ARTICLE - Entawn

 Entawn

(I Kor 11:1  Phil 3:17)

 

            Mihringte hian kan mi ngaihsan zawng leh kan duh zawng kan ngainat zawngte hi kan entawn thin. Midang entawn leh midang atanga inzir lo mihring a awm theih tak takin a rinawm loh. Midang te tih ngai loh ti chut chut chu a common lo kan ti thin a ni lawm ni? Chutianga inentawnna khawvelah chuan eng chin nge kan entawn ang? A englai kha nge entawn ila, tha anga, a englai kha nge kan tana tangkai tur leh keima tana hlawkpui tur ni ang tih thliar thiamte hi mi fing, mi changkang kan tih te chu an ni leh mai. Entawn loh tur lai kan entawn erawh chuan awmze awm lo leh mi te nuih tizatu mai a nih theih (Eg… Zirlai Exam inentawn chungchang…)

Tunge/tute nge I ngaihsan? Tunge I roll model (I nun kaihruaitu ber) chu? Han ngaihtuaah vang vang teh le. Tunlai Thalai leh tleirawl tam tak chuan K-Pop Star - BTS, Black pink etc. kan ti mai thei… Kim Taehyung em ni? Nge Lee Min Ho zawk? Nge Black pink star Lisa zawk ni ang? K-Pop star kan ngaisang a duh em em te hi ka dem hran lo. Mi tu pawhin duh zawng ngaihsan zawng kan nei theuh a lawm. Mahse Isua ai chuan I ngaisang loving u. Heng mite nunah hian zir tur leh kan tana tangkai tak tak a inphum teuh a ni tih kan ngaihtuah ngai em?

Mizorama K-Pop (Korean Popular, Music) ngaisangtu tam tak te hian an englai hi nge kan entawn? A tam ber hi chuan an incheina make up, an thuamhnaw inbel leh hair style tih vel te a ni tlangpui. Ka inhmeh em tih pawh ngaihtuah loin kan lo entawn ve ngawt a, kan sam kan tisen, ti pink, tieng kual vel emaw ni, kan nalhpui viau a nih chuan ka sawisel lo. Mahse, midangin nalh kan tihpui lo tlangpui tiru? Mipa thenkhat phei chuan K-Pop star te hi an tuai emaw tiin an inti tuai ve ngawt emawni… Mahse, an tuai hran lo a nia aw. Kan hriat lar berte zing a mi leh khawvelah pawh a lar ber a tih theih hial ang ,BTS te hi han thlir thuak thuak teh ang.

BTS te hi kum 2010 a din tan niin kum 2015 ah khawvel hriat an lo hlawh tan a, kum 2020 ah phei chuan anmahni ngaisangtu fan 20 millions lai an nei hman tawh a ni. An hmel en reng reng hian hei chuh a pa vak lo ang a, an ngo puak hlawm leh nghal a, tih tur an ni. Mahse, Kerean ho hian lan dan ngawt hi pa (man) leh palo tehna atan an hmang lem lo. Mahse, Khawthlang (Sap ram) tena pa an hrilhfiahna chu mipa chu a hmel en pawha pa hliah hliah, mahni rilru a awm sawi mai mai lo leh tharum ngah tak Rambo, Arnold ang te hi a ni awm e. Korea ho ve thung chuan pa hrilhfiahna atan “mipa chu pangpar anga mawi leh zahawm an ni tur a ni” an ti ve tlat thung, hei hi an hnam culture a ni tlat. Tin, Mipa Cosmetic hi khawvela an hralh chhuah 20% vel hi S. Korea rama hralh chhuah a ni hem mai . BTS te hian Cosmetic atanga skin care company te an nei a. Tin, an vun leh taksa lan mawi an ngaipawimawh em em a, nula rim emaw thil dang (mobile phone leh internet te pawh a niang chu) avanga zan rei tak tak men ai chuan an vun nalhna tur a nih chuan mut hma mai pawh an thlang zawk thin an ti. Anmahni pawh hi kan hmuh ang hian an nalh reng bawk a. Kum 2020 khan BTS Member Jung kook a hi  khawvela mipa itawm bera thlan a ni hial.

BTS te hian an zinkawngah harsatna tam tak an paltlang a ni tih kan hriat hmaih loh a tha. An thawhrimna leh an tum ruhna te hi khawvelin entawntlak ti a a sawi a ni.  S. Korea entertainment industry hi Company lian pathumin an thunun tih theih a ni a, BTS te hi chung Company/Agency ni lo atanga bul tan harsatna hrang hrang paltlang an ni a, mihring khawsak kawngah pawh din hmun harsa tak atanga rawn ding chhuak te an ni nawk a ni. An nu leh pa te pawh kut hnathawka ei zawng harsa taka khawsa ve tawk tawk te an ni ve hlawm. An zin kawngah hian a chan chhe zawk under dog anga ngaih theih an ni a, sum leh paia harsatna nasa tak an tawh atanga an rawn din chhuah dan te an thawhrim zia leh an tum ruhzia hi sawi tur tam tak a awm. chutianga taka harsatna paltlanga an thawhrim avang chuan Korean thalai te fuih phurna atan pawh an inhmang nasa hle. An hla tam tak hi thalai te nun chawk tho lam hawi, rilru lama harsatna nei te tana beiseina nei tura infuihna lam hawi a tama, heng an hla avang te hian Korea thalai tam takin rilru put dan dik ka neih phah ti pawh tam tak an awm hial a ni.

Keini Mizorama BTS ngaisangtu (fans) te hian anmahni atangin enge kan zir chhuah ve a, englaiah nge anmahni kan entawn ve in zawt theuh ang le. Anmahni kan ngaihsan avang hian kan zirlaiah kan bahlah fo em? Chhungte tana tangkai hman lo khawpin kan buaipui em? Mizo Society leh kan khawtlang nun ngaihthah thakin kan ngaisang em? Tih tur tam tak awm laia Social Media a hun tam zawk hman phahna atan kan hmang em? BTS Army te hi khawvel huapa Social media a active berte an ni an ti hial a nia. Kan ngaisanga kan lo duh viau a nih pawhin kan indem lo, mahse, kan ngaihsan avang hian kan nun leh kan zirna hian chhiatpui suh se. Kan sawi tak ang khian an tumruhna leh an taimakna te hi entawn hlauh ila kan thatpui ngawt ang.

Tirhkoh Paula chuan I Kor 11:1 ah chuan “Mi zirtute ni rawh u, keipawh Krista zirtu ka ni ang bawk hian” a tih kha. Tin, Phil 3:17 ah pawh “Ka awm dan zirtute lo ni hlawm rawh u” a tih kha. Chuvangin, Bible-a Pathian ringtu tha tak tak leh mi hmingtha te hi kan entawn atan Pathianin min pek a ni. Kristian, Krista zuitu kan nih angin Isua hi kan zirtur leh kan entawn ber (Roll model) tur a ni. Chu chu khawvela kan awm chhung leh kan thih hnu thleng pawha kan tana tha ber tur, chatuan nun kan neihna tur a ni tih Bible in min hrilh. Khawvela awm kan ni miau a, midang te nen inentawna inzir tawn thin tura Pathian siam kan ni. Chuvangin, midang te leh kan mi ngaihsan zawng te atangin kan tana tha tur kan inzira a tha lai kan entawn kha a pawimawh. A pawimawh berah erawh LAL ISUA HI KAN ENTAWN BER TUR a ni tih I hre reng ang u.