ARTICLE - I ral thlir lo ang u

I ral thlir lo ang u

            Kohhranin Camping a buatsaih mek a, Pathianin kan tawngtaina chhangin Camper pawh thahnem tak kan nei a, a lawmawm hle a ni. Hei aia tam Camp lut leh turin Pathian hnenah i dil zel ang u.

            Pathian khawngaihna in Camp-ah hian siamtharna changin lawmna thar kan chang thin a. Tin, Lal Isua lo phatsan tawh leh hnung tawlh mek ten inlamletin Pathian hnenah kan kir leh thin bawk a. Hetianga boruak nuam leh hlimawm tak kan hman lai hian Kohhran kan hlimin Pathian biak inkhawm leh lengkhawmah te zai a nuam hle thin. Amah faka zai leh lam pawh a khamawmloh thin a ni. Hetiang hun hi ‘Kohhran hlim lai’ kan tih thin ber pawh a ni awm e. Chuvangin, Camp lut ve lo te pawhin ral thlir mai lovin hlim tak leh am taka Pathian fak leh chawimawina hun atan i hmang ang u.

            Kohhran zai boruak a nuamin a tha em em thin a, tam takin Pathian chawimawi a lamin lamtualah an kual mup mup bawk a, chutihlai chuan zai pawh zai lem lo, mi chezia ralkhat atanga lo thlir mai mai hi thil awl tak a ni ve bawk thin. Hetiang hunah tak hian kan tan tlan hram hram a duhawm hle. Inchhemalh tawn zel kan nih avang hian zaiho kawngah pawh kan lo phur lo deuh a nih pawhin theihtawp i chhuah zel ang u. “Engvangin nge Kohhran hi kan hlim rei theih loh tak viau thin le,” kan ti leh ngawt thin a. A nihna takah chuan Camp kan luh ve loh avanga lo ral thlir mai mai kan chin fo avang pawh niin a lang. Tam tak hi chuan keini aia sual zawk deuh ni a kan ngaih leh ruihhlo avanga harsatna tawk mek te kan thlir a, Camp luh ngai lo niin kan inhre ngawt bawk a. Mahse, Camp an rawn chhuak ta chenga, Camp luh ngailo ni a inhria te hian kan ral thlir leh fo thin hi chu a fuh ber ang em?