ARTICLE - 2020 Review

 2020 REVIEW

 

‘Zawh ngai loh kawng kan zawh dawn’ tih thu hmangin Kohhranho ten bul kan \an kha a ni a. Kan suangtuah leh ngaihtuah ngai reng reng loh kawng zawhin tun hun hi kan thleng ta der mai! Zingah ni a chhuaka, tlaiah tla lehin zan hun kan hmang \hin. Hetiang renga hun kan hman \hin hi Pathian remruat leh a malsawmna vang chauh a ni tih kan theihnghilh fova, khawvel piankenin a her chhuahpui ve reng leh kan chan tur ve reng a ngaihna lian tak kan nei fo \hin a nih kha. Amaherawhchu, he kum (2020)-ah zet hi chuan Pathianin min \hiahsak hneh hle mai. Zawh ngai loh kawng chu kan zawh ta ngei e.

 

            Kum a thar a, kum dang angin hun leh ni kan chhiar chho dawn emaw kan tihlaiin Covid-19 hripuiin khawvel an nuai tak tak a, ralkhel dar kan khawng ri ta chuah chuah mai a nih kha. Hlauhnain kan thauah a man a, kan chi-ai a ni ber a; kan mithiam leh hre zau zawk te hlei hlei an mangang emaw tih tur a ni. Mipui te hnem leh thlamuan a hnehin kan insawi \haihsiak ta emaw tih a nih kha! Chumi avang chuan rilru fim pawh kan pu hlei thei lo a nih kha maw.

 

            Covid-19 hripuiin min han chiahpiah takah chuan kan nunphung leh khawsak phung tam tak thlak a lo ngai ta, eizawnna a khaihlaka, Chhiatni \hatni hun kan hman dan te pawh rilru tina ngawih ngawih hial khawpin a sawi danglam a nih hi. Chumai a ni lo, Kohhran inkhawm leh thiltih hrang hrang kan chawl nghal \huap a, thlarau nun lamah pawh tumah inngaihsak tur bik chuang awm lovin min hrut rual ta vek a ni. Berampu tan rilru a hah a, beramte ngaihsak hleih theih lah va ni suh. Chutiang bawkin Beram te tan pawh tu han beisei rual lah ni lo. Mahni leh chhungkuaa Pathian biak bak a huhova in chhem alh tawnna kan nei thei ta lo. Harsatna kan neih te pawh mahni tak meuh meuha sutkuak a ngai ta . Ringtu nun dik tak nei tura Lalpan min chher hriamna hmanrua a ni ngei ang?

 

            Heti khawpa hripui avanga kan buai lai hian Ramri lam buainain min rawn nangching leh ta. Hripui hlaua tawmim leh fimkhur taka khawsa mek mah ni ila, hripui hre lo leka thawh chhuah a ngai thul. He ramri buaina hian kan nitin khawsak, ei leh bar a nghawng tel chho ta zel a ni. Pathianin kan chenna tur atana min pek ram humhim tur hian tlawm zawk nih kan tum der si lo. Theih tawp chhuaha kan hum halh a ngai si, hei hi a Pathian thu em em bawkin ka hria. Hetiang buaina thuah hnih thuah thumin min chima, kan buai luih luih lai hian kan thlarau lam nun bawk hi a hnung tawlh duai duai ang tih a hlauhawm thin. Kum dang zawng zawng aiin \awng\ai nasat kan mamawh kum ava ni chiang em.

 

            Hei leh chen hi Covid-19 hripuiin min chen chilh chho ta a, vanduaithlak taka hripui avanga mual min liamsan te pawh kan nei chho ta, a pawi takzet a ni. Fimkhur kan mamawh leh \ul lai takin a fimkhur vek sen loh a ni ber e. Ei leh bar kan mamawh tho avangin a theih chen chenah nunphung pangai kan zawh lo thei lo. Hlauh hleih theih loh, hlauh loh theih loh a ni ta ber a, “a tlak tlak vanduai” kan tih ang hun chu kan thleng chho a ni ta ber mai. He hunah hlei hlei hian a ni Pathian kan auh tam a \ul zual ni.

 

            Kristian tena kan hunpui leh ngaihpawimawh ber Krismas pawh naktip mai a ni ta. Mahse, chu lam chu kan la hawi hlei thei lo. A lungchhe zawnga ngaihtuah phei chuan a lungchhiat thlakin he hripui zet hi chu a runthlak takzet a ni. |halai leh naupang zawk te tan chuan a zia tak pawh a awm, kum upa leh tar chak lo zawk te tan hlei hlei hian a runthlak lehzual ngei ang. Kum dangah chuan Kohhranho ten kan urlawk a, chhungkua kan inbuatsaih a, mitin te inpuahchah in he hunpui hi nghakhlel takin kan thlir \hin kha a nia. Tunah zawng, tumah reng inpuahchah thei lovin kan ngui ta \huap mai. Lalpa min hruaina kawng hi hriatthiam a har rih a ni e.

 

            Engpawhnise, he hun harsa tak kan hman liam tak leh hman chhoh mek hi kan \hatna tura Pathianin a thlentir a nih ngei i beisei ang u. Amah pawl tam phahna atan leh a hnena tlukluh tam phahna atan i hmang hlauh zawk ang u.