SERMON - Pathian tana hun pek

 

PATHIAN TANA HUN PEK

(Branch Leader Kumthar 2021 thuchah)

(Hebrai 10:5-6  Rom 12:1)

 

            Covid-19 hripui leng avangin Ni 341 lai mai K|P inkhawm kan neih theih loh hnuin vawiinah Inkhawmna hun tha tak mai kan han nei thei hi Pathian malsawmna leh min hruaina vang chauh a ni. Inkhawm, Fellowship leh Activity dang reng reng nei thei lovin hun rei tak kan awm a, chu chuan kan thlarau nun pawh nasa takin a pawt hniam ngeiin a rinawm. Kan thlarau lam nun a lo chak loh deuh avang emaw KTP rawngbawlna kawngah kan lo bahlah deuh emaw a ni pawhin tumah indem tur chuang kan awm lo. Kan hun tawnin a zir miau loh avangin mimal nun atang ringawt chuan a harsa ve bawk thin a ni. Hei hi Pathian kan rin tawk loh vang emaw Pathian thu kan awih tawk loh avang emaw a ni ngawt lova. Ringtute hi a huhoa Pathian pawla inchhem alh tawn tura siam kan nih avang te pawh a ni ange. Chuvangin, huho nun kan neih theih miau loh avangin inchhem alh tawn tur kan awm lo a ni ber mai.

 

            Amaherawhchu, Pathian malsawmna leh hruaina kan changah tunah chuan nunphung pangngai kan zawh chho tan leh dawn niin a lang a. A hma ang tak la ni lo mahse hri leng pawh a zia awmin a hma angin hun kan hmang leh thuai turah beisei i la, tawngtaiin I dil zel ang u. Hun rei tak kan lo inthlahdah deuh tawh emaw, rinna kawngah kan lo hnung tawlh mek emaw a nih pawhin tun hun hi insiamtharna hun leh bul \anna \ha tak a ni tih hria I la, KTP hmanga a rawng kan bawlna kawngah pawh insiam tharin rilru thar pu \heuh turin kan insawm a ni.

 

            Hripui leng avangin engmah tak tak a tih theih loh a, chuvang chuan hun awl pawh kan ngah \hin hle a nih hi, heng kan hun awlah te hian Pathian pawl emaw a thu (Bible) chhiar emaw a harsatzia kan hria. Amaherawhchu, chutiang tihna atana hun \ha tak a ni lawi si. Hun awl ngah viau mah ila Pathian tana hun pek erawh harsa kan ti hle \hin a nih hi. Kan thupuia kan tarlan ang hian Pathian tana hun pek a pawimawhzia leh a \ul zia tlem te in han tarlang dawn ila.

 

            Pathian tana hun pek harsa kan ti thin. Eng vang nge?: Ni khatah Darkar 24 hun min pe a, chu hun a\ang chuan sawma pakhat chu sawi loh Darkar khat lek pawh min petu tan hian pek harsa kan ti tlat \hin hi chu a petu rilru hi a na \hin ngawtin ka ring. Hun pangngai kan hman lai khan kan mithiam leh mifing pui pui te khan Kohhran Inkhawm leh KTP activity a tam lutuk thu te, kan chhiatpui an hlauh thawn thu leh kan zirnaah pawh hlawh chham phah hial a hlauhawm thu te an sawi fo mai. Ni e, khawvel thlirna a\ang chuan a dik ang. Amaherawhchu, enga tinge mihring te hian he ti em em a kan hma kan sial tlat le? Hun min petu tana kan hun rei lo te pawh pe phal lo tur khawpa mahni hmasial nih chu keini ang mimawl tak ngaihtuahna a\ang pawhin a awm ang lo viauin ka hria.

 

Pathian tana hun pek hi hlawkna kan nei dawn a nih loh chuan harsa kan ti fo thin, Pathian tana hun kan pek chuan ch^n duai tur emaw hlawh chham tur hialah emaw kan inngai \hin hi chu kan ngai sual deuh a ni lawng maw? Hun min petu leh kan hun hlu tak beiseitu rilru hi kan tina thei viauin ka ring \hin. Chuvangin, kan hun zawng zawng ama tan pe thei lo mah ila, nikhata darkar khat lek emaw a aia tlem hial pawh ni se han pek let ve chu min petu hian a phu viauin ka hria. Kan \hat lai leh kan vanglai ngei hian min siamtu leh hun \ha min petu tan hian nasa lehzualin kan hun hi I pe ve ang u.

 

            Pathian hian thil dang zawng zawng aiin kan hun ama tana kan pek hi a duh zawk: Hebrai lehkhabua kan chhiar ang khan, Inthawina leh thil hlan te, halrala pumpekna leh sual tana inthawina aiin “I duh zawng ti turin ka lo kal e” kan tih mai kha Pathianin a duh zawk a ni tih kan hre thei awm e. Chuvangin, thil dang zawng aia a duh chu, kan hun hlu tak hi ama duh zawng tihna atana inpek a ni kan ti thei awm e.

 

Billy Grahama lehkhabu ‘Unto the Hills’ ah chuan  chuan hmeichhe naupang pakhat leh a pa inṭhian ṭhatna chanchin hetiang hian a sawi. An pahnih chuan tlai tin kawngah kal dûnin thing leh sava mawizia te sawiin kalkawnga an tawhte incheina leh hmêlte sawiin an titi ṭhin a. Hlim takin an inkawm ṭhin a ni. Ni khatchu a pa chuan a fanu-ah thildanglam a awm niin a hria a. Tlai khat kawng an kal dûn chu a fanu chuan chhuan lam siamin a kal pênsan ta daih mai a. A pa chuan a lo ṭhan len ve tâk avâng te, a rilru pawhin puitlin lam a pan ve tâk avang te, pa bula awm reng chu nula tân ṭha-a a hriat tawh loh avâng te niin a hria a. A hriat thiam êm êm rual chuan a thinlung chhûngril tak erawh a na veng veng a, a khua a har ngawih ngawih a ni. A fanu awm ve tâk loh avângin a pian cham te chuan a rûkin a hlim rêng rêng lo a. Mahse, a fanu chuan tûnhma a tlai an len dun ṭhin laia slipper a siam sak, ama kut chhuak ngei mai chu a rawn present hlauh mai a. A lawm êm êm a ni. Mahse, a fanu hnênah chuan, “I slipper min pêk avangin ka lawm takzet a ni. Nangma min siamsak ngei a ni tih ka hriat phei chuan ka lâwm zual a. Mahse, ka duh ber chu I thil min siamsak leh mi tihsak zawng zawng aiin nangmah hi ka duh ber zâwk a ni. Nang nêna inkawm a, hlim taka nun hman aia lawmawm ka tân a awm lo,” a ti a. Tin, Nula/Tlangal inngaizawng te a\ang pawh hian a chiang viau awm e, kan ngaihzawng ten ka hman lo, ka buai an tih renga kan tan hman hun an neih theih meuh loh chuan kan lawm ngai lo a, thilpek hrang hrang mi tihlawmna atan min pe \hin mah se, anmahni berin kan tan hun an neih theih miau loh chuan kan lawm a kim tak tak loving. A chhan chu, an thilpek ni lovin anmahni kha kan hmangaih zawk vang a ni.

 

Aw le, Kan Pa, vâna mi pawh hi a hmangaih fate hian kan kal pên san ṭhin a, kan buai êm avângin amah nen fianrial hun kan nei hman lo ṭhin a. Amah pawl turin Biak bukah kan kal hman lo \hin a. A rawngbawlna kawnga hma kan lakna activity hrang hrangah kan kal hman lo fo bawk a nih hi. Ni e, kan hriselna avang te leh chhan hrang hrang avangin a zawng zawngin kan hman vek thei lo. Amaherawhchu, kan inthlahdah avang leh kan ngaihpawimawh tawk loh avanga kan hman loh pawh tam tak a awm ngei ang. Mihring kan buai telh telh a, hetiang hunah tak hian kan hun pawh kan insiamrem thiam a pawimawh hle a ni. Pathian tân hun pe ila, a hman theih turin inhlan ila, malsâwm kan ni ngei ang.

 

Kum 2021 bul kan \an chho mek a ni a, kuminah hian Pathian biak inkhawm kawngah te, fianriala Pathian pawl kawngah te, a thu (Bible) chhiar kawngah te leh kan rawngbawlna peng hrang hrangah te hian \an la thar i la. Inthawina nung, Pathian lawm tlak ni turin kan hun ama tan pein kan taksa ngei hlanin I che chhuak ang u, chu chu KTP ten kan rawngbawlna awm reng a ni. Lalpan a thu malsawm rawh se.