Sermon - NANGMAHAH CHUAN I MITE AN HLIM THEIHNAN MIN TIHARH THAR LEH DAWN LAWM NI?

NANGMAHAH CHUAN I MITE AN HLIM THEIHNAN MIN TIHARH THAR LEH DAWN LAWM NI? (Sam 85:6)

Sam 85:1-6

            Tunlaiin Zoramah Pathian hnathawh thlengin hartharna a thleng mek a, mi tam tak ten chu harhna chu chan beiseiin Kelkang lamah ka kal sup sup mai a, thenkhat ten nunthar neiin hlim takin an lo haw a. Thenkhat engmah ni chuang lem lo pawh an awm bawk awm e. thenkhatin an faka, thenkhat erawhin Kelkangah kher lo pawh Pathian a pawl theih tiin an sawi ve mek bawk a. Kelkangah Pathian a inpuanga, mi tamtak ten chu harhna chu an chang a nih chuan kan lo sawisel teh chiam a tul ber awm love. Chulam chu kan chhui zui tawh lo mai anga, tun tumah hi chuan eng kawngah hian nge harhtharna kan mamawh? Tih lam hawiin Pathian thu kan ngaithla dawn a ni. Kawng hrang hrangin Sermon tam tak a awm thei awm e. Amaherawhchu, kawng thenkhat chauh han luhchilh bik ta i la.

1) Pathian thuah harhtharna kan mamawh: Ringtu, Pathian thuawih inti te (a bikin Zoram kristiante han ti bik ta I la) hi Pathian thuah kan sang kan ti thin a, hriat pawh kan hre tam viau awm e. Chutihruala tunlaia kan harsatna lian tak ni a lang chu heihi niin ka hria. Khawvel hmasawnna lo sang zelah kan thiamna leh finna pawh a lo sang ve zel a, chung kan thiamna leh finna te hmanga Pathian thu kaihhruai kan tum fo thin hi a ni. Pathian thuin engtin nge a tih tih aiin, ka ngaihdan chuan chutiang tur chu a ni,,, tunlaiah chutiang/khatiangin an ti tawh ngailo ti kana wm teuh ta mai (Pathian hian Bible aiin kan ngaihdan hi a pawm zawk a rinawmloh) Entirnan… Khawvel tawp rorel thuah te pawh hian han sawi I la, Bibleah hian hmun tam takah khawvel tawp dan tur te, Lal Isua rorel turin a local leh dawn a ni tih thu chiang takin kan hmu a ni. Amaherawhchu, ringtu intite zingah ngei pawh hian “kei chu ka ngaihdan chuan khawvel tawp hun hi a awm tak tak pawh ka ring lo, kan thih hun hi khawvel tawp hun chu a nimai” ti a sawi tam tak kan a wm a ni. Mahse, kan mihring ngaihdan ve mai a ni. Pathian thuin chiang takin min hrilh a, a thuawihtute chuan chu chu kan pawm mai tur a ni. Chutiang zelin kan rawngbawlna kawng hrang hrangah pawh hian, Pathian thuin engtin nge a tih tih aiin kan ngaihdanin rawng kan bawl nasa thei viau awm e.

Matthaia 10:37 ah chuan, “Tupawh a nu emaw a pa emaw keimah aia hmangaih zawk chu ka mi ni tlak a ni lo, tupawh a fanu emaw a fapa emaw keimah aia hmangaih zawk chu ka mi nitlak a ni lo” a ti a, kan bial nu/bialpa te phei chu a lang pha lo hrim hrim. Amaherawhchu, Pathian ai hian heng te hi kan hmangaihin kan dah pawimawh hmasa zawk fova, mahni inthiamna tur khawi lai lai a mi emaw kan dap a ngai fo thin a ni hi.

A rawng kan bawlna kawngah pawh hian han sawi ta zel ila, pathian chuan kan theih tawk bak min phut hlei nem kan ti thlarawk a, mahse kan theih tawk kan tih hi han chhut chiang ila chu kan zawng zawng chu a ni lo deuh thin lo maw,, kan theih tawwk a a rawng kan bawl a tul fo thin a ni. Chuvangin, mahni peih chin leh rilrem zawnga Pathian rawngbawlna kalpui lovin Pathian thu hian min kalpui zawk se ava duhawm em. Rawngbawlna chanvo duh ve si mahse titha peih chuang silo, pha duh bawk silo a awm theih awm e. Jeremia 48:10 ah chuan, “Thlahdah taka Lalpa hnathawktu chu anchhedawngin awm sela” tih kan hmu, zaninah hian keimahni theuh han inen tai la, kan rawngbawlna chanvo erawh a in ang lovang, engkawng emaw tal chuan Pathian rawng kan bawk vek awm e. Chung kan rawngbawlna hrang hrangah chuan keimahni duh chin leh peih chin chauha rawngbawl thin, rawngbawltu inthlahdah tak kan ni em?  Kan inngaihtuah chian a pawimawh hle awm e. Heng khawngaih rawngbawlhna kan thawh mek te hi kan tit ha peih dawn lo a nih ai chuan phat ngam mai tur, anchhedawng nih ai chuan a thlanawm tho tho a ni. Chuvangin, kan ringtu nun leh rawngbawlna kawng hrang hrangah hian kan ngaihdan leh peih chin aiin Pathian thuin engtin nge a tih? Tih hian kan inenfiah fo a tul awm e. Chuvangin, tuna kan dinhmun mek thlir hian Pathian thu takah hian harhtharna kan mamawh takzet a ni.

2) Pathian fak leh chawimawi kawngah harhtharna kan mamawh: Tun tumah hian Pathian fak leh chawimawi a zai leh lam chungchang han sawi bik ta I la:

a) Zai :   Pathian faka zai chungchang hi vawi tam tak kan sawi tawh thin, thenkhat tan chuan a ninawm maithei e. Amaherawhchu, kan Pathian hi fak leh chawimawi phu, fak leh chawimawh duh Pathian a ni tih kan hriat reng a tul awm e. Bible-ah pawh hmun tam takah kan hmu bawk a ni.Fak hla hmang lo chuan Pathian fak leh chawimawina tur thildang kan nei meuh lo a tih theih awm e. Kan hmel a lo tha viau a ni thei, kan lo hausain kan chak viau pawh a ni maithei e, mahse chung zawng zawng chu Pathian fak leh chawimawina atan a hman tlak loh a ni. A nihloh pawhin, khawnge pawisa tam tak kan thawk chhuak anga, chuti chuan Pathian fak leh chawimawi ka ni mai han ti dawn ila, kan Pathian hian a pawm ngut a ngem? Tin, Sport lam hi ka tuina leh ka thiam zawng tak a ni a Pathian fak leh chawimawina atan nasa lehzualin kan bei the ang kan ti dawn a mi? Chumai a nilo, khawnge, a fel leh tha thei angberin ka nun hi ka hmang anga chu chuan Pathian kan fakin kan chawimawi teh ang kan ti thei em? Kan thei a nih chuan chu chu a hlu leh tha ber tur chu a ni ngei ang. Amaherawhchu, he mihring, thinlung bawlhhlawh pu, darker 24 chhunga darker 1 lek pawh thianghlim leh fel famkim thei lo tan hi chuan a huphurhawm khawp ang le.

Chuvangin, fak hla sa a kan fak leh chawimawi a duh a nih chuan chu aia lawman leh vanneihna ringtute tan chuan a awm awmlo hial awm e ka ti thin. Chuvangin, kawng dang amah fakna leh chawimawina tur han zawng thin mah ila, kan tih theih tur a vang hle a ni. Chumi hre reng chung chuan Amah fak leh chawimawiin hlim takin I zai mai ang u. Pathian fak leh chawimawi duh lo/chak lo ringtu/rawngbawltu kan nihy ngawt loh chuan.

b) Lam : Lam chungchang hian sawi a hlawh viau awm e. Kan lam leh lam lohin kan chhandam leh damloh chungchang khawi chiahlo mahse a lama tena a lam ve lo te kan va hmuh engemaw a kan va hmuh khawro viau erawh a dik awm lo ve. Chutihrualin, a lam ngailo ten mahni insawi fihlim niawm ang hrima lam loh lampang sawimawi chiam pawh a tul ber chuang lo ang. Amah fak leh chawimawia a chunga lawman entirna atana lam chungchang pawh Bible-ah kan hmu nual a ni. Lam pawh a ni ber lo a lam loh pawh a ni ber chuang lo tih lam pang hian kan pathian thuin min zirtir dan a ni lem lo. Miin Pathian a hmua, min chhandamna leh a khawngaihna mak tak mai kan chan avanngin a lawmzia entirna atan theih tawp chhuana a lam a nih chuan a duhawm thlawt a ni. Pathian pawh a lawm ngei a rinawm. Chuvangin, chumi hria a hmututen Amah chawimawina atan an lam thei a nih chuan a lam thei lemlo te pawhin kan lawmpui tur a ni zawk dawn lawm mi. Amah fak leh chawimawia lam hi tunaiin uar deuh deuh ila a duhawm hle a ni.

II Samuela 6:20-23 ah khan Lal Davida Pathian hmaa a lam thu kan hmu a nih kha (chhiar ni se)  Lal Davida hian a lam chhan a hre chiang hle a ni. Chutiang bawkin keini pawh hian kan hre chiang a nih kan theih ang tawk tawk talin Pathian hmaah lam I han tum dawn the ang.

Tawngkam lak tak 1 chu, “kei chu lam mi ka ni lo/kei chu zai mi ka ni lo” tih hi a ni awm e. Ami a zawnga sawi dawn chuan tunge mi chuang ang. (Kan duh leh mamawhnaah chuan, mi leh mi lo kan sawi ngai meuh lo,,,, hmel en reng reng pawh a chhe ve tak pawh hian kei chu ngaihzawng nei mi ka ni lo kan ti duh chuang hleinem,,, kan thiam lohna ngawih ngawihah pawh kan duh zawng a nih phawt chuan kei chu ti mi ka ni lo, kan ti ngai lo a nih hi.) Engatinge Pathian fak leh chawimawia zai leh lam a nih avanga kei chu lam mi ka ni lo, kei chu zai mi ka nilo kan tih tlat thin le, kan duhzawng a nih loh vang mai mai a ni zawk lo maw? A thiam leh a tinalh thei deuh chu kana wm ngei ang. Miin Pathian a hriat chian a, fak leh chawimawi a phu a ni tih leh Amah ringtu/rawngbawltu te chuan fak leh chawimawi mai tur kan ni tih a hriat chuanAmah fakin hlim takin an ZAI in an LAM mai zawk a ni. (Ramtuileilo leh rualbanlo kan nih ngawt loh chuan) Chuvangin, Pathian fak leh chawimawia zai leh lam kawngah hian hartharna kan va mamawh em….

Israel faten Pathian duh loh zawng tiin an hawisan a. Salah tangin hrehawm takin an awm a, chung an hrehawm tawhte avang chuan inchhirin an sual an sim a, Pathian an au a. Chutichuan Pathian chuan an sal tanna hmun atang khan a hruaichhuak leh a nih kha. Hemi chungchanga a an tawngtaina hla hi a mawi ka ti thin. Anmahni chhandamtu leh hruai chhuak a, zalenna petu chu ngenin Amah (Pathian)ah chuan an hnam pum an hlim theihna atan tiharh leh turin an tawngtai a nih kha. Chutichuan Pathian chu Israel fate chuan a lawm a, malsawmnain  a vur a, hmelma lakah pawh a hum thin a nih kha. Chutiang chuan keini pawh sual bawih ata min chhanchhuakin nunthar, chatuan nunna hlu tak mai min pe a chumi hnu pawh chuan Amaha kan hlim theihna atan harhna kan mamawh fo thin a ni. Keimahni leh kan zoram pawh hi han thlir ila, khawvel hun hmawr tawh takah hian chhiat lam kan pan mek lai hian Pathian lam hawiin kan sualna leh tihdikloh te sim I la, Pathian thu tak nunpui kawngah te, Amah fak leh chawimawi kawngah te kan harhthar theihnan I dil ang u. Nangmahah chuan I mite an hlim theihnan min tiharh thar leh dawm lawm ni? Tiin Pathian I au ang u. 

Lalpan a thu malsawm rawh se. Amen