SERMON - I ram lo thleng rawh se

 I RAM LO THLENG RAWH SE

(Matthaia 6:10, Thupuan 12:10)

 

            Thuthlunghlui ata tawh Israel fate khan Pathian ram beiseina lian tak an lo nei tawh a, an beisei dan ang erawh chuan Pathian Lal ram a lo thleng lem lotih kan hre thei awm e. Mizo Kristian teah pawh Pathian ram beiseina hi tunhma atang tawhin kan nei nasa em em thin. Naktuk mai a Pathian lokal tura beisei tawk pawh kan awm a nih kha. Tun hun thlengin a bang lo, Kum sang rorel kan tih te, Zoram thar te pawh beiseia tuipui tawk kan la awm reng a nih hi. Mahse, Pathian ram lo thleng tura kan beisei dan ang hian a lo thleng kher angem tih sawi theih a ni awm love.

 

            Matthaia 6:10 Kan chhiarah khan “I ram” a tih hi KJV-ah chuan Kingdom tih a hmang a, chu chuan Pathian Lal ram sawina a kawk awm e. Kan inkhawm leh kan thil tihna hrang hrangah Lalbiakna hmang hian kan tawngtai awl lova. “I RAM LO THLENG RAWH SE….” kan tih hian “I ramah chuan I thu thuin an awm a, I duh zawng ang vekin I miten an ti thin ang hian keini pawhin I thu thua kan awm ang, I duh zawng chauh kan ti ang” kan tihna a ni awm e.

 

1.         Lal ram (Kingdom): 

           Mizote hi lal nei thin kan ni a, lalte lalzia leh an lal ram chhunga an thuzia kan hre awm e. Tin, Thuthlunghlui huna Israel lalte chanchin pawh Bible-ah kan hmu a. Heng lalte hian an lal ram chhunga an thuneihna pawh kan hre awm e. An lal ram chhungah chuan engkim mai kha lal thu thuin a awm thin, midang thuneitu dang inrawh a rem lo. Tin, an lal ram zauh tumin khua leh khua ram leh ram pawh an inrun fo thin reng a ni. Chutianga an va hneh te ram chu awpin an lal ram a lo ni ta zel a, an thuneihna hnuaiah kha ram kha a awm ta thin a ni. Tunlai hun thlengin lal ram zauh duhna pawh ala bang chuang lo, Russia chuan Ukrain a run a, heti khawp hian an indo a, khawvel a buai chu a ni ta ber mai, Indopui-III-na hial sawi rik a ni ta, eng nge thleng zel ang tih sawi theih a ni ta lo. Tin, kan thenawm Myanmar pawh sipaiin thuneihna pumhlum chan tumin a kum a kum an buai ta. Heng zawng zawng pawh hi a beituten Lal ram din an tumna vek a ni. Chu lal ramin a tum lian ber pawh thuneihna a ni kan ti thei awm e.

 

            Chuvangin, lal ram (Kingdom) a kawh lian ber chu lal thuneihna ram kan ti thei awm e. Pathian ram a thlennaah chu Pathian thuneihna a ni. “I ram lo thleng rawh se” kan tih chuan “thuneihna pumhlum lo chang rawh se” kan tihna tluk a ni.

 

2.         Pathian ram chu engtin nge a lo thlen?: 

          Luka 17:20 &21-ah chuan Pharisaiten Lal Isua hnenah Pathian ram lo thlen hun tur an zawh khan heti hian a chhang a, “Pathian ram chu hmuh theihin a lo thleng lo ve; ‘En teh u, heta hi!’ emaw, ‘Sawta saw!’ emaw an ti hek lo vang; ngai teh u, Pathian ram chu in zingah a awm a ni,” tiin a chhang a nih kha. Keini hian Pathian ram hi eng anga lo thleng turin nge kan beisei?

 

Luka 10 a 70 tirh chhuah chhungchangah khan “an khuaa damlo awmte pawh tidam ula, an hnenah, ‘Pathian ram in kiangah a thleng ta,’ ti ang che u.” a ti a nih kha. Pathian hminga dam lo te an tih dama, Pathian ropuina leh thiltihtheihna lo lang chu Lal Isuan “Pathian ram a thleng ta” a tih chu a ni. Chuvangin, keimahniah Pathian ropuina leh thil tihtheihna a lan hian Pathian ram chu kan hnenah a lothleng a ni kan ti thei awm e. Pathian ram a lo thlen hmun a piangah Pathian ropuina a lo lang thin a ni. Pathian ropuina a lo lan theihna atan chuan Pathianin thuneihna a chan pumhlumna a ngai a ni tih kan hriat a pawimawh awm e. Chuvangin, Keimahniah, Kohhranah, KTP-ah Chhungkua leh kan ramah Pathian ram a lo thlen theihna atan Pathianin thuneihna a chan a ngai a ni.

 

Thupuan12 thu kan chhiar chuan vanah indona awm ah Mikaela leh a vantirhkohte leh drakon leh a tirhkoh te indo thu kan hmu. Chu indonaah chuan Drakon (Rulpui tar, Diabola leh Setana an tih) te chu an chak tak loh avangin leiah paih thlak an ni ta a, chumi avang chuan Thupuan12:10-ah chuan, ‘Tin, vanah chuan aw ring takin, “Tunah chuan kan Pathian chhandamna leh thiltihtheihna leh ram chu a lo thleng ta, Krista thuneihna nen; kan unaute hektu, kan Pathian hmaa achhun azana hek thintu chu an paih thla ta si a.’ tih kan hmu a ni. Chuvangin, Setana leh a tirhkohte an tlawmna hmunah ‘Pathian ram a lo thleng ta’ an tih ang khan, he kan hmelma Setana hnathawh kan hnehna hmun apiangah Pathian ram chu a lo thleng thin a ni. Zu leh ruihtheih thil tih chakna leh remchang a lo awm a Pathian hminga kan tih loh zelna nunah khan Pathian ram a lo thleng thin a. Mipat hmeichhiatna kawngah pawh chetsualna remchang tak a lo awm pawha Pathian hminga a kan invawn thianghlimna nunah khan Pathian ram a lo thleng thin a. Corrupt theihna hmuna kan awm laia Pathian hminga kan Corrupt loh ngam zelna nunah khan Pathian ram a lo thleng thin a ni.     

 

3.         I ram lo thleng rawh se – Mimal nunah:   

          “its my life” kan tihna khawvelah hian ‘ka nunah hian I ram lo thleng rawh se’ tih hi ava harsa tawh tak em. A bikin tunlai thangthar te hian an nuna midang inrawlh hi an ngai thei lo em em a, sawisel phei chu an duh lo lehzual. “Ka nun a nia I lo sawi tur a awm lo, ka duh dan danin ka awm ang” an ti tawh mai a ni. Nun kan neih chhan te, kan nunna min petu lam hriatnaah hian kan pachhe sawt hle mai. A pawi takzet a ni. Hetiang mite nunah hian Pathian ram a thleng ngai lovang tih chiang takin a hriat theih a ni.

 

            Keini ringtute pawh hi I han in enfiah teh ang u, Rawngbawltu, KTP hruaitu, KTP active Member leh ringtu tha intite nunah hian engvangin nge miten Pathain hmel an hmuh loh thin? Keimahni nunah hian Pathian ram hi a lo thleng ngai reng reng lo a ni lo maw? Hla siamtu chuan- “Aw ringtu, tunge hruai thin che? I nunah tunge lal ber le? a tih ang khan, ka nun hi tunge kaihruai thin a, tunge ka nunah hian lal ber le? Sum leh pai leh ropuina te, damchhung khawsak buainate hian kan nun a kaihruai nasa ta hle mai. Sum kan hmuhna tur a nih chuan Pathian rawng kan bawl hman lo fo a, kan hna leh eizawnna avangin Pathian biak Inkhawm hman lo pawh kan pung chho zel niin a lang. Engkimah hian keimahni tana inhaivurna hian a hmasa zawk a chang chho ta char char mek a ni! Kan hun awlah chauh Pathian biak kan tum ta a ni ta ber mai. Chuvangin, kan nunah hian Pathian aia dah pawimawh zawk leh thuneihna lian zawk neitu a awm thin vangin Pathian ram a lo thleng thei thin lo a ni.

 

Tin, Thalaite ngat phei hi chuan Pathian aia dah pawimawh zawk hi kan va ngah lehzual em! Pathian aia kan nuna thuneitu kan nei fo lawng maw? Eg. Kan ngaihzawng te, kan nupui te, kan thianho thil tih te, huau huau leh hlimhlawp bawlna lam programme etc. Hengte hi Pathian aia kan dah pawimawh fo chuan ka nunah hian Pathian ram a lo thleng lo fo ang. Chuvangin, kan nunah Pathian lal ber se, kan nun kaihruaitu ber atan Pathian I hmang ila, chutiang chuan I ram lo thleng rawh se tiin Pathian I au ang u.      

 

            KTP ten kan rawngbawlna huang chhungah ngei pawh Pathian ropuina aiin keimahni programme leh thil neih (Property) ropuina te kan dah pawimawh zawk ang tih a hlauhawm thin. Tin, sum hi kan rawngbawlna atana pawimawh berte zing a mi ni mahse, Pathian aia kan dah hmasak zawk a hlauhawm hle. Engkimah Pathian kan dah hmasak zel loh chuan KTP-ah, Kohhranah, Pathian ram hi a lo thleng lo fovang. Kohhranho te inenfiah kan ngai a nih chuan I inenfiah ngam ang u. Kan rawngbawlna reng rengah Pathian hmasa ber se, Pathian thu ngaipawimawh ber zel ila, tichuan, Kohhranhoah hian Pathian ram a lo thleng zel dawn a ni.

 

            Kan eizawnna leh kan ram din hmun ngeiah pawh hian Pathian ram hi lo thleng zel se a duhawm ngawt mai. Kan ram thanmawh bawk chu Corruption a ni. Hman atangin tun thlengin a bang thei lo, sum leh ropuina duh avangin midang chan ai ngei pawh kan eiru zel duh a. Din hmun sang leh hausa zawk an nih avangin Kohhran leh Khawtlangah zah an kai zaw mah lehnghal. “Kan pa, van ami, I hming zahawm rawh se, I ram lo thleng rawh se…” tia tawngtai thin te vek kan ni. Mahse, heng kan eizawnna dawhkanah te ram rorelna dawhkanah te hian Pathian ram ataka a lo thlen hi kan phal thin lo. Chutiang mite chuan Zu leh ruihhlo ngai te kan vei a, kan ram sualna nasat tawh zia tiin an pualin Camping kan nei awl lova, rei kan daih lo fo thin. A aia sualna nep chuang hauh lo Corruption te pualin Camping han nei ve dawn ila, tumah lut tur kan hmu hauh si lovang. Hetiang vel hi kan rama Kristiante nun dan a nih avangin ruihhlo ngai kan tih kan vei em em te pawhin min ngaisang lova, kan aia an sualna bik pawh an hre hek lo. Kristian ram ni si kha kan ram hi chenna tlak lohah kan chhuah lek lek tawh a ni. Kan ram damna tur kan zawnga, Term tharah kan ti, Zoram thar kan ti, nimahsela, heng hi kan ram damna tak tak tur a ni lo. Kan eizawnna dawhkanah te, kan ram rorelna dawhkanah te hian Pathian ram lo thleng se, Pathian lalber se, Pathian hian thuneihna chang hmasa se kan ram a dam ang.

 

            Keimahni, KTP leh Kohhranah, kan chhungkuaah, kan khawtlangah, kan eizawnnaah, kan ramah Pathian ram lo thleng rawh se.. 

                Lalpan a thu malsawm rawh se. Amen