SERMON - Midang tana malsawmna nih

MIDANG TANA MALSAWMNA NIH 

                                                                (Genesis 12:1-3)

 

Kan hriat angin kumin 2022 a kan Branch Kumpuan chu ‘Midang tana malsawmna nih’ a nih kha. Kan kumpuan Bible chang innghahna atang hian Midang tana malsawmna kan nih theih dan tur zirho kan tum dawn a ni.

 

Genesis Bung 12 thu kan chhiar chhoh hian Pathianin Abrama a koh thu kan hmu a, a thawnthu pawh kan hriat lar tak a ni. Pathianin Abrama a kova, “ram ka la entir tur che lamah kal rawh” a tih khan Kanaan ram panin an chhuak a ni tih thu hi kan by heard viau. Amaherawhchu, Abrama tan hian chuti maia Pathian thu zawm chu thil awlsam tak a ni lovang tih a rin theih. Hetiang hian han sawi ila.

 

1.         I khaw lam ata: 

        Mahni khua chhuahsan hi thil awmsam a ni hauh lo. Kumkhua atan pawh ni lo, hun engemaw chen mahni khua kan chhuahsan tur pawh kan hreh viau thin a ni a. Tin, mahni khua pemsan ngat phei chu thil harsa tak a ni. Kan eizawnna leh hna avangin loh theih lohnain min nang a, chuvangin kan pem mai chauh a ni ber mai, chu pawh chu a harsa a ni.

 

            Tin, Sawrkar hnathawk tam tak te hi kan hnaah sawn (transfer) kan nih chang pawh hian kal duh lo, mahni hna thawhna hmuna awm lo peih loh/duh loh avanga ‘Aikal’ lak te pawh a lar thin viau kha. Chutiang khawp chuan kan khua hi chhuahsan kan harsat a nia. Aizawl a awm te tan thingtlang leh hmun hla zawka insawn loh dan mawlh kan ngaihtuah a, NGO hruaitu nihna behchhana sawn chhuah theih loh te kan awm ta niin alang, chumi avang chuan a chuha an chuh ngai loh YMA hruaitu dinhmun chuh ta hial pawh kan awm a ni awm e. Tin, Kohhrana rawngbawltute zingah ngei pawh mawi leh mawi lo thlu lova posting a buai kan awm nia sawi te pawh a awm. Hei hian mahni khua chhuahsan a harsatzia a tichiang viau awm e. Chuvangin, Abrama tan pawh hian an khua chhuahsan kha thil awlsam a ni hauh lovang tih a hriat theih. Mahse, Pathian thu awihin, midang tana malsawmna ni turin a chhuahsan a ni.

 

            Awle, heti hian han sawi ila, keini pawh kan khua chu enge ni ta? He khawvel hi a n ikan ti thei awm e. He khawvel Setana lalna ram, sual leh thim thuneihna ram atanga midangte tana malsawmna ni turin Pathianin chhuak turin min ko a ni. Abrama pawh kha an khua kha chhuahsan lo se chuan midang leh a thlah zel te tan malsawmna a nih a rinawm loh. Chutiang bawkin keini pawh kan khua he Setana lalna ram khawvel atang hian kan chhuak a nih loh chuan midang tan malsawmna kan ni thei tak tak ngai lovang tih a rin theih awm e. Chuvangin, harsa thin mah se, midang tana malsawmna kan nih theihnan he setana lalna ram atang hian i chhuak ang u.

 

2.         I laichinteho zing ata: 

            Abrama tan hian a laichinte chhuahsan hi thil harsa tak a nih a rinawm. Unau pathum an ni a, a unaupa Harana hian a boralsan tawh nghe nghe, tin fa u a ni a, Juda hnama fa u te pawimawhna kan hre awm e, roluahtu an ni a, an chhungkaw tan engkima engkim an ni ringawt. Chutihlaia, a kalna tur hmun pawh hriat loha han kalsan daih mai chu thil harsa tak a ni ngei ang. Keini pawh han in en ila, kan u leh nau leh chhungkuate engtikah nge kan inhmuh leh ang tih pawh hriat loh laia kalsan chu aharsa kan ti ngawtin a rinawm. Eizawnna avang te zirna avang te pawhin kum engemaw chhung lek atana lo kalsan/awm bosan tawh kan awm nual ang, chutiang atan lek pawh chuan harsa kan ti a, kan lung te lam lam a leng lawkin kan lungngai thin a nih kha. Abrama erawhchu, a laichinte chhuahsan hlen turin Pathianin a ko mauh mai, Pathian thuthlung a hlawhtlinna atan chuan a kalsan a ngai si. Harsa ti takin Midang tana malsawmna a nih theihnan a kalsan a rinawm a ni.

 

            Keini pawh tute nge kan laichinte chu ni ta le? He khawvel kan chenpui thin te, thilsual kan lo tihpui thin te, zu kan lo inpui thin te, damdawi kan lo tihpui thin te kha kan laichin te chu an ni kan tithei awm e. Sual kawng lo zawh tawh, tihsual lo nei tawh theuh kan ni ang, chutianga kan lo tihpui thin leh kan sangawizawnpui te chu thlah an har ngawt in a rinawm. Mahse, midang tana malsawmna kan nih theihna tur atan chuan khang kan khawvel thian te, kan laichin te kha kalsan turin Pathianin min ko a ni. Chuvangin, midangte tana malsawmna kan nih theihnan kan khawvel laichinte zing ata kan chhuah a ngai a ni.

 

3.         I pa in ata: 

            Heng kan sawiho zawng zawng aia harsa ber tur chu ‘pa’ in ata chhuah hi a ni awm e. Abrama te chhungkaw din hmun leh chhungkuaa a din hmun pawimawhzia kan hria a, atan ngat phei chuan apa in chhuahsan a, hmun hla taka han pem daih mai chu a harsa lehzual ngawtin a rinawm. Bible hian a ziak lang lo nain apa in meuh chhuahsan tur hi chuan an chhungkua atang pawh hian dodalna nasa tak a tawk ve maithei e. Khawi nge a pan dawn a, eng angin nge ava khawsak dawn tih pawh hriat lawk ni miah loh lai kara “kohna ka dawng e” tih avang a apa in han chhuahsan mai tur chu apa (milem be thin) ngat tan phei chuan awih a harin rem a tihpui mai a rinawm loh hial zawk a ni. Chutiang chuan harsatna hrang hrang leh dodalna karah Abrama’n apa in a chhuahsan tur chu han mitthla ila, atan Pathian kohna rin zawh a har tur zia pawh kan hriatpui ngei a rinawm.

 

            Keini pawh hian pa te in meuh han chhuahsan chu harsa kan ti a nih hi. Nula ten khawvela an duh ber pasala nei tura apa in an chhuahsan dawn meuh pawhin an mittui atla chawk thin a nih hi. Mahse, pasal nei a, a duh ber nena kumkhuaa awm dun tur chuan apa in a chhuahsan  ngei a ngai si. Chuchuan pa te in chhuahsan a harsat turzia a tilang chiang viau awm e. 

 

            Heti hian han sawi leh tai la. Tunge kan pa chu ni ta? Lal Isuan Joh 8:44 ah chuan “Nangni zawng in pa Diabola atanga chhuak in ni….” a ti a nih kha. Chuvangin, Abrama’n midang te tana malsawmna ni turin harsa mahse apa in chhuahsan a ngai ang khan keini pawh midang te tana malsawmna kan nih theihnan kan pa (Diabola) in ata kan chhuah a ngai a ni. Setana hian hei hi a hlauh ber a ni. Amah kan chhuahsan loh dan mawlh a zawng thin a, amah kan chhuahsan lohna a nih chuan a hnen atanga Pathian rawng kan bawl pawh a phal a ni. Kan Pa (Diabola) in chhuahsan lo hian thui tak rawng a bawl theih a, KTP OB, KTP Committee Member, Group OB, Group Committee Member leh active member a nih theih. Chutiang mi kan nih chuan kan rawngbawlna te hian awmzia a nei lo fo ang a, kan rawngbawlna a nung lo fovang. Chuvangin, Midang te tana malsawmna ni tur chuan heng KTP leh Kohhrana kan chanvo te hi a tawk lova, a pawimawh ber chu kan pa (Diaboal) hnen atanga kan chhuah hi a ni.

 

            Abrama chu a thlahte leh midangte tana malsawmna a nih theihnan a khaw lam ata leh a laichinteho zing ata leh apa in ata a chhuak ang khan keini pawh Midangte tana malsawmna kan nih theihnan he khawvel thilte, he khawvel nawmsipbawlna atang leh an chunga thu neitu Diabola hnen atang hian chhuak i chhuak ang u. Tichuan, kan tih chin apiangah, rawng kan bawlnaah leh midangte nena kan nunhona kawng hrang hrangah “Midangte tan malsawmna” kan ni ngei ang.

Lalpan a thu malsawm rawh se.