ARTICLE - Kohhran Inkhawm atam kan ti maw!

 

KOHHRAN INKHAWM ATAM KAN TI MAW!

            Khawvel a changkang zel a, chutiangin kan hnathawh dan kawng pawh a dang zel bawk a, hun bi nei mumal lova hnathawk pawh kan awm ta nuk mai. Khawvel \hang zelah mi neih ang neiha rualpawl ve kan duh chuan a tul chin pawh a awm nameuh mai. A kum a telin kan buai telh telh emaw tih tur lah ni. Hetiang zel a nih chuan tun a\anga kum 10 a vei meuh chuah kan buai lehzual tawh ngeiin a rinawm. Chutih huna Kohhran leh khawtlang nun ngei pawh thlir thiam a har hle a ni. Keini Mizote pawh khawvel changkanna kawngah tunaiin hma kan sawn viau anga, khawvel tukverah pawh kan dak tam leh zual ngei ang. Chutihrual erawhchuan kan thlarau lam nun hian hma a sawn ve zel lovang tih a hlauhawm hle. Kohhran kalphung, khawtlang nun leh kan Zonun ze mawi ngei pawh hi loh theih loha kan thlak angai ang tih a hlauhawm hlel lo ve.

 

            Hetiang hi kan khawvel hman mek a nih avang leh tunlai changkanna hian a ken tel vang te pawh a ni mahna, hun engemaw lai a\ang tawh khan Kohhran inkhawm leh Kohhran programme tam kan tih thu sawi kan hre fo tawh thin. Hetiang lam thu sawitute hi a tlangpuiin kan mi fing leh thiamna kawngah pawh sang tak te an ni a, an thlirna a\ang chuan a dik thlap mai, pawm loh chi pawh va ni suh. Hmasawn tur leh hlawhtling tura beih nasat a ngaihzia te, chumi tur atana hun tam tak pek a ngaihzia te lah phat rual lohvin tlang hriat a ni. Chuvangin, Kohhranin Inkhawm leh programme dang pawimawh a lo siam te hi hun tam tak khawhralna leh min ti\huanawmptu a ngaihna lian tak a lo awm ta ni berin a lang. Chutihrualin, hun min petu ngaihdan erawh hriat a chakawm viau mai.

 

“Kohhran inkhawm hi a tam” kan ti maw! Nikhata darkar 24 kan neih a\ang hian Pathian tan darkar 2 vel (chu pawh nitin a ni hauh lo) hun kan pek avanga hlawhchham tur leh hmasawnna dal thei hial tura ngai kan awm niin a lang. Mizo te Central Service lama lut kan tlem tak zel chhana Kohhran Inkhawm leh khawtlang nun (a bikin chhiatni/\hatni) mawhpuh tawk lah bo lo. A nihna takah chuan kan mithiam hmasate hun lai hlei hlei khan Mizote hian Kohhran leh khawtlang rawngbawlna hi an ngaipawimawh zawk hial ang. Mahse, Central Service ah an inziak tling thei tlat. Chuvangin, hei hi chhuanlam tlinga pawm a harsa niin a lang. Hapta khat chhunga zan 3/4 vel chauh Kohhran inkhawm avanga thutlukna kan siam dawn a nih chuan kan thlir dan hi a bias deuh maithei. Keimahni tana hun kan mamawhna lam chauh thlir lovin, hun min petu thlir dan tur te pawh ngaihtuah tel ve ta ila a duhawm hle.

 

Nu leh pa an inkhawm fo avanga an faten nunkawng dik lo zawh phah hiala sawi te pawh kan hre fo tawh thin. Amaherawhchu, hei hi a chhan ber a ni em tih fiahna erawh tuman kan pe thei chuang lo. Kan hna leh eizawnna avangin kan fate hi nitin deuh thaw darkar 7/8 (a aia tam mah te pawh a ni ang) vel kan chhuahsan fova, chumai a ni lo, a thla a thla emaw a kum hial chhuahsan chang nei pawh kan awm bawk a. Chuvangin, kan chhuahsan avanga sual kawng zawh tur ni ta se inkhawm chhung chauh ni lo chance an ngah lutuk. Vanduaithlak taka sual kawng an lo zawh ta a nih pawhin Kohhran inkhawm leh programme pawimawh avanga darkar rei lo te kan chhuahsan vang a ni ber lo tih a rin theih awm e.

 

“Kohhran inkhawm hi a tam” kan ti maw! A nih chuan eng ang takin nge Kohhran Inkhawm hi kan ngaihpawimawh a, kum khat chhung hian vawi engzat chiah nge ka inkhawm/inkhawm loh \hin? Zir chianna nei lo mah ila, kum khat chhunga Kohhran inkhawm apianga inkhawm ziah thin hi Dan Zawhkim a\anga chhutin za zela sawmthum (30%) pawh kan tling lo maithei e. Kan rawngbawltu nghet Pastor leh Upate bak hi chu inkhawm apianga inkhawm ziah tura sawi ngam an tamin a rinawm loh. Chuvangin, khawvel chhiarkawp a\ang ringawta chhut mai lovin, Pathian \ih leh amah rawn chungin Kohhran Inkhawm tam leh tlem chungchang hi chu ngaihtuahna siam ila a duhawm hle a ni.