Article - RAWNGBAWLNA HLEN

RAWNGBAWLNA HLEN

Pathian hruaina leh awmpuinain kum 2017 kan lo thleng leh ta reng mai. Kohhrana rawngbawlna peng hrang hrangah pawh chanvo thar kan han chelh leh ta sap sap a, a lawmawmin a ropui takzet a ni. Heng chanvo kan kova nghah tak te hi eng angin nge kan dawnsawn hlawm ang le tiin ngaihtuahnaah a awm fo thin. Thenkhat chu kum tam tak kan lo chelh tawh chanvo chelh chhunzawm tur te kan nih laiin, thenkhat te erawh chu chanvo kan la chelh ngai reng reng loh, kumin atanga chelh tan tur te pawh kan ni bawk awm e. Engpawhnise, kumin atan chuan rawngbawlna chanvo thar a ni vek a ni. Kumthar a a ni bawk a rawngbawlna chungchangah hian thlirna thenkhat han tarlang ve i la.

1.         Ngaia neih: Mi thenkhat chu Pathian rawngbawlna kawngah hian senior hi kan inti hma khawp mai. Pathian khawngaihna avangin hun eng emaw chen Pathian rawng kan lo bawl tawh a ni thei e; a lawmawm takzet a ni. Chutihrual erawh chuan, rawng kan lo bawl rei tawh avanga ngaia neih emaw palzam leh ngaihthah chi a ni lo tih kan hre theuh awm e. A nihna takah chuan, rawngbawl rei kan intih viau tawh lai hian Pathian rawng kan bawl chhung aiin kan bawl loh chhung hi a rei zawk mah a nia! A tihdan phung kan lo tih thin leh thiam tawhsa deuh tawh a nih avanga ngaihsam taka pal liam ve mai mai hi thil awm theih a ni. Chutiang mi, rawngbawltu kan lo awm a nih chuan midang thlarau nun chawm lo rawngbawltu an lo tih thin kha kan ni ngei ang. Chuvangin, kumina kan rawngbawlna chanvo chelh te hi kan lo tih thin tawh leh experience sa tam tak awm mahse; Pathian hnena inhlan thara, Pathian rawn chunga a tha thei ang bera hlen kan tum a duhawm hle a ni.

2.         Mahni insitna thalo:  Pathian rawng bawl tur hian tumah tling tawk emaw tha tawk emaw inti kan awm a rinawm loh, kan lo awm a nih pawhin tam kan awmlo ang. Mahni lam kan inthlir a, “kei ve mai hian hetiang chanvo pawimawh te chu ka tlin ve dawn emaw ni le?” tia tithei lo tur leh tlinglo bik lutuka inngaih hi thil awm thei a ni. Chutiang rilru put tlat chu mahni insitna thalo? A ni ve thei a ni! Amaherawhchu, hei hi kan hriatreng atan a duhawm hle; “tumah hi fel leh tlin bik vanga Pathian rawngbawl an awm lo” tih hi. A rawngbawl tur hian mi tlinglo leh chaklo tak tak te, khawngaihna avangin, hriatthiamna nen min thawhtir a, chutah Amah rinchhana theihtawp chhuaha inpe te chu a pui thin zawk a lo ni! Chuvangin, khawngaih rawngbawlhna a ni tih hria a; Pathian rinchhan chungin, theihtawp a kan rawngbawlna kan hlen hi a duhawm hle a ni.

3.         Ti tha duh si lo, Pha duh chuang si lo: Kan Kohhran kalphungah hian rawngbawlna chanvo atanga inchawlhtir/awltir hi kan hreh viau thin mai a, lohtheihloh leh a chhan tha tak, rawngbawlna chanvo chelh chhunzawm remchanglo te a nih loh chuan kan inawl khat viau a ni. Chutihrual erawh chuan, insiamrem leh a tul anga chanvo hrang hrang inpek erawh kan tihdan phung pangngai a ni awm e. Amaherawhchu, rawngbawltu inchawlhtir kan hreh lutuk hi kan Kohhran sawisep kan kaina pakhat pawh niin a lang ve bawk a. Rawngbawlna chanvo pawimawh tak taka kan ruat te zingah hian, “a pha si lova” tih avanga ruat nawn leh mai ang te hi kan awm fur ta lo maw? Hetiang ang kan awm a nih chuan Kohhran hmai tibaltu leh sawichhiatna zawngtute tan remchang kan siamsak a ni ngei ang le. Chuvangin, kan kalphung, kan lo tih thin dan pawh ni se, a tha zawk dawn a nih chuan i insiam danglam hreh lo ang u. Chu chuan nakin hun zel a tan pawh rah tha a chhuah zel ka ring tlat a ni. Engpawhnise, kan hruaitute pawhin Pathian rawn chungin a tha tur zawk an la rel zel turah ngai ang.

            Mahni lam theuh pawh han inenlet ila, “engvangin nge kei hi he chanvo chelh tur hian thlan leh ka nih?” kum hmasa lama ka lo chelh ve tawh avang leh ka phat lemloh loh avang zawk a ni mai angem? A rawng kan bawlsak atana thahnemngaihna tak tak nei lo leh, ti tha leh peih tak tak chuanglo tur ka nih ai chuan, he chanvo pawh hi ka phat ngam mai a tha zawk maithei a ni. Thenkhat tawngkam ni fo chu, “min thlangtu/ruattu te leh Pathian pawh a zahawm a lawm le, chuvangin phat ka tum lo” tih tawngkam hi a ni. Mahse, hetianga sawi ngei te zingah pawh hian ti tha leh duh tak tak chuang lo, kum chanve takngial pawh ti tha peihlo kan awm fur mai thin hi chu a pawi hle a ni. He thu hi eng rilru puin nge kan sawi ang aw ka ti thin. Khawngaih rawngbawlhna kan kova nghah te hi kan pawm a nih rau rau chuan; A duh anga hlen ngei turin theihtawp i chhuah ang u.

            Kan rawngbawlna theuh kan hlen hi rawngbawltuten kan tih ngei ngei tur a ni a, chu chu kan Pathian thu pawhin min phut tlat a ni. Mahni peih chin leh duh chian chauha thlahdah taka rawngbawl tur kan ni lo. Jeremia 48:10 ah chuan “Thlahdah taka Lalpa hna thawktu chu anchhedawngin awm sel la,..” tiin kan hmu a nih kha. Chuvangin, anchhedawng nih chu tumahin kan duh awm love. He kumthar duhawm tak lothlengah hian thahnemngai taka rawngbawl turin inhlan thar ila la, Pathianin a mite kaltlanga rawngbawlna chanvo hrang hrang min pek te hi A duh ang taka hlen turin theihtawp i chhuah ang u.