ARTICLE - Camp-a Ruih luh kher hi...

Camp-a Ruih luh kher hi...

            Kum eng emaw zat kal ta atang khan Kohhranin Camping hmangin Thlaraubo zawn hna leh ringtu hnungtawlh mek te leh ringtu leh rawngbawltu insiamtharna atan Camping hi a lo buatsaih thin a. Zoram Kristiante hian hei aia tih dan tha hi kan la nei rih lo a tih theih awm e. Hlawk takin la neih chhunzawm zel ila a duhawm hle mai.

            Tlangkama an sawi thin chu “Mizorama mihring cheng zawng zawng zat aia tam hi Camping a lut tawh kan ni” an ti thin. Camping kan neih ngun dan ngaihtuah hian a dik viau te pawhin a rinawm. Tin, a tam zawk pawh hian kan Camp luh tawh zat kan chhiar thei nual ta ve ang. Hetiang khawpa Camp zing kan ni chung hian tam tak hi chuan kan thatpui rei lo viau ni te pawhin a lang. Hemi kawngah hian Mizo Kristian te hi kan inenfiah a tul takzet a ni. Fiamthu thawhna atana lo hmang tawk lah bo lo. Kohhranin sum tam tak senga a buatsaih a nih avang pawh hian mipui te hian hei aia hlawk lehzuala chhawr kan tum pawh a tha hle a ni.

            Camp lut zing viau e ti lo chuan kan lut tam tual tual a, kan hlawkpui lo tual tual ta emaw chu aw tih tur a ni. Tam tak phei chuan Pathian thua hlawkna leh insiamtharna atana hman tumna rilru aiin kan chhungte, thiante  leh kan hruaitute hmaizah avanga lut ta mai mai lah kan awm awm e. Kan luh chhan chu eng pawh lo ni se, Camp kan lut ta sa sa a nih chuan Pathian zawna thinlung tak tak puta thuawih taka theihtawp kan chhuah a tha hle a ni.

            Camp ka lut dawn tih avanga ruihhlo ti thin ten \um dang zawng aiin kan rui am emaw tih tur a ni a, tin a hmaa rui ngai lutuk lo pawh Camp luh dawn avanga ruih luh kher kan tum anga ngaih theih hi kan sim a duhawm hle. Chumai a ni lo, Camp-a duty ten ruihhlo ken luh an phallo tih hre reng chunga a ruka ken luh hram leh hmun dang a\anga chawk luh hram tum tawk lah bo lo, hei hi chu ngaihtuah chiang ila, dik kan ti emaw chu? Kohhranho ten Pathian kan biakna hmun atana kan serh, Biak Ina Camp tur kan ni tih hre reng chunga hetiang tih kan ching fo mai hi thil dik a ni hauh lo tih i hre thar teh ang u. “Camping-ah ka lut dawn si a, chuvangin ruih luh a chi loh e” ti zawk awm tak kan ni zawk lo maw? A nihna takah chuan tumah Kristian ni lo chu Camp-ah hian kan lut awm lo ve, Mizo Kristian te hian inenfiah kan va ngai tehlul em. Hetianga ti thin tam te zingah hian K|P Member-te kan bang hauh bawk si lo. Pathian leh Kohhran pawh a zahawm a lawm le, chuvangin helam kawnga kan rilru put dan hi i thlak mawlh ang u, \hanharh kan ngai e.