SERMON - Gilead Thinghnai Damdawi

 GILEAD THINGHNAI DAMDAWI

(Jeremia 8 : 19 - 22)

 

Gilead ram hi Jordan lui ral chhak lam tlang ram hming a ni a, hmun țhenkhatte chu hlobet hring hmun țha tak a ni a, a hmingthan chhan ber pakhat erawhchu thinghnai damdawi leh tidamtu (doctor) thiam te an ni. He ramah hian damdawi atana hman theih thlai a tam hle a, chung zinga pakhat storax hnai ațanga siam phei hi chu a hmingthang lehzual a ni. Thing hnai ațanga an siam damdawi hi hmanlai ațangin Aigupta leh Phoiniki ramah te an thawn chhuak țhin tih Bible-ah kan hmu. (Gen. 25; Ezek. 27 17).

 

Gilead ram hian Bible-ah hmun pawimawh tak a luah a. Josefa leitute kha Gilead ami rimtui leh thinghnai damdawi phura Aigupta-a hralh tum te an ni a (Gen. 37 : 25). Labana leh Jakoba inkara Thuthlung (Gen. 31 : 45 - 48) leh Jakoba leh Esauva te unau Jabok luia an in remna (Gen. 32 : 23) hmun a ni. Israel fate Philistia mite laka an bihrukna hmun a ni a (1Sam. 13:7). Absaloma hel țuma Davida raltlanna hmun a ni (2Sam. 17:24-26). Jetha, Israelte roreltu awmna hmun leh zawlnei Elija awmna hmun a ni.(1 Lal. 17 : 1).

 

Jeremia 8:19-22 kan chhiar kha Jeremia mangang au aw a ni kan ti thei awm e. Kha tih hun lai khan Israel fate sualna kha a nasa em em a, an chungah Pathian a lungawi lo a ni. Chu an sualna chu an sima an hawikir lo a nih chuan an chungah Pathianin hremna nasa tak a thlentir dawn a ni tih Jeremia hmangin a sawi a. An sim duh loh avangin Babulon lakah tlu chhiain kum 70 teh meuh salah an tang a nih kha. Kha tih hun laia Israel fate sualna leh bawhchhiatna te han thlir khan tunlaia kan ram dinhmun nen hian a inang thui hle mai. Mi thenkhatin kan sim loh chuan Zoram hian Pathian thinurna kan tawng baw dawn a ni, an lo tih thin pawh hi thil thleng thei a ni maithei e. A tlangpui han thlir zui ila.

 

1.       Hur sualna: Jeremia 3:2-ah chuan “Tlâng kawlh vul lamah i mitte len chho la en rawh, An mutpui lohna hmun che khawiah nge? Thlalêra Arabia mi ang maiin Anmahni nghâkin kawng sirahte i thu reng thin, i hurnate leh i suahsualnatein Ram chu i tibawlhhlawh zo ta.” tih kan hmu a, kan ram in a buaipui leh ram dangte lak atang pawha kan hmai balhna lian tak chu Mipat hmeichhiat hman khawloh avanga natna tha lo tak tak tam berna kan ni, tih hi a ni awm e. Kristian ram tih a tana mawi lo leh zahthlak tak a tling. Tumah lah hi kan zak tawh lo, Social Media-ah thleng thlengin a ngial a nganin kan inpho lang ngam tawh a nia. Kan ram khawpui leh khawpui daifem te han thlir ila, a hmutute tana zahthlak zawk khawpa khawsa ngam pawh kan tam ta hle mai. Heng te hian ram chu kan tibawlhhlawh zo ta a ni ber mai.

 

2.       Hlemhletna leh Duhamna sual: Jeremia 6:13 ah chuan “A te ber atangin a lian ber thleng pawhin, Mi tin, duhamnain an khat si a; zâwlneite leh puithiamte meuh pawh, Mi tin, hlemhle takin an che a ni” tih kan hmu. Kan ram sualna lian ber te zing a mi leh kan buaipui em em chu duhamna avanga midang chanai eirukna (Corruption) hi a ni. Kan sawrkar apiang mai eiruk buaiin kan buai a, a eiru thei zawng zawngin kan eiru ta emaw tih tur a ni. Chutiang khawp chuan Corruption hian kan ramah hian zung a kaih lian a ni. Bible-in a sawi ang mai hian hetiang zingah hian Kohhrana rawngbawltu pawimawh tak tak leh Kohhran Upa te hial pawh kan bang chuang lo a ni awm e. A zahthlakin Pathian pawi kan va khawih nasa dawn em. Jeremia 6:15- a “Thil tenawm an tih pawhin an zak êm ni? Hnai lo ve, an zak tawp lo va, an hmai pawh a sen hek lo:” a tih ang mai hian heng Corruption avanga mi hausa leh milianho te hi an zak map lo, nuam an tawl emaw tih tur a ni hial. Chutihlai mekin Kohhran leh Khawtlangah lah ni se dinhmun pawimawh leh zahawm tak takah kan la dah zui emaw ni, Pathianin engtin tak ngai ang maw?

 

3.       Pathian rawngbawlna tak tak hlamchhiahna: Jeremia 8:10,11 ah chuan “Zâwlnei atanga puithiam thleng pawhin Mi tinin bum an hmang si. Ka fanu, ka mite hliam chu ngaih sam takin, "A tha a lawm, a tha alawm" tiin an thawi a, A tha hauh si lo va” tiin. Hei hian zawlneite leh rawngbawltu ten tihtakzetin rawng an bawl lo a ni tih a tichiang viau awm e. Israel fate chanchin atang hian keini Kohhran hote pawh hi kan inenfiah duhawm hle. Kan rawngbawlna hian khawi chen nge a thlen tih te hi i ngaihtuah ang u. Keimahni leh keimahni hi kan inbuaipui tawk ta chauh ni te hian a hriat thin. Thlarau bo aiin kan Biak In leh bungrua te kan ngaipawimawh zawk ta em? A tha ber ber leh a changkang ber ber Pathian tan a that rual hian hengte hian kan bul maia sualin a hliam mek te hi min hliah ang tih a hlauhawm ta hle mai.

 

          Karkhatah tum nga kan inkhawm a (Kohhran Hmeichhia, KTP leh KPP nen phei chuan tum 8), Pathian thu kan zir, kan ngaithla awl lo a, mahse heng kan Pathian thu sawi leh ngaihthlak te hian kan hliam hi a tidam zo ta lo em ni le? Kohhrana rawngbawltu, KTP hruaitu leh Active Member tha tak tak te hi i inenlet ang u khai. Heng kan rawngbawlna te hian kan rawngbawlsaka te hliam a tuam dam zo lo a nih chuan keimahni ngei pawh hi tihdam ngai kan ni mai lawng maw?

 

4.       Gelead thinghnai damdawi Lal Isua: Thuthlung hluia Gilead thinghnai damdawi chu mihring taksa pengte damdawi atana hman a ni a, thlarau lama damna atan erawh a hman theih loh. Thuthlung Thar  Gilead thinghnai damdawi erawh chu boralte chhandamtu Isua Krista hi a ni. Zawlnei Isaia chuan "Ani chu kan bawhchhiatnate avangin hliamin a awm a, kan khawlohnate avangin vuak thitlinin a awm a, kan thununna tura thununna chu a chungah a tla a; a vuakna vualtea tihdamin kan awm ta," tiin a lo sawi lawk a. Natna nei te tan Gelead-a thing hnai damdawi kha damna atan an pan thin ang khan keini pawhin kan hliam leh na te tidam turin tidamtu Isua i pan ang u.

 

Jeremia’n “Gilead-ah thinghnai damdawi a awm lawm ni le? Chutah chuan tidamtu a awm na nge? Engati nge ka mite, ka fanu a hrisel theih loh?” tia lungngai taka a sawi ang mai hian “He kan ramah, Kohhranah, KTP-ah hian Lal Isua a awm lawm ni le? Chutah chuan tidamtu a awm na nge? Engati nge ka mite, ka fanu a hrisel theih loh” tih kan hlawh hlauh dah ange. Chuvangin, unau duh tak, kan damna, Krista hi pan ila, kan lungngaihna, manganna, thlaphanna leh kan buaina zawng zawng te min lo chhawkin min lo tidam dawn a ni. Tichuan, miten keimahniah tidamtu Isua hmel an lo hmu anga, tih damin an awm ve ang. Amah chu kan thlarau, kan taksa damna, kan Gilead Thinghnai Damdawi chu a ni e.

Lalpan a thu malsaawm rawh se. Amen