LEI CHI IN NI E (Sermon)

LEI CHI IN NI E

(Matthaia 5:13-16)

           

Chi chungchang tehkhina thu hi Chanchintha bu ah pawh hmun thum laiah ziak kan hmu a, a pawimawhin he tehkhinna thu tawite hian a sawi thui hle mai. Lei chi (Fertiliser) sawina nilovin, kan chi liah thin (Salt) hi a sawina niin a lang. He Chi chungchang, Lal Isuan amah ringtute min tehkhinna thu hi tawi tein kan ngaihtuahho dawn a ni.

1. Chi chu a dak loh chuan khawiah pawh a al :-

            Chi da hi hmuh tur avang viau mai, Chi hi a dak chuan a nihphung zawng zawng a hloh vek a ni. Al-na a neihloh chuan eng atan nge a hmantlak tawh ang aw? A nihphung pangaiah chuan khawi hmunah pawh awm se, eng hun pawh ni se a al ngaiin a al reng, zing, chhun, zan, khaw lum/vawh zawng zawngah pawh a boruak leh a awm hmun a dan avangin a al dan a danglam ve ngai lo a ni tih kan hre theuh awm e.

            Mahni nun theuh han inchhut ta ila, eng ang nge kan nih le? Sik leh sa thu avanga Al/Allo mai mai kan nih chang a awm fo em? Tin, kan awmna hmun a zira nun danglam mai mai thin ringtu kan ni em? Helai keimahni Veng/Kohhran a al tha pangai viau kha, khawi emaw hmun dangah chuan kan lo danglam leh thin mai em le? Ka eizawnna leh hnathawhna hmunah te, ka zin vahna hmunah te hian ka rinna hi a danglam fo em?

            Sadraka te thian zaho chanchin kha sawi thui ngai lovin kan hre fo awm e. Daniela Bung 3 a kan hmuh angin, Dura phai zawlah mi zawng zawng in Rangkachak Milim chibai an buk lai khan, anni thian 3 khan Chibai an buk ve duh lo a nih kha. Juda te khan Jerusalem atang lo chuan Pathian Chibai bu tur niin an ngai lo a nih kha, chutiang a ni chung pawh chuan mi ramah anmahni nun himna atan pathian dang chibai an buk duh miahlo leh an buk lo ngam kha an va entawntlak em.

            Mahni lam ka han inen pawh hian khawi hmunah pawh al harsa ka ti fo thin. Amaherawhchu, Lal Isuan ringtute nihna tura min pek a nih avangin, kan awmhmun kan sawn avanga kan rinna danglam mai mai tur erawh kan ni lo tih kan hriat a pawimawh hle mai.

2. Chi chuan chawhmeh rem loh a nei lo :-

            Kan chawhmeh ei thinah hian hei chu Chi nen hian a inremlo tlat mai a, tia sawi tur a vang hle mai, eng chawhmehah pawh hian telh ila, a tituitu a ni zel a nih hi, a thur/thak/hang adt. a rem vel vek a nih hi maw! Kan Pathian hian a lo va siam thiam tehreng em.

            He thu atang hian ringtute hian zir tur kan va ngah em. Tu tu te emaw remloh leh eiloh mai hi a awl khawp mai. (A bikin hmeichhiaah hian a awm duh bike m aw?) Tupawh thawhpui emaw, kawm thei, mi tupawh rawngbawlpui thiam kan nih a pawimawh hle. Rawngbawlna huangchhungah ngat phei chuan a pawimawh lehzual. Chumi atan chuan midang dah pawimawh thiam te a pawimawh hle a ni. “kei chu lang tur ka ni, a ni chu tlatlum tur a ni.” Johana 3:30 a Baptistu Johanan Isua chungchang a sawi ang khan, he rilru hi rawngbawltute hian kan put theihna tura keimahni kan insiamthata kan inzir fo a va duhawm em.

            Mahni theuh inngaihtuah I la tu te emaw remloh ka lo nei fo em? Kan zui Lal Isua hi Remna Lal a nih kha. Chuvangin, Chi in chawhmeh remloh a neilo ang hian, keini ringtute pawh hian remloh nei loin kan rawngbawlnaah pawh inpumkhatna nen rawng I bawlho zel ang u.

3. Chi chu chawhmeh  alo tui theih nan a ral vek thin :-

            Kan chawhmeh siam te a lo tui zawk theihna atan chi kan telh thin, chu Chi chu a ral hma chuan a alna a chhuak kim ngai lo ang leh a ralvek phawt loh chuan chawhmeh a tih tui theih loh ang hian, keini ringtute pawh kan nun hi Kraws-ah chinral a nih loh chuan, kan rawngbawlpuite/rawngbawlsakte an tui thei thin lo a ni.

            He thu hi rawngbawltute tan ngat phei chuan a pawimawh lehzual hle. Kan mihring felna leh thiamna avangin engemaw chen chu han tui ve thei thin mah ila, kan ral thei tak tak lo fo thin.  Chuvangin, rawngbawlna nung leh rawngbawlpui nuam, ringtu chhenfakawm, mi hlate hnuk hnaitu, thlarau saltang te a hnena hruaitu ni tur chuan kan nun hi a tuiral vek a ngai a ni.

            Fak hla siamtu chuan “Saruangah min siam rawh, Mulukawlhte ei turin, Zion panna kawngbo te hruai turin,” a tih kha. Mulukawlh hian mihring damlai sa a ei ngai kan hre awm love. Amaherawhchu, mihring chu a lo thih tawh chuan a ruang chu an ei a, chaw-ah an hmang thin. Chutiang chiah chuan keini pawh midangten min ei theih turin kan thih phawt a ngai a ni.

            Thi si lo ringtu/rawngbawltu kan nih fo thin avang hian kan rawngbawlna ten awmzia a nei lo fova, kan la nun miau avangin keimahniah midang ten eitur an hmu lo thin a ni. Chuvangin, Kohhrana mi hla kan tithe pawh in Kohhran Inkhawm leh Kohhran programme hrang hranga tel an chak lem lo thin niin a lang. Heng mite ei theih tur hian thi ila, kan koh leh sawm kher ngai lo pawhin heng kan member hla te hian keimahniah chaw tui ei tur zawngin min rawn pan zawk mai dawn a ni.

            Lal Isuan Lei Chi in ni e min tih ang hian, Chi nihphung hrang hrang kan hria a, chu nun chu kan neih ava duhawm em. Chi chu a dak loh chuan khawi hmunah paw a al thin ang hian keini pawh khawi hmunah pawh al ila. Chi chuan chawhmeh remloh a nei lo ang hian tute emaw remloh bik nei lovin, Pathian rawng I bawl ho ang u. Tin, Chi chu hmawhmeh a lo tui theihna atan a ral vek thin ang hian keini pawh midangte an tui theihna atan I ral ve ngam ang u.

            “Khawvel eng in ni e, in eng chu mi mithmuhin eng rawh se,” min tih ang hian, heng kan han tarlan tak tlem te pawh hi kan zawma kan nunpui chuan kan eng chu mi mithmuhin a eng ngei ang. Tichuan, midangte pawhin kan eng atang chuan kan Pa Van ami an chawimawi thei dawn a ni. Lalpan a thu malsawm rawh se.