Article

KUMKHUAIN RUAH A SUR DAWN LO!!!

    Kum upa lam deuh tawh chuan kan hre vak lo pawh a ni thei e. A lar viau a ni mahna, naupang te te pawhin ‘bang tawh rawh, tap tawh suh, kumkhuain ruah a sur dawn lo’ lo ti al al tawk hriat tur a awm zauh zauh mai!! He hla hian lehlam zawng takin ngaihtuahna thui tak min siam tir a, tunlai kan thalaipui tam tak  te nun dan min hriat chhuah tir a, hlimna an zawn avanga harsatna leh beidawnna ruama tang mek leh chumiin a hrin chhuah (a tih theih awm e), mahni nunna hial lak duhna te nen. Heti zawng hian thlirna tlang dang atangin han thlir teh ang.

    HARSATNA KAN TAWK EM?:     Min siamtu hian khawvelah kan nuam tih zawng taka awm reng tur leh hlim taka awm reng ringawt turin min siam lo tih kan hriat hmasak a pawimawh awm e. Chutiang tawk lo kan nih chuan mi pangaia chhiar tur kan ni ngut ange maw chu... Naupang nun hlimawm tak kal pelin khawvel thar kan dai thin a, chu mi hunah chuan keimahnia khawvel thar kan hma chhawn a ngaih chang a awm thin a ni. Chu nunah chuan rilru hahna, lungngaihna leh harsatna hrang hrang ten kan hnen a rawn thleng ve tawh thin a. A hmaa nu leh pate thlazar hnuaia hlim taka kan awm thin ang kha ni mai tawh lovin, midang hriat ve chi lem loh harsat rukna kan tawh chang a awm fo vang. Tin, kan nu leh pate emaw kan ngaihzawngte emaw kan thiante emaw nena kan inkara inhmuh thiam lohna vang pawh a ni thei e. Chung harsatna kan chunga lo thleng te chuan khawvela dam ve reng chak loh rum rum hialna pawh min neih tir a ni thei, chutiang dinhmuna a kan ding a nih pawhin Pathian rawn chunga ngaihtuahna fim kan hman hram hram a pawimawh awm e. ‘Kumkhuain ruah a sur dawn lo’ an tih ang khan, chung harsatna te chu kumkhuain ka tawk dawn lo, nakinah chuan min la kian san dawn a ni ti a tawngtaina nena kan beih tang tang a ngai a ni.

    BEIDAWNNA KAN TAWK EM?: “Khawvela mi hlauhawm ber te chu mi beidawngte an ni” an tih thin kha. Kan nunah beidawna nasa tak kan tawk a ni thei, chutihrual chuan engvanga beidawng nge ka nih? Beiseina nei tawh miah lo turin ka chungah enge lo thleng? Ka beidawnna hi beidawnna awm a ni em? Ruihhlo tih laklawh sim thei tawh lo ni a kan inhriat avang te, mipat/hmeichhiatna kan lo hman khawloh tawhna avang tein beidawngin kan awm mek ang tih a hlauhawm hle a ni.  Heng harsatna kan nuna lo thleng kan sim thei tawh lo emaw kan tih te hi Pathian chakna rinchhanin kan sim thei a ni tih kan hriat ava pawimawh em. Mi tam tak chu kan beidawng hma deuh thin a ni!! Beidawngte tan Beiseina, Lungngaite tan thlamuanna min petu kha kan biak Pathian ngei hi a ni tih kan hriat reng a pawimawh a ni. Siamtu hian beisei tur nei lovin khawvelah mihring tumah a siam lo. Tin, Khawvela mi ropui leh hlawhtling kan tih tepawh hi beidawng lova bei tang tangtute an ni thin. Eng ang harsatna khirhkhan leh beidawnna nasa tak tawk mah ila ‘Kumkhuain ruah a sur dawn lo’ an tih ang khan lawmna leh beiseina nung kan nei leh thei a ni tih i hria ang u.

    NUN HLUTNA KAN HRIA EM?: ‘Its my life’ mai ni tawh lovin ‘its my world’ kan ti tawh chu a ni ber mai. Khawvelah hian nuam zawng reng rengin kan hmanhlel a, mahni indah pawimawhna khawvel kan siam mek a ni. mi tam tak chu kan nunah hian kan nu leh pate takngial pawh inrawlh kan duh tawh lo chu a ni a! Ka nun a ni a ka duh dan danin ka hmang ang chu, keimahah hian tumahin thu rawn nei suh se, tih nun hian kan nung tawh a, kan pi leh pu ten “Zawng hmai eng mah zah a na” an lo ti ngai a, tunah erawh chuan ‘Zawng’ chu sawi loh kan mihringpuite hmai eng pawh kan zah zo ta lo chu a ni hi maw! Zonun ze mawi kal sanin aia upa zahna kan hlamchhiah a, chu chuan kan chhungkua, Kohhran, khawtlangnun leh kan ram a tha lo zawngin a nghawng mek a ni. Midangte tanpuitu, midangte tana malsawmna ni tura kan nunna hlu tak hi hmang tur kan nih laiin keimahni leh keimahni kan inti chhe zo tan a ni mai lo maw? Hetiang mi (thalai) kan nih chuan nun hlutna kan hre lo a ni ngei ang.

    Pathianin Amah ang taka a siam, nunna hlutak a pek mihringte kan ni a. Amaherawhchu, kan nuna harsatna leh beidawnna kan tawh changin rawn tur dik leh pan tur dik Pathian hnen kan pan lo fo thin. Chuvangin, kan thalaipui tam tak ten an nunna hlu tak hlut zo lovin an zinkawng anmahni ngeiin an lo titawp tawh a ni. Siamtu Pathian rilru ava na thin dawn tak em. Eng dinhmunah pawh ding ila kan chungah eng ang harsatna pawh lo thleng mah se, tawngtaiin Pathian i rawn tlat zel ang u. ‘Kumkhuain ruah a sur dawn lo.’⁠⁠⁠⁠

THALAITE MAMAWH ISUA (Sermon)

                                                        THALAITE  MAMAWH  ISUA

                                                      I Samuela 17:38,39    Johana 14:6   

    Tunlai khawvel han thlir ila, a bik in Thalaite hi kan buai tawh em em mai a, khawvelin changkanna tam tak min rawn chhawp chhuah sak avangte pawh a ni mahna, duh leh it zawng kan ngah ta hle mai. Chung kan duh zawng leh kan it zawngte chu mamawh ta riau a inhirtna lian tak kan nei a, chumi neithei tur chuan nasa takin kan bei thin reng a ni. Kan nitin khawsakna a thil tul aiin kan duh zawng leh it zawngte hian hmun a chang lian tawh zawk kan ti thei awm e. Chuvangin, mamawh hlirin kan nun kan hmang a, rual awt reng rengin kan nun kan hmang a ni ber mai, mite neih theih ang neih theihloh hlauvin a thim a var pawh thlu lovin kan bei chu a ni ber awm e. Hetianga duh leh mamawh tam tak nei nia kan in hriat lai hian enge kan mamawh ber chu ni ta? Mobile phone, Bike, Car, thawmhnaw etc etc em ni le? Chu kan mamawh nei tur chuan engtiang chiahin nge kan thawh ve le?

Mihringten mamawh nia kan inhriatte:   

    Mihringten a kan duh ber leh kan zawn ber chu HLIMNA leh NAWMSAKNA a ni kan ti thei awm e.(KTP emaw thian ho emawa hun kan hman reng reng in a nawm leh nawmloh kan inzat thin, a nuam leh hlimawm lo turah chuan kan kal peih tak tak lo a ni e. Hei hian Thalaiten a hlimna leh nawmna kan mamawh zia a tilang awm e) Amaherawhchu, chu hlimna nei tur chuan kan zawn dan erawh a in ang lo. Thenkhatin zu leh sa leh ruaihtheih thil dang dangah hlimna tak tak a awm emaw tiin, chu lamah chuan thahnemngai takin kan tlan mek a, ruih lai chuan nuam pawh kan ti thei khawp mai. Engemaw tih nikhua leh hunpui lothlen chang apiang mai a ruih loh chuan kimlo riaua hriatna kan nei a,  mahni inchhungah vawksa/ui sa/bawngsa inthlahrung miah lova ei teuh ngam khan eng emaw tih nikhua leh chaw eikhawm nikhuaah no 1 tal emaw inloh chuan kan ei ngam tlat lo.

    Thenkhatin nulat tlangval nawm chenna ah nawmsakna tak tak a awm emaw tiin chu lamah chuan kan tlan mek bawk a. Mahse, nulat tlangval nawmchenna hi hlimna tak tak a lo tlinglo a niang, a ruka tih zel a ngai tlat!!! Ngaihtuah chian a tul hle mai. Hlimna leh lawmna min pe tak tak tu chu ni se, kan ram hruaitute leh kan kohhran hruaitute pawh hian an sawi chamchi anga, zirtirna pawh nasa taka kan inpek hial a rinawm. Mahse, hemi hmanga nawmchenna hian a daih reilo emai, kan nun min hliamtu leh damchhung a ser nung min siamtu mai a ni a, a tawpah inchhirna bak engmah rah chhuah a nei chuang lo a ni.

    Thenkhatin sum leh pai ngah hi hlimna tak tak emaw tiin chu lamah chuan thahnem kan ngai em em mai bawk a. Kan sorkar a department hrang hrang han thlir ila, keini ang han hmuh ve phak leh han hriat ve phak mai ah pawh hian sum leh pai diklo taka hmanna a nasat zia kan hmu in kan hria a ni. Dik taka tih a retheih ai chuan hlep rukna hmanga hausak kan duh ta. Chu chuan hlimna min pe emaw kan ti a, he khawvelah hian pawisa hi kan mamawh ber emaw kan ti a, mawi leh mawilo pawh thlu lovin pawisa nei tur hian thahnem kan va ngai em!!! Min siamtu pathian hian eng ang takin ngai ang maw???? A ni lah taka, pawisa hian thil a lo tithei em a tin ni. Kan khawtlang nunah pawh hian nei nung deuh thusawi leh pa berh ve tak thusawi in kawngro a in sut nasat hleih zia hi. Mi nei nung deuh in fiamthu an sawi chuan nuihzat thlak vaklo pawh nise nuih sak a tul thin. An eiruk hmangin In lian tak tak, Car nalh tak tak an nei a, zah a hnekin an la chapo pui lehnghal, zah chu khawi lam hi a ni ringawt.

     Khawtlang nun mai pawh a ni tawhlo, Kohhran huang chhung thleng pawhin a rawn dai zel a, ka sawi sual a nih chuan Pathian leh Kohhran hruaitute pawhin min lo ngaidam se, rawngbawlna chanvo hrang hrang in pek chungchangah te, chumai bakah hruaituten a member te kan thlir dan hrim hrimah pawh hian min neinung leh neinunglo kan thlir dan  pawh a dang deuh em aw!!. Kan Aizawl khawpui a Kohhran tam tak pawh hi han thlir ila, Kohhran Upa atan hial pawh kan inthlang ta zel zawng a nih hi. Pathian leh Kohhran tana a rawngbawlna aiin a sum leh pai thawhah te, a eizawnna hnaah te kan inthlir mah mah ta em? hetiang mite hi Kohhran mipuite pawh hian kan hai lo. Kohhran hian SUM a mamawh berlo, sum tam tak neih a, Thlarau thianghlim a ngam pat chuan si loh ai chuan, Kohhran pachhe ve tak, mahse Thlarau thianghlimin a chenchilh tlat Kohhran chu a thlanawm zawk ngei ang. Chuvangin, Pathian Kohhran te kan nih avangin kan fimkhur ava tul em! Setana hian hmanrua atan ahmang nasa si a, keini Kristian Thalai, nakina Kohhran hruaitu la ni mai turte hi kan fimkhur a tul hle a ni. Kan Lal Isua chuan, Matthaia 6:24- ah “Tuman hotu pahnih rawng an bawl kawp thei lo; pakhat huain pakhat an duh ang; a nih loh leh, pakhat tanin pakhat an hmusit ang. Pathian leh sum rawng in bawl kawp thei lo ve.”  tin a sawi a, keimahni theuh kan in enfiah a ngai hle awm e.

Pathian rin ngam kan mamawh:   

    I Samuela 17:38,39 kan chhiarah khan, Davida’n Goliatha a beih khan an lal Saula khan Davida kha a ma ralthuam bel in, dar lukum a khumtir a, awmphaw a hak tir a, khandaih a pai tir bawk a nih kha. Mahse, Davida chuan Lal Saula hnenah chuan “Ka kalpui thei dawn hauh lo mai a, hetiang hian ka la tichhin ngai lo a ni,” a ti a. Tichuan, Davida chu a inhlip ta a nih kha. Helai thu hi ka rilruah a awm reng thin. Davida khan Goliatha bei tur khan khang ralthuam tha pui pui kha a mamawh lo, a rin Pathian a hre chiang em em a, Ani chuan a tanpui dawn a ni tih a ring tlat a ni. Kha lai hunah khan Lal Saula ralthuam chauh nilo, a aia zangkhai zawk leh te zawk ralthuam dang inbel tur pawh a awm ngei a rinawm. A chhan chu Lal Saula kha palian tak a ni tih kan hre thei a. I Samuela 10:23-ah chuan, “Chutichuan an tlan a, an va hruai chhuak a; tin, mipui zinga a han din chuan mi zingah chuan a sâng ber mai a, tuma a koki khum pawh an awm lo”, a ti a. Chuvangin, Davida khan Lal Saula ralthuam kha a hak tawk hgmel loh hrim hrim a ni. Amaherawhchu, engvangin nge Lal Saula hian ama ralthuam kher kher Davida kha bel? Ngaihdan thenkhatah chuan, Lal Saula hian, Davida kha a zawh loh tur leh a chet pui theih loh tur tih a hriat reng ralthuam a bel tlat danah khan, Davida hian Goliatha hi hneh tak tak turin a duhlo a maw chu aw!!! a tih theih, chuti ni lo se, ama zawh tawk ralthuam bel tur tam tak a awm, ti a ngai pawh an awm.

    Heti zawng hian han sawi dawn ila, keini pawh kan tana tha zawk tur ni a lang thil tha tak tak hmang hian kan hmelma pa Setana hian thuam min bel a, chu chu kan hrethiam lo fova, kan chauh phah a, kan zo lo a, kan chhiat phah thin a ni. Chuvangin, Kan rawngbawlna a kan mamawh loh Setanana min bel zawng zawng hi kan hlih ngam a tul a ni. David pawh khan engtin nge a tih kha.  A.... khawnge min lo beih ve tak thutah invennan phaw tal te chu han keng ve reng reng teh ang emaw, Chemte tal te chu han pai ve reng reng ila pawh a ti chuanglo. A nihna ang angin Pathian rinchhan chungin a pen chhuak mai a, Israel Sipai zawng zawng tena an beih ngamloh Philistia palian chu a that ta mai a ni. Keini pawh han inthlir ila, Pathian rawng kan bawlnaah hian kan mamawhloh pui pui kan in bel hnem viau lo maw? Mite mithmuh a mawi duhna te, mite fak duhna te, tunlai tih dan leh a changkang zawk leh mite mitmhuh a ZEI nih duhna te kan in bel thin. Chuvang chuan a lawm kan rawngbawlna hi a nun theih loh a, rah tha a chhuah theih loh thin. Kan nunah miten Lal Isua hmel an hmu lo thin a ni.  Pathian ropuina atana kan mamawh miah loh ah hian kan inham buai lutuk ang tih a hlauhawm hle. Chuvangin, Davida’n Pathian rinchhan chunga khawvel ralthuam a hlip ngam ang khan, keini pawhin Pathian ropuina dal theitu kan inbel zawng zawng hi i hlip ngam i la, tichuan keimahni hmangin miten Pathian thil tihtheihna leh ropuina an hmu ngei ang.

3. Kan mamawh ber Pathian thil thlawn pek Isua:

    Genesis 3:21 ah chuan “Tin, LALPA Pathian chuan Adama tân leh a nupui tân chuan savun kawrfualte a siamsak a, a haktîr ta a.” tih kan hmu a. Adama leh Evi khan chhia leh tha hriatna thei rah an ei avangin Pathian thupek an bawh chhia a, chuvang chuan a chhia leh tha hriatna neiin Saruak an nih an inhria a, an saruakna khuh turin Theipui hnah an feng tih thu kan hmu a ni. Ti hian ka ngaihtuah thin, Evi leh Adama khan saruak annih an inhriat khan enge an mamawh ber?  Ekhai... khawnge saruak kan ni ta si a zu han rui ila kan saruakna hi a zia deuh mahna emaw chutiang kha tiang chu han ti phawt ila an ti reng reng lo. Kha an saruakna khuh thei tur khan Theipui hnah an feng mai a ni. Thing hnah a zawnga Theipui hnah kher kher, adang pawh a awm lo a maw le? Ti ten ka ngaihtuah thin a, mahse, an saruakna khuhtu tur kha an mamawh em a, an bul hnai a mi, an saruakna hliah thei tur awm chhun kha an hmang mai a nih a rinawm. Khatiang hnah thap lutuk thui pawh kal pui theih loh tur kha an hman a ngai a nia. Chu an mamawh chu hriain Pathian in an tan savun kawrfualte a siam sak a a hak tir a nih kha. Evi leh Adama hunlai deih atang tawh khan Pathian in mihringte mamawh phuhrukna atan khan thisen meuh chhuak in an mamawh a pe a ni. Kha savun kawrfual nei tur khan Ran thisen a chhuah a ngai a sin, tunge thisen chhuak lovin ransa atangin a vun chauh la chhuak thei ang. Chutiang chiah chuan Pathian in mihringte, chatuan a hremna tawk mai tur, hrehawm taka chatuan nun hmang mai tur min hmangaih avangin, a hnen kan thlen theihna atan mamawh kan nei tih a hria a, chu kan nunna tur atan a kan mamawh awm chhun Ama fapa mal neih chhun Lal Isua ngei chu thu mai ni lo, thisen chhuak in hrehawm tinreng tuarin min rawn pe a ni.

    Awle, ka thalaipui duh tak, he khawvel ah hian kan mamawh neih duh reng rengin kan hman hlel a, zu leh sa leh ruihtheih thil dangah te, nulat tlangval nawmchenna-ah te, sum leh pai duhamna leh kan mamawh ni a kan hriat kawng hrang hrangah kan tlan mek reng a. Mahse, heng zawng zawng hian kan mamawh ber min pe si lo, kan thlarau nun chhamdamna leh hlimna min pe thei a awm lo tih kan hriat ava tul em! Pathianin in kan mamawh a hria a, chu Thalaiten a kan mamawh min pek Lal Isua hi i pan mai ang u. A hnenah chauh hlimna leh lawmna tak tak a awm a, Johana 17:3    ah chuan “Hei hi chatuana nunna a ni, nang Pathian tak chauh leh I tirh Isua Krista hriat hi,” a ti a, Amah chauh hi Pa hnen kan thlen theihna kawng awmchhun a ni. “Keimaha kal lo chu tumah Pa hnen an thleng ngailo” a tih kha. Chuvangin sim ngai kan nei a nih chuan sim ila, insiamthat ngai kan nei a nih chuan i in siamtha ang u. Kawng engkim a kan mamawh dik tak Lal Isua hi i buaipui ber tawh zawk ang u.

    Lalpa’n a thu malsawm rawh se. Amen

2015 Bial Zaipawl Hlimthla

Music Inn Recording Studio, Laipuitlang

Music Inn Recording Studio, Laipuitlang

Music Inn Recording Studio, Laipuitlang

Music Inn Recording Studio, Laipuitlang

Music Inn Recording Studio, Laipuitlang

Music Inn Recording Studio, Laipuitlang

Music Inn Recording Studio, Laipuitlang

Music Inn Recording Studio, Laipuitlang

Bial Inkhawmpui Bethel (Single theih loh,, haha)

Bial Inkhawmpui Bethel (An inchuh reng mai,,, hihi)

Bial Inkhawmpui Bethel

Bial Inkhawmpui Bethel (Hei poh hunawl khawralna hahaa)

Bial Inkhawmpui Bethel

Bial Inkhawmpui Bethel (Hunawl khawhralna)

Bial Inkhawmpui Bethel (Mafaka, Umadini, Pu Mabiaka, Pastor CS Rila)

Bial Inkhawmpui Bethel

Bial Inkhawmpui Bethel,,, Pathianni tlaiah a thlengtu Kohhranin Chawhlui min lo buatsaih a...

Bial Inkhawmpui Bethel

Bial Inkhawmpui Bethel

Bial Inkhawmpui Bethel

Bial Inkhawmpui Bethel

Bial Inkhawmpui Bethel

Bial Inkhawmpui Bethel

Bial Inkhawmpui Bethel

Bial Inkhawmpui Bethel

Civil Hospital ICU

Kan Zaipawl Member, tenor part sa Tv. Zothantluanga, damlo Civil Hospital ICU ah dah a ni a,,, Zaipawl member te pawh hla zir banah kan kal vek, a nih kha,,, hetiang hi kan thleng dawn tih hrelo in thlalak nuam kan la ti viau si ka a nia,,, a mak ngawt mai!!!

Civil Hospital ICU

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet

ITI Bial & Noagang, Saisimdung Bial Vanglai Joint Meet (ITI & Noagang pastor Bial Zaipawl)

ITI Bial & Noagang, Saisimdung Bial Vanglai Joint Meet

Noagang,,, kan thlenna te nen

Article

A Fair lo!!

    Hringnun hi ka thlir a, engkim mai hi a fair lo fai vek ni hian ka hre fo thin. Dinhmun chhe zawk leh vanduai zawka ding mekte tan chuan a fair lo kan ti fova, chutihrualin dinhmun tha zawk leh vannei zawka dingte erawh chuan a fair lo an ti chuang miah lo a ni awm e. Chutiang khawvela cheng kan nih avang chuan a thlir thiamlo tan chuan he kan damchhung rei lo te hi hrehawmna leh lungngaihna mai a chang thin a nih hi maw!!!

    Mi neinung leh awm thei tak tak, mahni duh ang ang lei thei leh nei thei mai te kan han thlir a, engtin nge an neih bik a, engtin nge an tih bik em em le?? Pathian hian hausa tur hrim hrim hian a siam bik a nih dawn hi han tih rum rum chang a awm thin. Chutiang dinhmun atang chuan mahni kan han inthlir a, kan retheih leh harsat bik zia te kan inhmu a, kan inkhawngaihin kan thinlungah awhna tam tak avang chuan a fair lo kan ti fo thin.

    Miin an hnaah emaw an sumdawnna leh ei leh bar an zawnna hrang hrangah vanneihna dawngin dinhmun tha leh duhawm takah an din chang a awm fova, a nihna takah chuan inlawmpuia lawmthu insawipui mai hi a that tehlul nen, mahse kan rilru chhungril tha hleithei lo, sual in a bawm rengah chuan ngaihtuahna dang mahni inkhawngaihna leh inlainatna bawk chu a lothleng leh ta. Keipoh heti khawp hian ka thawkrimin ka hnaah ka rinawm ve in ka hre sia, enga tinge hetiang vanneihna hi ka chan ve theih loh, ka vanduai fo bik mai le? tih zawhna chu kan inzawt leh fova hringnun hi a fair lo a ni.

    Zirlai kan ni a, theih tawp chhuahin kan zir tang tang ve bawk a, mahse kan duh leh beisei ang result kan hmuh loh chang a awm thin. Chutihlaiin, thenkhat chu zir mang lo a kan hriatte pawh kei aia thiam leh titha zawk an ni fo mai, engnga tinge an rilru hi a chak bik em em le? Nge ni a a vannei thei hrim hrim a, a thiam zawng tak hi Exam-naah a chhuak fuh thin zawk? Chu rilru pawh chu mahni inkhawngaihna leh lainatna avanga ka neih a ni a, chu chuan zirlai kan nihna kawngah pawh hian remruattu remruat dan hi a fair lo tih chang a awm fo mai.

    Nu leh Pa thenkhat, Pathian pawh ngaihsak lem lo leh fate nun kawng dik zirtir tur pawha thu tha pawh hrilh ngailo te hian fanu/fapa fel tak tak an nei fova, chutihlaiin kan theih leh phak ang tawkin Pathian rawng kan bawl ve a, kan fate tan pawh tawngtaiin Pathian hnenah kan hlan fo bawk thin. Pathian thu pawh kan thiam ang tawk tawkin kan hrilh thin a. Mahse, engngati bik nge keini fate ve hi an that theih reng reng loh le!! A fair lo tlat.

    Kan thian thenkhat ten ngaihzawng fel deuh deuh an tawnga, hlim takin an awm a, kei erawh engnga tinge ka vanduai theih bik em em thin le? A chang phei chuan ka rilru na leh rilruhah lutuk hi ‘Depression’ ka neih phah hial a, chutiang reng reng chuan vawi tam tak rilru hrehawmna ka lo tuar tawh a ni si a, an chan ka thlir hian ka thik ni ber hian ka hria. Chuvangin, a fair lo ka ti takzet a ni, engnga tinge hetiang reng reng hi ka chungah hian a thlen bik thin le?

    Mite chuan Nupui/Pasal fel tak Pathian tih mi neiin hlim takin chhungkua an awm bik a, keini ve hi enge tihsual kan neih bik a hetiang dinhmunah hian ka din bik le? Tuktha pawh nei hleithei lovin Setana hian heti taka min tihbuai reng bik thin le? Pathian pawh hian hetianga awm tur hian min ruat bik emaw ni le? a fair lo thin ngawt mai.

    Chutiangzelin, a nihna takah chuan mahni inkhawngaihna atanga thlir phei chuan engkawngah mah hian hringnun hi a fair tak tak thei lo a ni, chutiang khawvela cheng kan ni miau a. Chuvangin, Pathian atang lo chuan kan vuivai reng anga, hringnun hi hrehawm ti ngawih ngawihin kan hmang reng ngei ang. Eng dinhmunah pawh ding ila, kan nun a chhiat lai ber leh vanduaina leh harsatna thuk ber tawk ni a kan inhriatlai pawhin Pathian lam thlir tlattu kan nih chuan he hringnuna a Fair lo kan tih zawng zawng pawh hi Amah min hnaihtirtu a ni thei a ni tih hriaa Amaha kan innghah tlat ava duhawm em.