ARTICLE - Inthiamchawp

Inthiamchawp

            Ringtute tana sual leh thlemna langsar si lo, mahse kan tana hnawksak em em chu mahni inthiamchawpna hi a ni awm e. Kan tih tur awm tak kan tih loh emaw kan tih tur awm lo tak kan tih hian kan inthiamchawp fo mai. A nihna takah chuan mahni kan inthiamchawp tawh chinah hi chuan a nih tura a nih chiah loh vang a ni duh hle thin.

            Rawngbawltute tan ngat phei chuan a pawimawh lehzual. Ka tih thin leh awmdanah hian mahni lamah  inthiamlohna nei lo mah ila, min thlirtuten kan tih loh tur leh kan awmloh dan tur anga min hmuh tlat si chuan engang pawhin thiam inti thin mah i la kan rawngbawlnain a tuar tho tho a ni. Kan rawngbawlsaka te beng a thleh tlat si chuan rawngbawltu hlawhtling kan ni ngai lovang. Chuvangin, kan thatna tura sawisel/hrilh kan nih pawhin mahni inthiamchawp mai lovin, ‘a ni maw insiamthat ka ngai a nih chu maw le,’ tithei thin ila a rawngbawltu puitling zia viau awm e.

            Inkhawm leh rawngbawlna kawng danga ka kal loh/tih loh chhan chhan te hi mahni lamah chuan awm viauin inhre mah ila, midangin awm min tihpui vek lo thei. Harsatna leh buaina nei thei vek kan ni a. Amaherawhchu, mi tam tak chhuanlam erawh kan pawmpui vek lem lo. Rawngbawlna kawnga kan chhuanlam tam tak hi chu mahni insiamrema pumpelh theih a awm ve bawk a ni. Harsa tak leh buai chung chung pawha kan tih hram hram ngaih hun a awm reng a ni. Kan hun awl neih chhun leh dam that ver vawr chauhva rawngbawl kan tum a nih chuan rawngbawltu hlawhtlingkan nih a rinawm lo. Chuvangin, mahni inthiamchawp mai lovin, midangte mithmuha awm leh mawi te pawh kan zawn tel fo a duhawm hle, hei hi a Pathian thu hle bawk a ni.