SERMON - Pathian hnena inpuanna

 PATHIAN HNENA INPUANNA

(Thufingte 28:13 I Johana 1:8,9)

 

            Inpuanna chu Pathian duh dan angin kan nung lo tih pawmna a ni a, a thupek kan ngaihthah a, a laka kan thutiam kan bawhchhe thin tih inpawmna hi a ni a, kan thil tihsual hria a, inchhira Pathian hnena kan tluk luhna hi Pathian hnena inpuanna chu a ni. Kan Pathian hian kan sualna a hnena kan puan hi a ngaipawimawh hle a ni tih kan Bible-ah pawh hmun tam takah kan hmu a ni. Thuthlunghlui hun atang tawhin sual puang reng rengin hun tam tak an hmang thin. An sualna te ngaihdam an nih theihna atan ran thisen hmangin an inthawi thin a nih kha. Thuthlunghlui huna inthawina pawimawhzia chu sawi thui ngai lovin kan hre theuh awm e.

 

1.       Kan sualna puan hi Pathianin min phut tlat a ni:

             Mihring hmasa Evi leh Adma ten Pathian thuthlung an bawhchhia a, kha an bawhchhiatna kha Pathianin a hre chiang em em a ni. Amaherawhchu, anmahni ka ngeia an inpuan kha a phut tlat a, “Thing rah ei loh tur ka tih tlat che kha I ei ta a ni maw?” Genesis 3:11 tiin Pathian khan a zawt kher a nih kha. Mahse, Adama khan a tihsual kha puang mai lovin Evi a mawhchhiat ta tlat mai, chutiang bawkin Evi khan Rul a mawhchhiat ta bawk a nih kha. Mahni inthiamchawpna leh anmahni tihsual ngei a ni tih an pawm duh lohna thinlung tak kha Pathianin a duh lo a ni. Chuti ni lovin, “Lalpa, kan lo tisual a ni, khawngaih takin min ngaidam rawh” ti mai se, mihring te chunga Pathian thinurna kha a nep deuh mahna?

 

            Josua Bung 7 kan chhiar chuan Akana’n hluihlawn thil a lo lak avangin Israel fa ten khaw te tak te Ai khua an hneh lo a nih kha. Akana thilsual tih kah Pathianin a hre chiang khawp. Amaherawhchu, ama ka ngeia a inpuan kha a phut a, Josua hnenah thil tisualtu zawng chhuak turin thu a pe a nih kha. Tin, Tirhkohte thiltih Bung 5-na kan chhiar chuan Anania leh Saphiri ram hralhna hlepruk chungchangah kan Pathian hian an inpuan ngei a phut a ni tih kan hmu thei awm e. Tirhkohte 5:8-ah chuan “Tin Peteran a hnenah, ‘Min hrilh rawh, ram chu heti zat chauhvin maw in hralh?’ a ti a. Tin, a ni chuan, ‘aw heti zat chuah hian a ni’ a ti a. tih kan hmu a, hei hi Anania nupui Saphirin a chhanna a ni. Chumi hnuah chuan Saphiri pawh Tirhkoh Petera hmaah a thi ve nghal a nih kha.

 

            Chuvangin, engkim hretu Pathian hian kan tihsual leh bawhchhiatna zawng zawng te hi chiang takin hre vek mahse, kan tisual a ni tih inpawm a, a hnenah inchhira inpuang turin min beisei tlat a ni tih Bible atangin kan hmu a ni. Thil tam tak kan tisual thin, tuma hriat lohin Mipat hmeichhiatna sualah kan lo tlu palh emaw midang min hriatpui lem lohin Zu leh ruitheih thil kan lo khawih thin emaw kan lo hlepru in thil sual tam tak kan lo ti thin a ni maithei e, heng avangte hian kan Pathian chuan kan tihsual te inhria a, inpawm a, inchhira a hnena inpuanga sima hawisan turin min phut a ni tih i hre thar leh ang u.

 

2.       Pathian hnena inpuan chu inlamletna bul tanna a ni:

             Pathian hnena kan inpuan hian thil tisualtu ka ni tih min hriat chhuahtir a, chu chu kan chhandamna atan hian a pawimawh em em a ni. PCI Thurin VI-naah chuan, “Thlarau Thianghlim, Pa leh Fapa ata lo chhuak chuan mihringte chu chhandamna changtuah a siam a, an sualzia leh chungpikziate a hriat chiantîr a. Krista hriatna kawngah an rilru a tivâr a, an duhthlannate chawk thovin, Isua Krista chu an Lalpa leh chhandamtua pawm tûra ngênin, pawm thei tûrin a pui a, anmahniah felna rah chi tinrêng a thawk chhuak thîn” tih kan hmu a ni. Tin, sual nih inhriatna nun chu a chapo thei lo hrim hrim a, chu chuan inchhirna leh inlamletna a keng tel thin. Mihring hmaah a ni emaw Pathian hmaah a ni emaw inpuanna dik kan neih theihna chhan ber chu inlamletna thinlung kan neih vang a ni kan ti thei awm e. Chuvangin, kan tun hunah ngei pawh hian Pathian hmaa inpuanna tur leh kan tihsual avanga thuphachawina tur tam tak kan nei ang. Mahni inthiamchawp leh midang mawhpuh kual mai lovin, “Lalpa, ka tisual a ni, min ngaidam ang che” tiin a hnenah tlu lut mai ila, I Johana 1:8,9 a kan chhiar tak ang khan kan sualna te thupha kan chawi phawt chuan, kan sualte ngaidam tur leh kan fel lohna zawng zawng tlengfai tur hian kan Pathian hi a rinawm tawk a ni tih I hre thar le hang u.

 

            Chuvangin, kan tihsual tawh te chu a lian emaw a te emaw engpawh lo ni se, Pathian hnenah inpuangin thupha chawi ila, Anin min ngaidam ngei ang. Chu kan inpuanna leh thupha kan chawina a\ang chuan inlamletin a duhzawngin nun bul kan tan thei dawn a ni.

  

3.       Pathian hnena inpuan chu a zahngaihna dawnna a ni:

             Thufingte 28:13 kan chhiar tak ang khan, bawhchhiatna leh sualna zeptute chu an hmuingil ngai dawn lova, Zep lova inpuanga hawisantute erawh chuan Pathian zahngaihna an hmu dawn a ni. Bible-ah ngei pawh an bawhchhiatna an zep avanga chhiatna tawk ta pawh kan hmu. Inpuan hrim hrim kha Pathianin a beisei a ni ngawt lova, kha an thil tihsual sima hawisan duhna thinlung tak kha Pathianin a duh chu a ni. Chutiang thinlungpu te chungah chuan hmangaih Pathian hian a zahngaihna a lantir lo thei lo a ni zawk. Heti khawpa kan sual chung pawha sim duhna thinlung nena a lam kan hawi phawt chuan kan Pathian hian min ngaidam thei reng hi a mak tih loh rual a ni lo. Min hmangaih avanga kan chunga a thatna leh kan vanneihna hi kan hmuh thiam a hun tawh takzet a ni.

 

            Kan sualna pawm turin Pathianin min duh a. Chutihrualin, mahni inthiamlohna nun nei tur erawh chuan min duh hauh lo. Kan sualna atanga min chhuah zalen a, nun tak kan neih a duh a ni. Nun kawnga Pathian anna tura penna chu inpuannaah a intan thin a, Mithianghlim Augustine-a chuan “Thil tha lo tih puanna hi thil tha ti tura bul tanna a ni” a lo ti a ni.

 

            Thuhriltu 7:20-ah chuan “Thil tha titu, thil sual ti hauh lo khawpa mi fel chu lei chungah hian an awm lo takzet a ni” a ti. Mitin hian tlin lohna leh tihsual kan nei theuh a ni. Chuvangin, unau duhtak te u, i sual avang khan Pathianin mak a ti ngai lo che. Engkim a hre vek a, a hmangaih nep deuh theihna tur chein engmah i ti thei lo tih hria ang che. Chuvangin, a hnenah inpuang la, I sualna kha zep suh, chhuan lam siam lo la inpuang mai rawh, tichuan hmangaihna Pathian chuan I chungah a zahngaihna a lantir ngei ang.

 

            Pathian lakah engpawh kan lo tisual thei e, “min ngai dam thei tawh lo ang a,” tih tur khawpa sualna liam tham lo khawih thin pawh kan ni maithei, tin, kan tihsual avanga kan rilru leh taksa hial pawhin a tawrh phah hial khawp pawh kan awm thei bawk. Chutiang mi kan nih pawhin, Pathian hnenah simna thinlung nen inpuang ila, inlamletin ila, tichuan a zahngaihna kan hmu ngei ang. He kum tharah hian Lalpa tana thahnemngai taka rawngbawl turin bul I tan tha leh ang u.

 

Lalpan a thu malsawm rawh se. Amen