Sermon - KAN THATNA TURIN PATHIANIN REM A RUAT THIN?

KAN THATNA TURIN PATHIANIN REM A RUAT THIN?

(Sam 119:65-68, 71    Rom 8:28)

“Pathian thil rel dan chu, A va mak  em!

Hriat phak rual loh a ni, A tum zauzia;

Thil te ber pawh a veng, Van thil a rel kim e;

Pathian ruat ang zelin,

Engkim a thleng.”

          Mihringte hriat phak rual loh Pathian rorel dan hi ngaihtuah chian poh leh hriatthiam a har thin, engkim chunga roreltu leh engkima remruattu remruat dan hi hrethiam lo mah ila kan pawm thiam erawh tul si a ni. Ringtute tan chuan chu chu thil pawimawh tak leh ringtu nun tak kan neihna a ni ngei ang. Kawng tam tak sawi tur awm mahse Bible atanga kan hmuh tlem te chauh tarlang ila.

1.       VUIVAI LOVA PATHIAN REMRUATNA PAWM THIAM:

         

          Kan mihringpuite, kan chhungkua leh rawngbawlhonaah pawh hian vuivai duh tan chuan vuina tur tam tak a awm thin awm e. Tumah mifel sa kan awmlo nain theihtawp chhuaha inzira pumpelh theih erawh kan tum a duhawm hle a ni. ‘Samuela chu Pathian Jesaia fa te zing a mi Lal atan hriak thih turin a tir a nih kha, Samuela hian tunge hriak a thih dawn tih pawh hi a hre lawk bik lo a ni. Chutah le Jesaia chhungkaw ropuina Ni tur chu a lothleng dawn ta! Jesaia leh afapa te chu a tithianghlim a, Samuela chuan inthawinna hmunah chuan anni chu a ko ta a, Jesaia fapate chu Samuela hmaah chuan an inlan zel a, tichuan Jesaia chuan a fapate 7 chu Samuela bulah chuan a kaltir ta vek a, Samuela chuan Lalpan hengho hi a thlang lo a ni a ti a. Tin, Samuela chuan hetah hian I fate an kim vek em? a ti a, A ni chuan, A naupang ber a la awm a, ngaiteh a ni chuan Beram a veng a ni a ti a, chutah ani chu va kohtir tur chuan a ti a. Davida chu an va ko ta a, Tin. Lalpa chuan, “tho la hriak thih rawh hei ngei hi a ni e a ti a,” chutichuan Israel te lal atan Davida chu hriak a thih ta a ni.’

          Heti zawng hian ka ngaihtuah a, Jesaia chhungkaw ropuina Niah hian Davida, a fa tlum ber hi Jesaia hian a telh velo a nih chu, mihring lam taka thlir pawhin Davida tan hian ava han rilru nat thlak dawn em ka ti thin, A fapa te zawng zawng Israel ram lalber ni tura a interview tir lai hian Davida chu beram an ven tir a nih chu! Kei nita ila ka lawmlo viau in ka ring, thenkhat phei chu kan titau anga an koh pawh hian kan kal duh tawhlo hial lawng maw? Mahse Davida hi tu chungah mah a phun nawi lo nia! A chunga Pathian remruat lothleng chu lungawi takin phunnawi mih lovin a pawm mai zawk a ni. Chutiang ni lovin phunnawiin emaw tihtauhsan emaw nit a se, Israel lal atan hian hriak thih a ni kher dawn em ni?

          Keihiho hi chu kan phunchiarin kan vuivai hma hi ka ti thin, chhungkuaah/rawngbawlhnaah te chumai niloin atam zawk nula/tlangval kan la ni a, ngaihzawng kan neihna kawngah te pawh hian thil tamtak chu ka tawk ngei ang. “Enga ti bik nge kei hi le? Ngaihzawng neih kawngah hian ka tluan loh bik em em zel le? Pathian pawh hian hetiang tur reng hian min lo ruat bik em ni? Etc. etc” tiin tam tak chu kan indawm kun fo thin. Chumi avang chuan mawhpuh tur kan zawng a, mi tam tak chu vuivaiin Pathian kan dem fo thin. ‘Jakoba pawh kha Rakili a neihna tur kawngah khan a tluang lo ve khawp mai. A ngaihzawng Rakili a neih theihna atan a pu Labana rawng kha kum 7 tehmeuh a bawl a nih kha, chumi hnuah pawh a hmangaihloh zawk pekin a awm a, kum 7 dang a neih theihna atan khan a inhlawh leh a nih kha.’ Keini nita ila chu kan beidawng emaw kan thin hian a tuar tawh kher a ngem? A ni chauh hmeichhia/mipa an awm bik lo tiin kan thinrim mai lo ang maw? Mahse, Jakoba khan Pathian a dem kan hre lo, a chunga Pathian remruatna lo thleng kha thiam tak leh dawh thei takin a tuar hram hram a a tuar chhuak thei zawk a ni.

2.       PATHIAN MAWHCHHIAT LOH TUR:

          Kan chungah harsatna emaw dinhmun khirhkhan tak tak kan tawh chang a awm thin, chutiang hunah chuan mi tamtak ten Pathian hnena tluk luh leh Pathian rawn aiin kan chunga chutiang thleng avang chuan Pathian sawi chhe duh tawk kan awm thin. A pawi hle a ni. Kan chan leh kan chunga thleng hi fair lo ta bik riaua hriat chang pawh kan nei ang. Mihring lam atanga thlir chuan a dikna chen tam tak a awm a ni. Mahse, Pathianin kan thatna tur zawka a rem ruat leh kan thatna tura A kohna a ni thei tih erawh kan ngaihtuah tel fo a duhawm hle a ni.

          ‘Lal Davida nun atang bawk hian zir tur tam tak kan nei awm e. A fapa Absaloma’n thah a tum avangin Jerusalem atangin a ral tlan a nih kha, chutah Bahurim hmunah Saula chhungte zing ami Simeia’n Davida chu lungin a denga, chumai nilovin  anchhia a lawh bawrh bawrh a nih kha. Lal Davida chhiahhlawh, Abisaia chuan Lal Davida hnenah chuan, “Engati nge he ui thisawn hian lalpa ka pu chu anchhia a lawh mai mai? A lu ka va tan teh mai ang aw?” a ti a a nih kha. Nimahsela, Lal Davida in a chhanna tawngkam hi a mawi ka ti. “Lalpan a hnena, Davida anchhia lawh rawh” a tih si chuan lawh mai ang hmiang a ti mai a ni. A ropui ka ti, A chunga thil lothleng an diriamna leh anchhia an lawhna zawng zawngah tumah a mawhchhiat lo, Pathian remruat a ni tiin a pawm thiam vek zawk a ni.’ Keini pawh hi han inenchiang ila, miin min sawi chhiatna te, kan chanchin a dik emaw diklo emaw min lo sawi a nih pawhin lo thinrimpui vak vak a, ringtu tih atana mawilo thleng thlenga thinrimpui leh incha chhuah duhna rilrute paiha Pathianin tul a ti a ni ange tia mahni lam a kan pawm thiam zel zawk a duhawm hle, chu chu ringtu dik tak rilru put dan tur pawh a ni awm e.

          Tin, Joban Setana fiahna a tawh chungchangah pawh kan hre thei awm e. Kha tiang khawpa chhiatna nasa kha a tawk a, a fanu leh fapa te nat lawk pawh awm lovin an boral a, a ranrual leh a neih zawng zawng tihchhiata awmin Amah ngei pawh pan bawm khah vek in a awm a nih kha, khatiang dinhmun rapthlak leh hrehawma a awm lai leh a nupui ngei pawhin Pathian mawhchhiata sawichhe tura a tih pawh khan Pathian a mawhchhiat miah lo a nih kha Joba 1:21-ah kan hmu a ni. Khatiang khawp a chunga a thlen chung pawha Pathian sawichhiat aia ala fak thei zawk a nih chuan keini hi eng ang chhiatna leh harsatna nge kan lo tawh ve tawh le?

3.       HARSATNA KAN TAWH TE HI KAN THATNA TUR ZAWK A LO NI FO:

          Hringnunah hian harsatna leh chhiatna, hrehawmna leh lungngaihna kan tawk fova, heng te hi kan tana thatna tur zawk a ni tih hi pawm a harsa thin a ni. Tin, pawm mai ni lovin rin pawh a harsa khawp mai. Kan chhungten min boralsan a, chulai karah kan tana tha tur zawka Pathian remruat a ni ange tih hi a hunlai chuan kan pawm theilo, tun hun thleng pawh hian kan pawm hleithei lo chu a ni e. ‘Hmanni ah kan thian pakhat boral ta ralna hun kan hmang a, chuta a U thusawi rilrua la awm reng chu, “hetia ka nau boral ta mai hi hunlo kan tiin ka hrethiamlo hle mai a, Pathian remruat dan hi tunah rih chuan kan tana a thatna tur hi kan la hre rihlo a ni” a ti a a dik ka ti khawp mai. Tumah hian kan hrethiam kher awm love.’

          Tin, kan nunah hian chhiatna leh harsatna kan han sawi bak hi tam tak harsatna dang kan tawk fo awm e, dam thlakhlelh awmloh khawp a nuna harsatna tawk te, beidawnna thuk tak kan neih chang te, chhungkaw harsatna midang hriat lemloha kan tawrh fo chang te pawh a awm ngei ang. Chung zawng zawngah chuan Pathian hnenah tlu lut a, kan thatna tur atana Pathian remruat a ni ange tiin a hnen pan zel thei ila a duhawm hle mai. Mahse, mihringte hian chu chu harsa kan ti thin si a. Engpawhnise, kan hrethiam rih vek kherlo a nih pawhin Pathian remruat a ni e tia kan pawm thiam tawp a pawimawh hle a ni. Rom 8:28-a kan chhiar tak ang khan. Keini ringtute tan chuan a pawimawh hle a ni.

          Tehkhin thu pakhat han sawi ila, ‘Tumkhat chu Africa ramah khuan Lal leh a chhiahhlawh hi an ram chhuak a, an kalna kawng kha a hnim deuh avangin chhiahhlawh chuan chemin an kalna tur chu a sam fai pah zel a, nakin deuhah chuan chutia hnim a samna lamah chuan a pu kut tang pakhat chu a sat bung palh ta hlauh mai a, han tih vak ngaihna lah an hre bawk si lo, chutah chhiahhlawh chuan a pu hnenah chuan, “a kapu, Pathian remruat a ni ange, kan thatna tur loin Pathian hian rem a ruat ngailo a nia,” an ti ringawt a, mahse a pu chu a lawmlo hle mai a, tihngaihna dang awm hek lo, chutichuan an kal leh ta zel mai a. Thui ve tak an kal hnu chuan khuarkhurum pakhat hi an va thleng a, chutah lalpa chuan a chhiahhlawh chu a namthla ta daih mai a. Lalpa chuan “nachinah khan kan thatna tur loin Pathianin rem a ruat ngai lo kha I ti bawk a, tikhan awm rawh tiin a kalsan ta daih mai a.” Amaha thui tak a kal hnu chuan chu lalpa chu Hnam mawlho chuan an lo man ta hlauh mai a, tichuan an pathian hnena inthawina atan hlan an tum ta mai a. Mahse, an han enchianga a kut tang a lo kimlo tih an han hriat chuan an pathian hnena hlan atan chuan an duh leh ta lova, an chhuah leh ta ringawt a ni.

          Chutah lalpa chu a inngaihtuah leta, a chhiahhlawhpa chunga a thiltihte chu a inchhir ta em em mai a, chhanchhuak tur chuan khuarkhurum lam pan chuan a kal leh ta a, tichuan a chhiahhlawh chu ava chhanchhuak ta a, lalpa chuan a thil tawn te chu a sawi vek a, “ka kut tang hi min lo sah palh sak lo la chuan kei chu hnam mawlhoin an pathian hnenah min hlan daih tawh awm si a, ka thi daih tawh ngei ang” tiin ngaihdam a dil ta a, chutah a chhiahhlawhpa pawh chuan “ekhai ka pu, ngaihdam dil tur I ni bik hleinem, keipawh hi khuarkhurumah hian min namthla lo la chu kei, a taksa him zawk hi hnammawlho chuan an pathian hnenah min hlan zawng ngei dawn a sin, a hunlaia kan hriatthiam loh kha Pathianin kan thatna turin rem a lo ruat a ni tih tunah hian kan hrethiam chauh a nih hi” a ti a, tichuan inngaidam tawnin hlim takin an haw thei ta a ni.’

          Kan chunga lothleng tam tak te hi a hunlai chuan kan hrethiamlo fo thin. Mahse, heng zawng zawng hi kan tana tha tur zawka Pathian remruat a lo ni fo thin tih kan hriat a duhawm hle a ni. Sam ziaka kan chhiar tak kha, “tihhrehawma ka awm hma khan ka vakbo thin a; Tunah erawh chuan I thu ka zawm ta,….. I thuruatte ka zir theih nan tihhrehawma ka lo awm kha ka tan a tha a ni” tih ang khan heng lungngaihna leh harsatna kan tawhte, hrehawmna tam tak kan tawh te hi tawk lo ila chuan Lalpa kan Pathian hi kan vahbosan fo hian ka ring thin. Chuvangin, heng kan chunga lo thleng zawng zawngte hi kan thatna tura Pathian remruat a ni tiin pawm ngam ila Pathian hnenah I tlulut tlat zel ang u.

David Charles-a chu dawrkai a ni a, chu chu a eizawnna ber a ni, chutah chuan thahnemngai takin dawr a nghak thin a. Inrinni tumkhat chu chu a eizawnna neihchhun a dawr chu a kang chiam mai a, bungrua engmah chuh hmanloin a kang fai ta vek mai a ni. Mihring lam atanga thlir phei chuan a lungchhiatthlakin channa nasa tak a ni ngei ang le. Mahse, a tuk Pathianni a lo thlen chuan a hmaa kangmei rapthlak tak tuar lo ang mai chuan vengdangah Pathian thu hrilin a kal leh ta daih mai a ni. “Hetah lo thiat mah se, Hmun dangah a din thar; Pathian ram din tur hi, A tum a ni.” Tiin hlain a phuah ta a ni. He a hlaphuah atang pawh hian a chunga vanduaina leh harsatna a tawh hi a tawrh thiam zia leh Pathiana a innghah ngam zia kan hre thei awm e.

Lalpan a thu malsawm rawh se. Amen