Monday, 21 January 2019

ARTICLE - HINDU SAKHUA A BEIDAWNG NEN KAN INKAWM



HINDU SAKHUA A BEIDAWNG NEN KAN INKAWM

Eizawnna avanga Mizoram a an pafa maia awm an ni a. 2016 kum laihawl velah khan a fapa kum 19 mi chu engmah in hauhna leh lawmlohna a neih pawh hriat awm miah lovin an mahni chenna Inah a lo inawkhlum ringawt mai a. Apa duty zo haw chuan hmuin a hrilh hai lutuk leh tuar thiamlo lutuk chu hmuh hrehawm tak tur a ni. A tawrh kha anain a hrilhhaithlak em a, ka hriatthiampui khawp mai.

Vawiin khan amah nen hian kan inhmu a, inkawmna hun remchang pawh kan nei thei hlauh mai a. Kum 50 laia upa a lo nih ve tawh avang leh Pension a hnaih ve tawh thu te kan sawi a. Kei chuan Mizorama a awm chhungin Kristianah inpe ngei se ka duh thu te ka lo hrilh ve bawk a, chuta min chhanna chuan min barakhaihin mi a dek zar mai.

“Khaw nge in Pathian chu? Ka tan hian Pathian a awm lo, pathian kan tih thin hian engmah min pe lo” tiin min chhang a. Chutah kei chuan Pathian chu a awm ngei a, amaherawhchu, Kristian te Pathian chu mit in kan hmu thei lova, tawngtaiin kan be thin a ni tih thu te ka hrilh bawk a. Ka thiam ang tawka kan sawi ve pawh chuan a ringlo bur a ni tawp mai. Chutah heti hian min chhang leh a, “Kum 1996 atangin zing dar 4:30 ah leh tlai lamah kan pathian (Hindu pathian) hnenah ka la tawngtai ziah. Mahse, engvangin nge ka fapa hi a in awhhlum si? Chuvangin, pathian hi a awm lo. Kristian te Pathian, Hindu, Muslim pathian etc.. eng pathian mah hi a awm ka ring tawh lo. Mandir-ah pawh ka fapa thih atangin tun thlengin ka la kal leh lo hrim hrim, tihian eizawnna ka nei a ka tan a tawk” tiin. Ka thiam ang ang chuan kan chhang ve zel tak na a, mahse, a beidawng ngawih ngawih a ni ber mai. A tawp lamah phei chuan a insum zo lo chu a hnuk ulhin a mittui a tla ta hial a.

A hrilhhai thlakin sawi tur pawh avang duh hle mai, a rilru han hneh thei tura kawm thiam leh Isua hi atana damna a ni tih thiam tak a, a hriatthiam theih tura han hrilh ka va chak em! Amaherawhchu, kan inkawmna hmunin a zir loh avang leh ama nun pawh a beidawn em avang chuan tun dinhmunah chuan a beiseiawmloh tih chiang takin a hriat a. Keini ang thiam leh hriat nei tlem tan phei chuan a luhaithlak lehzual hle mai.

Pastor emaw Evangelist emaw, nangmahni tawng duh thala thiam ka rawn hruai anga ka rawn lenpui ang aw, ka ti ta ringawt mai a, chu pawh chu tul a tilo nasa, “Pastor, Evangelist, Pandit etc. an inning vek, engmah awmzia a awm lo, eng pathian mah hi a awm lo” tih chu min chhanna a la ni fan a. Amaherawhchu, hun remchangah ka la rawn lenpui tho tho ang tiin ka nawr luih deuh fe hnuah chuan “ni e induh leh rawn leng rawh u” tiin min chhang hram a.

Ka ngaihtuahna a thui hle mai, hetiang khawpa nun beidawng, anmahni sakhua vawn lai ngei pawh ring zo tawh lo khawpa rilru beidawng, ISUA la hre miah si lo kan ram (Mizoram) ah ngei han hmuh chuan rilru ana in mi a khawih tak meuh meuh a ni. Kan vela ringlo tam tak, hnathawka Mizorama rawn awm te hnenah hian ISUA chanchin hril hi kan ngaihpawimawh lehzual ava duhawm em. Kan thenawm lawkah hian an boral mek a sin!!..

A tlangkawmna atana ka sawi duh chu, tuna a chanchin ka sawi ngei pawh hian ISUA ava mamawh em,, an tana tawngtai bak han tih theih ka va han nei tlem em tih te ka ngaihtuah a. Hetiang lama thiamna leh hriatna nei thui zawk te, keini aia an hnena rawngbawl dan thiam zawk te khan han bengvar teh u. ‘Thir chu a lin laiin deng rawh’ tih ang khan tun hi a lin that lai tak chu a nih hmel e.

No comments:

Post a Comment