ARTICLE - I aw a hria

 I AW A HRIA

Pathian hnena kan tawngtaia kan beisei ang chhanna kan hmuh mai loh chang hian kan tawngtaina hian a hnen thleng pha lo leh awmze awm lo ang hiala ngaih mai thil awm thei a ni. Kan hlim leh lawm lai te, kan lungngaiha hrehawm nasa tak kan tuar lai pawh ni se, kan Pathian hian amah kan auhna aw hi a hre reng a ni. Kan Pathian hian a autu a zira aw hriat theih bik emaw hriat theih loh bik a neih a rinawm loh, mihring te hi min hre chiang em em a ni.

1. Zu leh ruihhlo i tih lai ngei pawhin i aw a hria: 

        “Nitina ka Bawnghnute in thin sawi lova vawi khat lek ka zu in an sawi duh viau si” tih fiamthu hi kan hre lar hle. A nihna takah chuan hei hi mihring rilru dik tak a ni. Miin thil tha tak tak an ti a, kan hriatpui tha duh lo fo, amaherawhchu, vawi khat a tisual a, ar chuk tui lo khawpin kan chhuah duh hial thin! Hetiang hi kan rilru put hmang a nih vang te pawh a ni mahna, mahni ngei pawh hi kan thil tha tih ve te hmangin kan indawm kung hlei thei lova, chutih laiin vawi khat kan dai sual palh avangin kan tlu leh hlauh thung thin a nih hi! Zu hmun, sa hmun atang chuan Pathian au eih thei lo a inngaihna lian tak kan nei duh hle, “Ka lo tisual ta sa sa a, chuvangin han tizel phawt mai teh ang,” ti niawm hrimin inlamleta siam tumna kan nei lo fo thin. Amaherawhchu, kan ruih lai ber pawhin kan Pathian hian min thlir reng a, a hnena kan inlamlet hun nghakin kan lamah a beng a dawh reng a ni tih i hre thar leh ang u. Chuvangin, zu leh ruihhlo ti thin i nih pawhin i chak lohna leh i harsatna kha Pathianin a hria a, au rawh i aw a hria a ni.

2. Mipat Hmeichhiatna suala i tluk lai pawhin i aw a hria: 

        Bible-a kan hmuh angin Pathianin a huat em em leh vanram chang lo tur list-a chuang pha hial chu nupa kar ni loa mipat hmeichhiatna hman khawloh hi a ni. Thil dik a ni lo tih hre reng chungin tisa chakna sualin min nawr nat em avangin he khurah hian tlak a awl em em a ni. A hun laiin nuam viau thin mah se, a hnua inchhirna leh rilru hrehawmna thlentu mai a ni thin. Puan hnuai thil ngang a nih avang hian hun rei tak midang hriat lohin thup theih a ni mahna. Amaherawhchu, englai pawha min hmu rengtu kan Pathian mit hmuhah chuan kan inthup thei lo tih pawh kan hai hauh lo. Kan mihring pui ten min hmuh loh vang te pawh a ni ang, mipat hmeichhiatna kawnga buan chaklo te hian sim an harsat riau ni te pawhin a lang. He kawnga lo dai sual palh tawh te hi inchhir lo an awm lo hial maithei a ni. Midang hriat lohin rilru hahna leh rilru hrehawmna tam tak an tuar ngei ang, Pathian beisei ngam lo hial khawpa thilsual ti a inngai pawh an awm tawh thin. Amaherawhchu, kan Pathian, mi khawngaih thei leh a duh loh ber sual pawh min hmangaih avanga ngaidam duh kan nei tlat hi kan vannei hle a ni. Chuvangin, midang hriat miah loha Mipat hmeichhiatna sual i lo ti a nih pawhin Pathian au rawh, i aw a hria a, sima a hnen i pan hun a lo nghak reng che a ni.

3. I hlep ruk lai pawhin i aw a hria: 

        Pathianin hlep rukna a duh lohzia Bible-ah hmun tam takah kan hmu. Israel ten chhiah khawntute an hmuh dan phei chu chhe tak a ni, an In-ah pawh Sakhaw puithiam leh rawngbawltute phei chu lut lo tur hialah an ngai a nih hmel. A chhan ber pawh mipui te sum hlep ru a an ngaih tlat vang a ni awm e. Tin, Thuthlung thar hunah pawh Priskili leh Akuila te nupa pawhin Tirhkohte hmaah an ram hralhna an hlep ruk then avangin an thi hial a ni tih kan hria. Chutiang khawpa sualna lian leh Pathian pawhin a duh loh thil chu hlep rukna hi a ni. Amaherawhchu, khawvela kan awm chhungin sum leh pai mamawhna a nasa em em a, a tel lovin kan khawsa thei lo a ni ber. Chu mai a ni lo, he sum leh pai hian zahawmna leh thil tih theihna a la keng tel zel lehnghal! Chuvangin, mahni thawh chhuah bak awhna avangin hlep ruk tur a awm chuan kan hlep ru leh mai thin niin a lang. Amaherawhchu, fak hla in, “Kut tling lo a sum ngah chuan, Lungngaihna a seng tel thin” a tih angin, Pathian duh loh zawng tak a nih avangin hlimna a pe chuang lova, mi tam tak chu an thil tihsual avangin an tap a, an rum mek bawk a nih hi. Mahse, beidawng suh, Chhiah khawntu pawh Lal Isuan amah zui turin a ko duh a, Pathian ram tan rawngbawltu tha tak leh thawh hlawk tak a ni thei a nih kha. Chuvangin, vawi tam tak i lo hlep ru tawh a ni mai thei e, sim la, Pathian au rawh, i aw a hria a nia.

4. Biak Ina kan Inkhawm theih loh lai pawhin i aw a hria: 

        Covid-19 hripui leng avangin March 22, 2020 atang tawh khan Biak Inah Pathian Biak Inkhawm kan nei thei tawh lo a ni a, hei vang hian kan thlarau lam nun pawh nasa takin a hnungtawlh hial tawh mai thei a ni. Mi thenkhatin “Inkhawm inkhawm pawh hi a ni ber lo” lo ti thin mah se, ringtute chu a huhova amah pawla, inchhem alh tawn tura Pathian min ruat kan nih avang hian Biak buk leh hmun dang chu a inang thei tak tak lo a ni. Amaherawhchu, khawi hmunah pawh awm ila, Pathian i au mawlh mawlh ang u, he hripui avang hian hun rei tak la inkhawm thei dawn lo mah ila kan Pathian hian amah kan auhna aw hi a hria a ni tih i hre thar leh ang u. Biak buka kan inkhawm theih loh lai hi Pathian kan auh natsat zual hun a ni.