SERMON - PATHIAN CHIBAI BUK

PATHIAN CHIBAI BUK

(Johana 4:24, Hebrai  10:23-25)

            Kan thupui a Chibai buk kan tih in a sawi tum chu  thian leh thin emaw chhungkhat leh midang chibai kan inbuk tawn ang ni lo in, kan aia chung leh thil tithei zawk te laka kan intukluhna leh a hnena inhlanna  leh kan zahna va lantir hi a ni. Kan hna leh eizawnnaah te pawh kan hotute zahna chibai kan buk fo thin. Sipai phei chuan an uar lehzual a, an aia lal te chibai buk chu an tih makmawh a ni reng bawk a ni. Hetianga chibai kan buk hian kan va buka kha zahna kan lantir mai bakah kan chawimawi a, chutihrualin a chibai buk tu zawk pawh kan inchawimawi tel ve zel bawk an ti thin. Mihring ten a Pathian chibai kan buk dan tur Bible in min hrilh te han thlir zui ila.

TIH TAK ZETIN PATHIAN CHIBAI BUK TUR A NI:

Thuthlunghlui hunah chuan Puithiamte kal tlangin Mipui ten Pathian chibai an buk a, Pathian an be pawp thin. Amaherawhchu, thuthlung thar fa te chuan Lal Isua zarah chu puithiam hna chu amah ringtu apiangte hnenah hlanin a awm ta, mahniin Pathian chibai bukin amah kan be pawp thei ta a ni, kan chan hi a ropuiin kan vannei takzet a ni. Mahniin fianrialah Pathian kan be thei a, chhungkua ah te, tin, khawi hmun atang pawin kan be thei a ni. Fianrial tawngtaina kan neihin Pathian chibai ka buk ti lovin Pathian ka pawl kan ti mai thin. Chuvangin, Pathian chibai buk kan tih hian a huhova inkhawm a kan thil tih hi a kawk ber niin alang. Tichuan a huhoa Pathian chibai kan bukna pui ber pawh Biak Ina inkhawm hi a ni awm e. Chutichuan, Pathian chibai buk chungchang Johana 4:24&25 kan chhiar tak ang khan, kan Pathian hian Amah chibai buk tur hian tih mai mai a duh hauh lo tih a hriat hle a ni. Thlarau leh tih takzeta chibai buk tu tur a zawng a ni. Kan tun dinhmunah hian eng angin nge kan Pathian hi chibai ka lo buk ve thin? Mahni theuh inenfiah ila. Biak Inah hian eng ti tura lokal nge ka nih? Pathian chibai buk tura lo kal ka nih chuan ka chibai buk danah hian kan Pathian hi a lung a awi meuh angem?

            Kan mihringpuite chibai kan bukin uang thuang leh fiamthuin chibai kan inbuk ngai lo. Tin, thildang tipah leh ngaihsak lo taka chibai inbuk phei chu a dawngsawngtu tan a lawmawm hran loh thin a nih hi. Tin, Sawrkar mi pawimawh bik chibai kan buk dawn phei chuan kan inuluk lehzual a, kan incheina  thlengin kan uluk thin. Chutihlaiin kan Pathian meuh chibai buk tur erawh chuan kan inthlahdah leh viau si. Lei leh van lal ber min siamtu Pathian nung chibai buk tur hian ti mai mai tur khawpin mihring te hi kan lian tawk lo tih I hria ang u. Mobile phone khawih chung te, thiante nena ti ti ho chung te, nula/tlangval hmel tha melh chung leh thil dang ngaihtuah reng chung te hian kan Pathian hi chibai kan lo buk fo lo maw? Mahni theuh inenfiah ila, Biak In a kan Pathian biak dan hi I inenfiah teh ang u. Kan Pathian chuan Thlarau leh tih tak zeta chibai buk tu a zawng a nih kha. Tin, kan inkhawm hian mahni hmasial takin beisei nei ran chunga inkhawm a awm theih. Mahni hlawk tum lutuk te, hlim tum lutuk leh thusawi ngaihnawm tak chiah ngaihthlak tumna rilru, mihring lam duhthu sam beiseina lian tak a neih theih. Chutiang rilru kan pu a nih chuan kan beisei ang boruak a thlen loh changin kan vui fovang, ‘Zanin inkhawm chu a nuam lo, a nin awm, ka hlawk lo etc…’  kan ti fo ngei ang. Chutiang ni lovin kan inkhawm hian mahni lam indah thain Pathian chibai ka buk dawn a ni tih rilru puin inkhawm ila, kan hahdamin Thlarau Thianghlim pawl tharna pawh a tul angin kan dawng zawk ngei ang. Kutdawh rilru puin I inkhawm lo ang u.

PATHIAN BIAK INKHAWMAH TIH TAK ZET KAN MAMAWH:

            Tunlaiah mi kan fing tawh em em a, thiamna pawh a sang tawh em em bawk  a, mahni ngaih dan nasa taka kalpuiin khawvelah pawh thui tak kan tlan thin a ni. Mi tam takin khawvelah hlimna leh chawlhna an zawng reng a, mahse hlimna leh chawlhna tak tak an hmu lo. Sakhaw hrang hrang belin chutah chuan an zawng thin bawk reng a ni. Khawvel Sakhaw hrang hrangah Kristian te hi member in hloh hnem ber kan ni hian awm e an ti thin. Chutihrualin, Mosolman te hi a pung chak ber te zing a mi an ni e, an ti tlat mai bawk. A chhan nia an sawi thin pawh, Mosolman te chuan an Pathian bia hi an ti tak em em a. An zawng zawngin an ti takzet a ni tih pawh kan hmu vek. Chumi a nih avang chuan khawvela hlimna leh thlamuanna zawng, mahse an duh ang hmu si lo ten an tih tak em avang chuan Sakhaw dik ngei a nih ringin Mosolmanah an inpe ta fo mai niin an sawi. Chutihlaiin Kristian te Pathian biak dan dal ta lutuk te avang hian hetiang mi te hian kan Pathian hi rintlak leh Pathian tak takah an ngai lo fo niin an sawi bawk. A nih lah taka, tih tak zetna kan tla chham em em a, kan inkhawm lah Pathian biak leh chawimawi aiin intihlimna hmun te pawh a ang ta tulh tulh mai. Hei hian rah tha a chhuah lo niin a hriat. Lei leh van leh a chhunga awm zawng zawng siamtu Pathian nung betute ber hian kan Pathian biak danah tihtakzetna kan tlakchham si chuan kan Pathian hi kan be pawp lo fo in a rinawm a ni.

            Direct Evangelism pawimawh zia leh a tul tawh zia kan sawi fo thin. A dikin a pawimawh reng a ni. Chutihrualin, Biak Inchhungah pawh tih takzeta Pathian be thei lo hian Biak In pawn lamah phei chuan Pathian rawng hi ropui takin kan bawl theih a rinawm lo a ni. Kan Biak In chhung nungchang mah kan member leh mi hla kan tih te hian an ei lo a nih chuan kan pawn lam nun leh khawsa zia phei chu an ei lo lehzual ang. Chuvangin, Biak Ina Pathian biakna kan neih thin hi tih takzeta kan neih a duhawm hle a ni. Biak Inah hian tih takzetin, kan zawng zawngin Pathian be thin ngat ila chuan heng mi hla kan tih te hian an nun tuihalna rehna tur te, an nun beidawnna sukiang tur te hian Biak In hi an rawn pan ka ring tlat a ni. Engvangin nge miin harsatna leh beidawnna nasa tak a tawk a, a nunah phurrit nasa tak a phur mek a, chutih lain engvangin nge Biak In pan lo a zu leh sa hmun pan a, thihna hruaihruai an thlan tak fo mai?  Keini Biak Ina Pathian be thin te Pathian biak dan thin hian a zir lo a ni mai lawng maw? Thlarau leh tihtakzetin Pathian be thin ngat ila chuan he kan Pathian Biak In hian pan a hlawh ngei ka ring tlat a ni.

PATHIAN CHIBAI BUK TURA INKHAWM BAN SAN LOH TUR:

            Kan Pathian thuin a sawi ang in, ringtute chu bang lova inkhawm zel tur kan nih thu min hrilh kha. Hebrai 10:23-25 kan chhiar khan, mi tam tak ten inkhawm bansan mahse kan bansan ve a rem lo. Tin, khawvel tawpna ni a hnaih telh telhah phei chuan infuih tawn nasa lehzual sauh tur te in min ti a ni. Tunlaiah mi then khatin “Inkhawm inkhawm pawh a ni lo” an ti thin. Mahse kan Bible min zirtir dan a ni hauh si lo. Chuvangin taima taka Pathian be tura kan inkhawm fo thin hi ringtuten kan tih ngei ngei tura Bible in min hrilh a ni, sawi hnawm chi a ni lo. Tin, rinnaa kan dinnghehna tur leh kan thanlenna tur zel a ni bawk. Kan inkhawm hian Pathian chibai kan buk a ni tih kan hriat kha.

 

            Kan inkhawm fo chuan Pathian Biak In ngainatna kan nei chho zel ang. Biak in ngainatna tla hniam telh telh te hian kan thlarau lam nun a ti thuanawp nasa em em a ni tih kan hriat pawh a pawimawh hle a ni. Mihring kan buai tawh a, kan hna leh eizawnna avangin Kohhranin inkhawm hun kan neih te pawh a tam lutuk a ni tih tawngkam mi thiam tak tak te hnen atangin hriat tur a awm ta fo mai, hetiang ngaihdan nei hi kan zingah pawh kan awm nual tawh ngei ang. Hei hian Biak buka Pathian biak kan ngaihpawimawh tawk lohna leh Biak in kan ngainat lohzia a tilang chiang hle awm e. A nihna takah chuan darker 24 chhunga Pathian tana hunk an pek hi a tlem hle. Lal Davida tluka Pathian Biak In ngaina hi a awm theih a ngem aw?  Sam 84:2 ah chuan heti hian a a ti a “Ka nunna hian Lalpa Biak In hung chhung kawtlai te chu a ngai em em a, a ni, a chauh phah hial a….” tiin. Pathian biak In a awm a chak avangin a chauh phah a nih chu! Hetiang reng reng hi mihringah kan awm thei angem tih theih hial tur a ni. Tunge Biak In a inkhawm leh Biak Ina awm chak avanga chauh phah tawh kan zingah hian awm le? Keini chuan Biak In kan ngaina loh lutuk hi kan chauh phah a ni zawk lo maw?

            Mihring kan buai telh telh anga, kan Pathian Biak Inkhawm hun tibuai ngei tur hna tam tak pawh a la awm belh zel ang. Tin, infiamna leh intihhlimna hrang hrang pawh Inkhawm hun laiin kan nei tam telh telhin a rinawm. Chutiang a lo thlen hunah pawh kan Pathian thuin min fuih ang hian Inkhawm kan ngaih pawimawh zawk hram hram a ngai a ni. Tin, kan Pathian thuin inkhawm bansan lo tur leh infuih tawn nasa zual zel tura min tih ang hian khawvel kan awm chhung hian kan ban san a rem lo. Tin, kan eizawnna kawngah pawh hian heti zawng hian han thlir chin ila, kan inkhawm theih lohna tur eizawnna chu thlauh thla ngam khawpin Pathian thu hi kan awih thei angem? Lal Davida chuan Sam 84:10 ah chuan “I biak in hung chhung kawtlaia ni khat awm hi, ni sang khat aiin a tha zawk si a, suahsualna puanin te a awm ai chuan, kan Pathian ina kawngkhar vengtu nih pawh ka duh zawk a ni.” a ti a, a nihna tak zuk ngaihtuah phei chuan a ropui hle a ni. Lal Davida chuan sual kawng zawha hmun danga awm ai chuan Lal a nihna hlip a Biak in kawngkhar vengtu nih a thlang zawk a nia, keini hian hetiang khawp hian kan Pathian Biak In hlutna hi kan hre phak a ngem le? Pathian thu zawm lo/bawhpelh tur zawng hian kan Pathian hian a malsawmna hi min pek ka ring hauh lo. Mi tam tak tan chuan atthlak leh thil tih awmloh tak pawh a ni mahna. Mahse, kan Pathian thu in a sawi miau a ni. Chuvangin, kan inkhawm te bansan lo tura tan kan laka kan infuih tawn zel a pawimawh takzet a ni.

            Pathian chu thlarau a ni a, a chibai buktu ten thlarau leh tihtakzetin chibai an buk tur a ni tih ang khan keini pawh kan ringtu nun hman chhoh zelah hian tihtakzetin a thatna zarzo tham law lawin kan Pathian hi chibai I buk ang u. Biak inah hian Pathian Chibai buk turin kan inkhawm thin a ni tih hre reng ila, chutah chuan tih tak zetin chibai I buk ang u. Tin, midang te pawhin kan ti tak zet a ni tih hre rawh se. Mi tam takin inkhawm bansan thin mahse, kan Pathian thuin min hrilh angin tih takzeta Chibai buk turin a biak bukah I kal zel ang u.

 Lalpan a thu malsawm rawh se.