ARTICLE - Ram tana Tawngtai

Ram tana Tawngtai

            Insrael faten an hnam tan tih takzetin Pathian an dawr thin a, an hmelma te hnehsaka ti tlawm turin Pathian hnenah an tawngtai thin tih kan hria. Chutiang chuan keini pawh kan ramin hun khirh tak a tawn mek lai hian Pathian lam hawiin a tanpuina i dil ang u. Kan ram chhungah ngei Sakhaw dang tun din tumin hma lakna nasa takin kalpui mek a ni a. Zofa tena kan ram neih chhun hi lainatna tel hauh lovin a ram leilung fa te ni hauh lo duhsak taka chawikan tumna pawh hai rual lohin kan hmu mek bawk. 

            Hetiang hun kan tawn mek lai hian Kohhranho te pawh hian midangte kutah dah mai lovin, tawngtaina nen kan ram, hnam leh sakhaw humhimna atan hian a taka kan thawh chhuah a hun ta hle mai. Hei hi a Pathian thu viau pawhin a lang. Tuna kan ram din hmun hi keini Kristiante tan phei chuan a pawimawh lehzual hle a, tun hun mai ni lo, kan tu leh fa te thlenga kan ram leh Kristiannain nasa taka a tawrh theih avangin a hun lai hian theih tawp chhuaha kan do a tul takzet a ni.

            Ram roreltu leh Politician-te pawh kan than harh a hun ta. Sum leh thuneihna kan duh luat avanga kan thawh rah hi hai rual a ni ta lo! A nihna takah chuan tuna kan ram din hmun ngeiah pawh midang kan puhin an chungah pawh kan thimrim viau, a dikin a nihna chen pawh a awm mahna. Amaherawhchu, a bul berah chuan keimahni Mizo te ngeiin kan tih dikloh hmasak zawk vang a ni hetia hnam dang ring lo mi ten min zuam tak emn em ni! “Ram chu Lalpa ta a ni,” “Ro min relsak ang che” ti mek chung hian kan rorelnaah leh rorelna chang tura kan Campaign-naah erawh Pathian aiin Sum leh thuneih duhnain min hneh ta zawk a, a pawi takzet a ni, zak i la i sim ang u. Pathian hnenah kan tihsual te avangin thupha chawi ila, kan ram a dam leh theihnan i tawngtai ang u.

ARTICLE - Sunday School

Sunday School

            Vawiin hi Khawvel Sunday School Ni a ni a, he ni hi Kohhran pawhin a ngaipawimawh em em a, Puitling leh Naupang lamah pawh thupui zir tur buatsaihin kan zir thin a ni. He Ni pawimawhna leh hlutna hi kan hriat thar deuh deuh a duhawm hle a ni.

            Sunday School pawimawhna leh tangkaina tam tak kan hre tawh ngei ang. Chutihrual chuan, a ngaih pawimawhna kawngah erawh mi tam tak hi chu kan inthlahdah viau ang lawi a. Khawvel thilah kan fate an thiamloh bik hlauin Nu leh Pa te nasa takin kan hman hlel a, sum tam tak sengin hmun hla tak takah pawh kan indah hial reng a ni. Hetiang khawpa nitin School atana kan buai leh kan insenso huam rual hian kan faten nunkawng dik an zawhna tur leh chatuan nun an neihna tur atana zirna school erawh kan ngaipawimawh lo zawk ta telh telh a tih theih. Hemi kawngah hian Nu leh Pa te kan inenfiah a ngai ta hle mai.

            “Mizo Kristian te hi kan nget lo, kan han piangthar tak na a, kan da leh thuai mai. Hnam dang milem bia kan tih zawk te hi an Sakhaw vawnah an nghet zawk daih” kan ti teh chawk a. Ni e, a dikna chen pawh a awm ngei ang. A chhan chu, anni chuan an fa te naupang te an nih lai atangin an rilruah an sakhua kha an tuh nghet em a ni. Keini Mizo Kristian te hian hemi kawngah hian kan tluk lo hle. Kan fate rilrua kan sakhua tuh chu sawi loh chumi tur atana Kohhran in Sunday School min siam sak pawh kan ngaipawimawh tawk lo a ni a. Hetiang renga kan kal a nih chuan Kristian nun nghehna kawngah hian kan pachhe telh telh lovang tih a sawi theih ta hauh lo mai. Kan Kohhran chuan, “Sunday School ziktluak taka kal te chu an lo puitlin hnu pawhin an ngaihtuahawm lo ve” kan ti thin a ni ngai a. Chuvangin, Sunday School hi i ngaipawimawh deuh deuh ang u.

ARTICLE - Usher-te hman tangkai

Usher-te hman tangkai

            Usher tih hi kan tawng ang maiin kan leklam a, sawifiah hran ngai lovin kan hre thiam vek awm e. A pawimawhna leh tangkaina pawh kan hmuh hmaih hauh lovang. Chutihrual erawh chuan, mipui te zawk hian kan la hmang tangkai thiam niin a lang.

            Inkhawmpui leh Kohhran Inkhawm hrang hrangah te kan Thalai te Usher tur inruatin an duty thin a. Hei hi mumal leh felfai zawka kan inkhawmte kan thut leh kan chhuah theihna atana ruahman a ni. Chuvangin, Kohhran mipui te pawhin an thu kan zawm hram hram a duhawm hle. Hetianga duty te hi kum lamah pawh la naupang zawk te an ni tlangpui a, hreh tak chungin kan thutna tur min lo kawhhmuh thin a ni tih hriatpui ila, kan duhna taka min lo dah lo a nih pawhin thuawih takin thu mai thin ila, chu chu a mawiin a mi puitlingzia hle bawk a ni.

            Kan inkhawmah hian tlar hma dah awl chang a awm fo thin a, hei hi kan usher te thiam loh ni lovin, mipui lam zawkin kan thut duh miau thin loh avanga awl a ni fo mai. Tin, kum lama upa zawk te pawhin kan hriatthiam hram hram a ngai hle a, tun hun thleng hian kan usher te thu zawm duh miah lo, mahni duhna hmuna thu lui tlat pawh sawi tur kan la awm nual niin a lang! Hengte avang hian Usher a duty thin kan Thalai naupang zawk te phei chuan Usher duty hi an hreh phah fova, a pawi hle a ni. Kan usher te thu kan zawm thiam poh leh kan hmang tangkai a lo ni reng zawk a ni tih i hria ang u.

            Kan Usher-te pawh inzir thar zel an ni a, tan han la lehzual se a duhawm hle. Hmel hlim tak leh hmuhnuam taka Inkhawm tura lokal lo dawnsawn te, tin, an kum leh rawngbawlna chanvo chelh a zira an thutna awm lo kawh hmuh kawngah te pawh hmasawn zel turin inbuatsaih se a duhawm hle a ni.

           

           

ARTICLE - Pathian Biak Inkhawm

Pathian Biak Inkhawm

            Kan Pathian thuin a sawi ang in, ringtute chu bang lova inkhawm zel tur kan ni a, mi tam tak ten inkhawm bansan mahse kan bansan ve a rem lo.Tawpna ni a hnai telh telh anga, chumi hunah phei chuan infuih tawn nasa lehzual turin min chah nghe nghe. Chuvangin taima taka Pathian be tura kan inkhawm fo thin hi ringtuten kan tih ngei ngei tura Bible in min hrilh a ni, sawi hnawm chi a ni lo.

            Mihring kan buai tawh a, kan hna leh eizawnna avangin Kohhranin inkhawm hun kan neih te pawh a tam lutuk a ni tih tawngkam mi thiam tak tak te hnen atangin hriat tur a awm ta fo mai!  Chu chuan mi tam tak rilru a hruai peng mek bawk a, a pawi takzet a ni.           Tunai hian kan la buai telh telh anga, kan Pathian Biak Inkhawm hun tibuai ngei tur hna tam tak pawh a la awm belh zel ang. Tin, infiamna leh intihhlimna hrang hrang pawh Inkhawm hun laiin kan nei tam telh telhin a rinawm. Chutiang a lo thlen hunah pawh kan Pathian thuin min fuih ang hian Inkhawm kan ngaih pawimawh zawk hram hram a ngai a ni.

            Tin, kan eizawnna kawngah pawh hian heti zawng hian han thlir ta ila, kan inkhawm theih loh phahna tur eizawnna thlauh thla ngam khawpin Pathian thu hi kan awih thei angem? Lal Davida chuan suahsualna puanin te a awm ai chuan, Lal a nihna hlipa, Biak In kawngkhar vengtu nih a thlang zawk a nia, keini hian hetiang khawp hian kan Pathian Biak In hlutna hi kan hre phak a ngem le? Tin, Pathian thu zawm lo/bawhpelh tur zawng hian kan Pathian hian a malsawmna hi min pek a rinawm loh. Mi tam tak tan chuan atthlak leh thil tih awmloh tak pawh a ni mahna. Mahse, kan Bible zirtirna a ni miau si. Chuvangin, kan inkhawm te bansan lo tura tan kan laka kan infuih tawn zel a pawimawh takzet a ni.

ARTICLE - Harsatna i tawk ve fo em?

Harsatna i tawk ve fo em?

            Khawvel kan awm chhung hian eng din hmunah pawh ding ila, kan nun tihrehawmtu, min tilungngai a mittui hial ti tla thei khawpa harsatna tawh tur hi a lo awm a ni ange! A bikin |halai kan nih hun chhung hian a zualkai emaw tih tur ni te pawhin a lang. Kan nun hman mek leh kan hun tawn a harsatzia te, hringnun titawpa khawvel chhuah san chak duh rum rumna khawp harsatna kan tawh mek thu te Social Medial kal tlangin kan au chhuahpui fo mai.

            Ni e, harsatna chu kan tawk vek, a chhan erawh a inang vek lo mai a ni. Tumah indem tur chuang lah kan awm hek lo. Amaherawhchu, heng harsatna leh hrehawmna zawng zawngte hi kan tawrh chhuah a ngai ve bawk si. Chutihrualin, mahni mai chuan tawrh chhuah a har chang a awm fo a. Kan mihringpui ten nasa takin min chhawkin min hnem thei, mahse heng kan harsatna zawng zawng hi an sukiang thei hauh si lo. Chuvangin, khawvel kan thlir chuan \ah leh rumna bak min thlen loh chang a awm fo thin a nih hi! Hetiang taka harsatna hi i tawk ve fo em? Kan lo tawk a nih chuan Pathian hnenah lo chuan heng harsatna min chhawk thei hi khawvelah a awm lo a ni tih hriain, A hnen pan mai bak tih tur kan nei lo a ni. Chuti ni lova, rilru chhawkna zawngia zu leh ruihhlo pan thin te hian a tawpah lungngaihna beidawnna bak an hmu chuang lo a ni tih i hria ang u.

I beidawng ve fo em?

            Beidawnna hi misual leh mi awm \ha duh lo kan tih te chauhin an lo nei hauh lo nia. Pathian rawngbawltu pawimawh tak pawh hian he beidawnna hi a lo tawk ve thei tho niin a lang. Damchhung khawsak buaina leh kan eizawnna kawng a ni emaw, keimah leh kan chhungkaw bawrhsawmna chungchangah a ni emaw, nupui/pasal leh nulat tlangval kawng thuah emaw pawh beidawnna nasa tak neia hun khirhkhan tak kan tawh chang a awm fo \hin. Hetiang khawpa harsatna hi tawkin i beidawng ve fo tawh em? Chutiang hunah chuan kan beidawnna kha inuaibehtir mai a hlauhawm hle. Khawvelah theihtawp chhuahin kan bei a, chuti chung pawh chuan awmzia a awm tawh loh avangin kan beidawn tawh miau si a. Mi tam takin khawvelah bawk chu beiseina chu an zawng leh fova, mahse an hmu lo. Pathian hnenah lo chuan chu beiseina kan nei theilo a ni tih kan hriat a pawimawh hle a ni.

            Heng, harsatna, hrehawmna leh beidawnna te hi khawvel awm chhung chuan kan la tawk zel ang. Tin, ringtu kan nih avanga pumpelh tur lah a ni hauh chuang lo. Amaherawhchu, eng ang harsatna pawh lo thleng se, Pathian nen chuan suttlang theih loh a lo awm lo tih hria ila. Harsain mittui hial senga tawrh ngai mah se, Pathian \anpuinain kan hneh ang, ala kiang ngei dawn a ni tih i ringhlel lo ang u. Heng zawng zawng hi Pathian chakna ringa kan paltlang hnuah chuan Pathian thiltihtheihna leh a ropuizia min hmuh fiahtirtu leh Amah kan rinna kawnga chakna thar min pe tu a lo ni hlauh zawk \hin a ni. Fak hlaah pawh heti hian kan hmu a-

            “|ahna ruam te zawh lo ni ila, A hmel mawi hmu fiah hian ka in ring lo; hrehawmna leh lungngaihna karah pawh, A mawi zual ka Lalpa hmel duhawm.”