Kan ram a dam lo!
Tunlai kan ram boruak rit tak hi
kan hre theuh awm e. Thenawm ram nen ramri chungchangah buaiin thisen hial a
luang a! Ram leh hnam hmangaihtu rilru a na in a rum tak meuhva, kan ram hi a
damlo takzet a ni. Amaherawhchu, he thil
thleng hian tlang hrang hranga Zofate rilru hmun khat min puttir a, kan ram
chhan tur hian kan phak ang tawk theuha chet chhuah pawh kan inhuam viau ni te
pawhin a lang, ava hlu si em.
A
chinchhuakin hre ve mah suh ila, hetiang boruak hial a thlen tak siah chuan
enga tinge buaina lian zawk a thlen hma hian chinfel a lo nih tawh loh le? A
tawpkhawkah chauh thisen hial chhuak khawpa kan beih a ngai ta! Hei hi a
mawhphurtu tan chuan mualphona lian tak a ni ngei ang le. Mizoram lo hi
khawvelah ‘Ka ram’ tih tur kan nei hauh lo. Chuvangin, kan ram zim te hi
duat tak leh uluk taka kan enkawl a, kan venhim hi kan mawhphurhna a ni. Tin, a
Pathian thu hle bawk niin a lang.
Kan ram humhalh tur hian tharum
thawhin i bei ang u kan tihna lam erawh a ni ber lo. Kan Pathian thu chuan “A
ram leh a felna zawng hmasa zawk rawh u..” a tih ang khan, Pathian duh
zawnga kan enkawl leh venhim a duhawm hle. He ram Roreltu leh Mipuite hian
Pathian duh loh zawng kan tih a, Pathian kan hawisan chuan kan ram zim te pawh
hi kan la chan belh zel ang. Tuna kan boruak tawn hian min kai harh mawlh teh se. He ram, Kristian ram hi
engvangin nge kan chheh vel ringlo mi te hian min va zuam ngai ve le? “Kan
ram Krista kan pe” kan ti lovem ni? He ram hi Lalpa ram a ni a sin. A
enkawltute hian dikna nen kan Pathian duhzawnga kan enkawl tlat chuan tumahin
kan ram hi min laksak ngai lovang tih hi i ring ngam ang u. Tunah hian kan ram
hi nasa takin a dam lo mek a ni. Kan ram damna turin kan Pathian hnenah i kir
ang u. A tanpuina dilin Zoram hian Lalpa au mawlh teh se.
No comments:
Post a Comment