SERMON - Inpekna

 INPEKNA

(Rom 12:1&2, Matthaia 10:38)

 

            Inepkna han tih hian a pawnlawi deuh leh chhungril thuk tak thleng pawhin a huam thei awm e. Tun tum kan thupuiah erawh chuan rilru leh ngaihtuahna a duhna/inhlanna leh inpekna satliah mai ni lo, inpekna famkim, kan taksa ngei hlana kan zawng zawnga inpek pumhlumna lam hawi sawi kan tum dawn a ni.

 

1.         INPEKNA CHUAN CHAKNA LEH THILTIHTHEIHNA A KENG TEL: Mihring te hian kan thiltihna reng rengah hian kan inpekna thuk dan leh kan tih chhan a zirin nasa takin thil kan tithei in kan tithei lo a. Miin Sipaiah ram hmangaihna leh venhimna tak tak thinlung nen a inpek phawt chuan, chu chuan huaisenna pein ral hmaah pawh a inpek chhan angin, thih pawh hlau lovin a bei mai thin. Ram a hmangaih avanga thih hial pawh huama a inpekna chuan chakna leh thiltihtheihna nasa tak a pe a, hnehna a chang thin a ni. Amaherawhchu, sum leh pai, thuneihna leh lalna duhna avang maia Sipai a inpe tan chuan huaisen a har a rinawm. Thih thlenga a ram tana beih ngat phei chu a inpekna a nih miau loh avangin a ngam a rinawm loh a ni.

 

            Keiniho hi Pathian rawng kan bawla, a hnung kan zuina kawngah hian eng chen nge kan inpekna ni ve ta ang le? Eng nge a hnung kan zui a, a rawng kan bawl chhan? Mi thenkhat chu mite hmuh leh thlir dan a mawi leh tha ni a an hriat avanga inkhawm, hnatlang leh activity danga tel ve mai te pawh a awm theih awm e. Hetiang mi te hian Pathian tana an tih leh thawh ve thin te chuan rah tha a chhuah lo fovang. Tin, rawngbawltute zingah pawh hian nihna leh chanvo beisei ran a rawngbawl, awm ve riau a inhria a awm theih maithei e. Chutiang mi te chuan an beisei ang chanvo a chelh lo a nih chuan an inthlahdah fova, an phunnawiin an hel fo thin. Hetiang mi te hi Pathianin a hman theih tura inpe ni lovin, mawina leh ropui duhna avang chauha inpe an ni zawk mah awm e. Tin, kan rawngbawlnain awmze awm lo riau leh sawt lo riaua kan hriat thin te pawh hi Pathianin a duh ang taka a hman theih tura kan inpek thin loh vang te pawh a ni thei mai lawng maw? A tana kan zawng zawnga kan inpek phawt chuan Pathian hian chakna leh thiltihtheihna min pein kan rawngbawlna te pawh hian rah tha a chhuah ngei a rinawm a ni.

 

2.         INPEKNA CHUAN TLAWMNA A KENG TEL THIN:   Pathian tana inpe tak tak te chuan atana a tih leh an tawrhna te an chapopui ngai lova, an lo thil tih that tawh te mahni lam mawina beiseiin an tarlang fo ngai hek lo. An inpekna a thuk zawh poh leh Pathian tana an thathnem lohzia an inhre telh telh a, thawh tur tamzia an hmuh belh zel zawk thin. Pathian an faka an chawimawi nasat poh leh kan Pathian hian fak leh chawimawi a phu a ni tih an hre zual a, Pathian an hnaih zawh poh leh anmahni an te zel zawk thin. Chuting mi nunah chuan Pathianin hmun a chan len em avangin anmahnia chapona lo awm ve thin pawh a te rawih rawih zawk a ni.

 

Tin, rawngbawlnaah pawh hian a inpe hmasa apiang hi a tlawm thei leh a hniam zawkah an tang thiam zel zawk thin. Rawngbawlna chu Thingfanghma rah angin an tehkhin fo thin reng a. Thingfanghma rah pawh hi a rah hmasa apiang a hnuaiah an awm zel a, mi dang te ei theih turin a hmin hmaah tangin a lawh nuam turin a hnuai lamah an awm thin ang hian Pathian rawngbawltu dik tak te chu chutiang chuan an awm thin a ni. Tin, Rawngbawlna hi Lei Sipai leh Van Sipai ang te pawhin tehkhin ila a fiah viau awm e. Lei Sipai chu an tang rei telh telh a an Lal telh telh a, an bel pawh a tam telh telh thin. Van Sipai erawh chu, an tang rei telh telh a, an bel erawh a tlem telh telh thung, hun engemaw chen hnuah phei chuan engmah bel a bar pawh nei lovin an tlawm ral thak thin. Chutiang taka Pathian tana inpe te nunah chuan mi ten Pathian hmel an hmu a, anmahni atangin eitur a lo chhuak zawk thin a ni.

 

3.         INEPKNA KIMAH LAWM A KIM THIN:  Hla siamtu chuan “Inpekna kimah lawm a kim thin…” a lo ti a. Mahse, lawmna kim nei tur khawp hian inpek a lo har dawn hle mai. Tin, kan inpekna te pawh midang hriata tarlan loh kan hlau fo. Tin, Pathian tana inpe ve viaua kan inhriatna te, midang aia hah leh thawk nasa bik ni a kan inhriatna te hian lawmna aiin  vuivaihna min thlen fo zawk! Heng hi Pathian tana inpekna ni lovin mahni tana kan inpekna  a ni mahna. Chutiang nun kan neih chhung chuan kan inpekna hi a la kim lo a ni mai lo`ng maw? Kan zawng zawnga Pathian tana kan inpek phawt chuan kan lo titam deuh bik emaw, kan lo hah ta deuh bik emaw pawh ni se, chu chuan keimahniah lawmna min pe zawk tur a ni dawn lawm ni?

           

4.         KRAWS THLENG NGEIA INPEK A PAWIMAWH:  Hla siamtu chuan, “Simna tel lo pianthar a tawk love, Kraws thleng lova nun chan ten chhan dam an hlawh si lo” a ti. ‘Kraws thleng lo a nun chan/Kraws thleng lova inpek’ hi a lo awm theih ni ngei ang. Theihtawp chhuaha rawngbawl ni a kan inhriat te, kan inkhawm, hnatlanng, hla zir leh thildang dangah pawh thui tak leh hun rei tak kan lo ti ve tawh a ni maithei e. Tin, KTP ah pawh a hruaitute zingah telin hun rei tak rawng kan lo bawl tawh tawh pawh a ni thei. A pawimawh ta ber chu heng kan inpekna te hian Kraws a thleng em? Kan nun hi Krawsah chin ral a ni chiah em? Heng kan sawi tam tak hi Krawsa chinral loh te tan pawh thui tak a tih theih a sin. Juda Iskariotakan hria, Lal Isuan a zirtir 12 te zinga a thlan ngei, a rawngbawlna hrang hranga Amah zuitu leh rawngbawl tura a tirhchhuah ve ngei te zing a mi a ni. Mahse Juda Iskariota tawpna lungchhiatthlak tak kha I ngaihtuah ang u, a thihni thlenga Lal Isua zuitu khan chhandam a hlawh lo a nih hmel. Juda Iskariota ang deuh ringtu leh rawngbawltu a awm theih. Lal Isua zuitu ni a inhria, inkhawm, hnatlang leh activity danga tel ve thin, rawngbawlna chanvo pawimawh tak tak pawh chelh, keini KTP hruaitute zingah ngei pawh hian Juda Iskariota ang hi kan lo awm ve palh ang tih a hlauhawm hle. Keimahni leh Pathian inkar thlir ila, kan nun hi Kraws ah chinral a ni chiah em? He Lal Isua thihna Krawsah hian ka mihrinna hi khen beh a ni em tih i inchhut let ang u. Chumi a nih loh chuan heng kan inpekna zawng zawng te avang hian chhandam kan ni hauh lovang. Kan thil tha tih thin ni a kan hriat te, Kohhran leh KTP a kan chanvo chelh avang ngawt hian chhandam kan ni dawn lo. Chuvangin, heng kan inpekna hian Kraws a thlen ngei a ngai a ni.

 

TLANGKAWMNA:  A hnung kan zuia a rawng kan bawlna kawngah hian Inthawina nung leh thianghlim, Pathian lawmtlak ni turin kan taksa ngei hi a hman theih turin inhlan ila, chu chuan chakna leh thiltihtheihna min pe anga, kan inpek zawh poh leh keimahni zawk kan lawm zel ang. Kan inpekna avanga kan tihte chhuang lovin, Pathian tana inpek deuh deuh a tul zia hriain tlawm takin kan nung zawk ang. Chutiang taka Kraws thleng ngeia inpekna tak tak kan neih theihnan Lalpan a thu malsawm rawh se.