk lo fo thin. Kan duh dan aiin Pathian duh dan dah pawimawh zawk
ila, mihring tena kan remruat aiin Pathian thil tum enge ni ang tiin thlir zawk
fo ila, chutichuan, kan Pathian hi ropuiin a inpuang ngei ang. Tlangval Mosia’n
a hlimna leh nawmna aia Pathian duh dan a thlan zawk avang khan, Pathian
ropuina leh thiltihtheihna nasa tak kan hmu a ni.
No comments:
Post a Comment