Thalaite Isuan Min Ko (Sermon)

Thalaite Isuan Min Ko

II Timothea 1:9,Marka 10:49-52

            Kohna chungchang hi sawi dan tam tak a awm thei awm e. Thuthlunghlui lam kan thlir chuan Pathianin mi a koh chanchin leh a koh a te a thu puang tura a tirh thu te pawh kan hmu bawk a. Tun tumah erawh chuan Lal Isuan Thalaite min kohna lam sawi kan tum dawn a ni.

1.         Chhan neiin min ko: Mi kan koh reng rengin chhan nei lo in kan ko ngai lova, kan mamawh avangin leh anmahniah engemaw sawi duh kan neih emaw ti tura duh kan neihin emaw kan in ko thin. (Kan hminga kan in koh te, kut hmang te, mit mei leh thil dang chi hrang hrang hmangin). Chutiang bawk in Lal Isuan keini Thalai te hi min kova, awm mai mai tur leh mahni duh zawng zawng a nung turin min ko lova, chhan neiin a duh ang ti tur leh a mamawha a hman atan min ko kan ti thei awm e.

2.         Kan damna atan min ko: Marka 10:49-52 kan chhiar khan Mitdel Bartimaia tihdam chungchang kan hmu a ni. Bartimaia hi mitdel kutdawh mai a ni. Lal Isua a lo kal a ni tih a hriat khan “Davida fapa mi khawngaih rawh” tiin a auva, a bul a mi ten ngawi tura an khap pawhin a au zual sauh a nih kha, chu a au thawm chu Lal Isua beng a lo thleng ta, Lal Isuan “amah chu han ko teh u” a ti a, tichuan Lal Isuan a ko a ni tih a hriat khan (a ringhlel lo a ni) a puan a paih a a zuang tho nghal a ni. Mithiamte chuan heng kutdawhte tana an puan pawimawhzia an sawi thin a, an puan chu an sina an saruak khuhna atan an hmang a, tin kutdawhna atan an hmang bawk (an eizawnna ber atan an hmang) a ni an ti thin. Chutiang khawpa pawimawh chu Bartimaia hian Isuan a ko a ni tih a hriat khan a paih a, Lal Isua a pan a nih kha!!! Tichuan, Isua chu a hmachhawn ta ngei a, Isuan engtia ka tih nge I duh? a tih khan engmah thil dang a dil lo, “Rabboni hmuh theih ka duh” a ti a nih kha.

Tihian ka ngaihtuah thin, engvangin nge kha mit del kutdawh khan Isua hnenah khan Pawisa te, eitur te a dil loh? Eitur, pawisa, leh thildang a mamawh avangin kut a dawh a ni si a. Mahse, Isua hnenah khan a mamawh dik tak mit varna a dil tlat a ni. Keini ni ta ila, tun dinhmunah hian enge tih sak che ila I duh? Min ti ta se, khawvel hausakna leh ropuina, nawmna, sum leh pai (pawisa tam tawk leh hmanchawp tlem/Car/Bike/mobile phone/nula/tlangval hmeltha tawk fel si…..) te kan dil mai lawng maw? Bartimaia kha Isuan a mamawh tho sum leh pai leh thil dang pe turin a ko lo, a tana pawimawh ber a damna atan a ko a ni. Keini pawh chutiang bawkin, khawvela kan mamawh hrang hrang leh kan duh zawng/chak zawng min pe turin min ko lo, kan tana pawimawh ber kan Thlarau damna atan min ko a ni tih I hre thar leh ang u. Kan thlarau nunah natna tam tak nei, sual kawng thui tak lo zawh tawh leh zawh mek te pawh kan ni ang, tin, damna tak tak chang si lova KTP a inhmang mek (hliam nei reng chunga hnathawh hrehawm zia kan hre heuh awm e), rawngbawlpuite zah avanga ti ve hram hram te pawh kan ni maithei e, chutiang dianhmuna kan ding a nih pawhin tunah hian Lal Isuan a hnen pana damna famkim chang turin min ko a ni.

3.         A rawngbawl turin min ko: Thiltha ti atan a siam Thalaite hi kan thatlai hun hian Isuan a rawngbawl turin min ko a ni tih kan hriat a pawimawh hle. Pathianin Kohhran Committee leh kan hruaitute hmangin kawng hrang hrangin a rawngbawl turin min kova, KTP hruaitu, Group hruaitu, Tantu, Zaipawl, Sunday Scholl Zirtirtu etc…. chutiang zelin, chumai a ni lo, Amah faka inkhawmte, midangte tana malsawmna ni tura nunte kan awmna hmun apianga a rawngbawl turte in min ko a ni. Amaherawhchu, heng Lal Isuan min kohna zawng zawng aia ngaihpawimawh kan neih thin avang hian  min koh chhan ti hlawhtling lovin Jona ang maiin min koh lohna lam ah kan kal fo thin a nih hi!!!!

            Rev. Dr. Billy Graham-a chanchin han tarlang ila, Standard Oil Company in Far East ah Representative atan an sawm a. Hlawh pawh US$ 10000 an tiam a, chu an tiamna chu a hnial a, a vawihnihna atan US$ 25000 an tiam leh a, chu pawh chu a hnial leh a, a vawithumna atan US$ 50000 an tiam leh a chupawh chu a hnial fithla thak a ni. Chutah chuan Company lam chuan, Eng nge thil dik lo awm ta le? Hetiang a hlawh tam tak kan pek dawn chung pawha I hnial zel mai le an ti a, Billy Grahama chuan ti hian a chhang a, “thil dik lo a awm pawhin ka hre lo, ka hlawh atana min tiam pawh a tama atha khawp mai, amaherawhchu, he in hna hi a te lutuk a ni, a aia hna lian zawk leh pawimawh zawk Missionary turin Pathianin min ko a ni”. Tiin a chhang a ni. Keini, hian Pathian min kohna ai hian engnge kan dah len zawk thin le?  

            Vawikhat chu US President Coolridge khan  Missionary JOHN MOTT-A chu Japan-a America Ambassador hna thawk turin a sawm a, a ni pawhin a chhanna chu, “President zahawm tak, Pathianin a Ambassador turin min ko tawh a, ka beng hian kohna dang a hre thei tawh lo a ni”. Tiin a chhang a ni. Keini A rawngbawl tura min koh reng lai hian kan beng hian kohna dang ava hre hnem thin dawn tehlul em!!!! Isuan min kohna aichuan kan Bialnu/Bialpa te kohnain ngaipawimawh a hlawh fova (Nupui nei tawh tan, Isua kohna aiin kan nupuite kohna kan dah pawimawh zawk em??), Zu leh damdawi zun in min kohna te, Nulat tlangval nawmchenna, sum leh pai duhamnate, kan nitin mamawh hrang hrangte (mamawh vak loh, thianho thil tih khawm/intihhlimna etc..) kan dah lian zawk tlat thin a ni. Chumai a ni lo, Rawngbawlna huang chhungah pawh, rawngbawlhna chanvo hrang hrang kan hruaitute kal tlanga min kohna te tih hlawhtlin aiin kan lu na fek fek te, kan pum nuam lo riai riai te, kan peih lo ngawih ngawite kan dah pawimawh zawk tlat thin a ni. Kan in enfiah angai hle mai.

            A tawp berah chuan, Ani chuan kan thiltih angte ni lovin, ama ruat leh khawngaihna ang zawkin min chhandam a, kohna thianghlimin min ko bawk a; tih kan hmuh ang khan, Kan thiltih that vang leh kan tlin vanga a rawngbawltura koh kan ni lo, a khawngaihna zawk a ni tih kan hriat a pawimawh. Chuvangin, A rawng kan bawlna kawng hrang hrangah inthlahdah lovin, phur chang chang chauh ni lovin, A rawngbawltura min kohna ang ngei hian A duh angin rawng I bawl ang u. Thui tak sual kawng zawh tawh leh zawh mek kan ni thei, thlarau nunah hliam na tak tur mek kan ni thei, Lal Isuan kan damna atan min ko a ni tih hriain a hnen pan  ila, Tin, mahni peih chin chauha a rawngbawl thin, Pathian aia mite mithmuha lan mawi zawk tum a rawngbawl kan ni em? Chung chu Pathian rawngbawlna a tling dawn em ni? Inngaihtuah chiang I la, Thalaite hi a rawngbawl turin Isuan min ko a ni tih I hre chungin A duh danin a rawng I bawl ang u.

                        Lalpan a thu malsawm rawn se.

NUN A CHANCHINTHA HRIL (Sermon)

NUN A CHANCHINTHA HRIL
Matthaia 28:19,20. Galatia 6:1,2

Pathian hruaina leh awmpuina in Beihrual hun Kohhranhoten kan lo thleng leh ta, he hun hi ringtute kan intih chak tawnna leh mi hla zawk leh chak lo zawk te kan in dawm chhuahna hun atan hmang thei ila a duhawm hle. Hapta hmasa ber ah Mission field hrang hrang te chanchin leh an rawngbawlna tlangpui kan zir chho a, a ngaihnawm in a bengvar thlak hle mai a, Chanchin Tha la tam zia leh tan kan lak a ngaih nasat zia kan hre thei mai awm e.

    Matthaia 28:19,20 ah chuan, “Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u.” tih kan hmu a, chuvangin kan Lalpa Isua hian Chanchin Tha hril hi a ngaipawimawh em em a ni tih a hriat theih, a zirtirte kha a ngen a ni mai lo, an tih ngei ngei tur thupek a hnutchhiah a ni. Keini pawh amah ringtute hian he chanchin Tha hril hi kan ngaihthah thianglo a ni. Khawvel a kan awm chhung chuan kan tih ngei ngei tur a ni kan ti thei awm e. Chuvangin, ringtu inti si a Chanchin Tha hril kan ngaihthah si chuan kan thlarau nun kan inennawn a ngai ngei ang. Chutihrualin, chanchin Tha kan hril theih dan kawng erawh a inanglo ang. Thenkhat ram hla tak tak a an kal laiin thenkhat mahni vengah te, mahni inchhung leh thenawm khawvengah te, chutiang zelin Chanchin Tha hrilna tur a tam thei hle awm e.

Eng nge CHanchin Tha chu: Kan hriat vek hnu mah ni se, kan sawi thar ve duh a, Lal Isua min chhandamna chanchin hi Chanchin Tha chu a ni kan ti thei awm e.(Kawng hrang hrangin a sawi theih awm e) Amaherawhchu, a awmzia hre bel hlei hlui chung hian nunpui kan harsat fo thin. Tawngka mai chuan Lal Isua chanchin sawi in, Chanchin Tha hril a tul zia tlangaupui chiam chiam thin mah i la, keimahni nun ngei a lanchhuahtir a nih loh chuan awmzia a neilo fo thin. Hei tak hi ringtuten kan mu tan a ni fo mai. Khawvel a kan la awm chhung chuan kan in teh lo thei lova, kan thusawi leh kan nitin hun hman a kan nun dan inpersan thin lutuk hian kan rawngbawlpui te leh kan bul hnai a mite beng a ti thlep thei a ni tih kan hriat a tul. Chuvangin, kan nun in he chanchin Tha hi a hril loh chuan chanchin Tha awmzia tak tak hi kan hre tawk lo a ni mai lo maw?

Khawiah nge Chanchin Tha kan hril ang: Pathian tana in pe kan Missionary chhuanawm tak tak ten thahnemngai tak in ram thim ram rovah Chanchin Tha hrilin an awm mek a, keini erawh a hmun nghakin mahni Kohhranah kan phak ang tawk tawk in rawng kan bawl ve bawk a. A hmun nghakte kan pawimawh zia leh tan lak kan ngaih zia kan inhriat hi a tul hle in ka hria. Kan kal chhuah ve theih loh avanga Chanchin Tha hrilna tur nei ta lo mai a inhriatna kan nei ang tih a hlauhawm hle. Kan velah hian Chanchin Tha hrilna tur tam tak a awm a ni tih kan hmu thiam theuh awm e. Keimahni kohhran huang chhungah te, kan khawtlang leh kan inchhung khur ngeiah pawh Chanchin Tha hi kan nun a kan hril zel a pawimawh a ni. A bul te atangin han sawi i la; ringtute hian mahni inchhung theuhah hian he Chanchin Tha hi hrilin kan nupui/pasal, kan tu leh fa, kan nu leh pa leh kan chenpuite mit hmuhah ngei hian nunpui i la, keimahniah Lal Isua hmel an hmuh chuan tunai hian awmzia a neih ngei a rin awm. Chutiang nun kan neih phawt chuan kan thenawmte hnenah te, kan Kohhranah leh khawtlang nun thlengin rah tha a chhuah ngei ang.

Ringtute hnenah pawh Chanchin Tha hril a tul: Galatia 6:1,2 a kan hmuh angin, kan ringtupui te, kan rawngbawlpui te hnena Chanchin Tha kan hril hi a va pawimawh em!! Rinna kawnga chak lo zawk te thuhnuairawlh taka in pui a kan ritphurh te inchhawk tawn tur a min tih hi i hre thar leh ang u. Chutinilova, kan ringtupuite  mit hmuh pawh a Chanchin Tha hi kan nunpui thei lo a nih chuan ringlomite mit hmuah phei chuan Chanchin Tha hi kan nunpui theih a rinawm loh a ni. Chuvangchuan a lawm kan inkhawm ve thin te, Pathian thu kan sawi te leh Pathian hminga ti ve ni a kan inhriat thinna te hian mite nunah awmzia a nei lo thin a ni.

    Chuvangin, kan rawngbawlpuite hnenah ngei pawh hian kan nun in Chanchin Tha hril i la, chu mi atang chuan ringtute kan inchhemalh tawn a nga, Kohhran nung tak, rawngbawlhina nuam tak kan neih ngei ka beisei tlat a. Chuta tang chuan kan theih tawk in tawngtaina nen kan Missionary-te pawh chak zawk in kan pui thei a nga, kan bul vel a ringlo mi awmte pawh in kan nun atangin Lal Isua hi an hmu tawh ngei ang tih hre chungin he Chanchin Tha hril hi i ngaipawimawh deuh deuh ang u.
    Lalpan a thu malsawm rawh se.

    

PATHIAN PAKHAT CHAUH A AWM A, PATHIAN ERAWH TAM TAK KAN NEI THEI (Sermon)

PATHIAN PAKHAT CHAUH A AWM A, PATHIAN ERAWH TAM TAK KAN NEI THEI

Sam 83:18, I Korinth 6:12

    Kan Kohhran thurin Pahnihnaah chuan ‘Pathian pakhat chauh a awm a, Amah chauh chu biak tur a ni. .......’ tih a ni a. Tin, Bible-ah pawh Amah chu Lalte lal hotute hotu pathiante Pathian anih thu hmun tam takah kan hmu nghe nghe a ni, chu chu Kristian ten kan rindan pawh a ni reng a ni. Thusawm pekah pawh keimah lo chu pathian dang i neitur a ni lo a ti a, chu vangin kan Pathian hian Amah lo chu pathian dang kan biak leh a rawng kan bawl hi a phal lo a ni.

    Kan Pathian (Jehova) kan sawi hmain Pathian han tih tawngkam hi han sawi zau lawk thain ka hria a. Kan pi leh pute hun daih tawhah pawh lei leh van siamtu Pathian nung kan tih hi an hriat hma pawhin engkim siamtu/engkim chunga thu neitu leh an natna chungah pawh thu neitu awmin an ngai a, chu chu tunge tih hre lovin an rin zawng zawng tihlawm tumin an be mai thin a ni. Tunge tih an hriat miau loh avangin Pu Vana/Khuanu ti tein an sawi mai thin a nih kha. A nihna takah chuan khang an ngaih ruatna ang khan ni tur leh dik ni a an hriat kha an Pathian ta mai thin a ni. Chuvangin, Pathian tih awmzia in a ken nia lang chu, keimahni a thu neitu lian ber engkim a kawi a ngila a thu kan awih leh kan zawm kan nun va innghahna taka kha kan pathian ti pawhin a sawi theih awm e. Chuvangin, Pathian tih awmzia ni a lang ta chu Mihring emaw thil eng emaw keimahni a bawiha kan va in tuk luhna kha,,, a in tuluttu khan a Pathian a chu a ni thei mai awm e.
    Bible-a kan hmuh dan: Pathian ngei chuan a hming awmzia chu a chhiahhlawh rinawm Mosia hnênah a hrilhfiah a. Mosia’n Pathian hming awmzia a zawh chuan Jehova chuan: “AWMA KA NI,” tiin a hming awmzia a hrilhfiah a. (Exodus 3:14) Rotherham-a Bible lehlin chuan chu lai thu chu: “Ka nih duh ang apiang chu ka ni ang,” tiin a let chhuak thung. Chuvângin, Jehova chu a thiltumte tihpuitlin nâna a tûl ang apiang a innihtîr thei tihna a ni.
    I duh apiang ni thei tûrah han inchan chhin teh. I thiante tân mi eng ang nge i nih dâwn? I thian tuemaw chu dam lo ta se, doctor thiam takah inchantîrin i tidam ngei ang. I thian dang leh chu sum dâwnna lamah tla chhe ta se, mi hausa taka changin, amah chu i tungding leh ngei bawk ang. Mahse, a nihna takah chuan, chutiangin i duh ang apiang chu i ni thei si lo. Kan zîngah hian chutianga duh ang apiang ni thei rêng rêng kan awm lo. Bible kan han zir chhoh zêl hian, Jehova chu a thutiamte tihpuitlin nâna a tûl ang apiang a innihtîr theih dân mak tak chu i hmu chhuak ngei ang.
    Sam 83:18 kan chhiarah pawh khan a chiang viau awm e. A chang hma lam kan chhiar chuan israel faten an hmelmate tlawm nan a an dilna a ni a, Amah chauh kha Pathian (Jehova) hming pu, leilung zawng zawng chunga chungnung ber a ni tih kha an hmelma te pawhin an hriattheihna atan a thiltihtheihna an dilna a ni. Chutiang Pathian chu kan biak Pathian chauh hi a awm a ni tih kan hriat chian a tul fo reng a ni.
ATHEIST:
    Pathian emaw, thiltithei bik an awm hi an ring lo a. Hetiang ngaihdan nei hi kum zabi 18-na atangin an awm tan a. Khawvel pumpuiah hian a hluar chak em em a, engzat chiah nge awm tih hriat hleihtheih a ni lo a, inchhiarna hnuhnung berah chuan Christian 31.5%, Muslim 23.2% leh Unaffiliated(Nonreligious[b]/Agnostic/Atheist) 16.3% an awm mek a ni
    Mizoramah ngei pawh Pathian awm ring lo an lo awm ve ta teuh mai…Tunlaiin a bik takin Sapram kan tih mai khawthlang ram lamah khuan Pathian awm ring lo Atheist an tih ho hi an pung nasa em em mai a. Kan ram ngeiah pawh hian a pawl ang chiah chuan an awm tawh em chu ka hre chiah lo na a, mahse Sapho tihdan a chhe lam apiang la chak em em, a tha lam lak nachang hremang si lo kan Zoram thalai te zingah pawh hei Facebook lamah te chuan Atheist Group te pawh a lo awm ve ta reng mai. Abik takin thalai te ziangah Pathian awm rinlohna hi a hluar zual hle mai a, tin intih engemaw nana lo hmang tawk pawh tamtak Mizo thalai te zingah ngei pawh kan lo awm ta niin a lang, chuvangin Atheist an tih chu enge ni a, Pathian awm hi an lo ringlo tak tak em, tih te hi an chhut ngai em aw ka ti thin.

    Sam 14:1 ah chuan Mi A chuan a rilruin “Pathian reng a awm lo a ti a” tih kan hmu a, Beisei chhan tam tak khawvelah kan nei a, Sakhuana satliah mai ni lo, vanram kai phaka nunna leh rinna, Kristianna nasa takin a chiahpiahna ramah kan awm bawk a, nu leh pa leh chhungkua, u leh nau bang lova kan tana min tawngtaisak reng tu kan neih lai leh kan duh ang ang a che thei a kan taksa khawl vawng nung reng tu Pathian kan neih lai hian, intihtheihna angreng emaw, inlak danglam nan emaw, intih changkanna emaw ti tlat a “KEI CHU ATHEIST KA NI, PATHIAN AWM KA RING VE LO” lo tih vel hi chuti tehchiam in a ropui hauh lo mai. mithiamte chuan Atheism hi changkanna nilo in VANDUAINA lian tak a ni daih zawk a ni, a ti. Isua Krista kan pawm leh pawm loh chu thuhran ah pawh lo dah ta ila, PATHIAN Pakhat, engkim dintu, siamtu leh reltu, engkim hmu a hre vek tu hi chu a awm ngei a ni tih kan Bible daw ve ngai lo hian chiang takin min hrilh tlat bawk a ni.

    Ziaktu pakhat chuan Pathian awm ring lo hi an awm tak tak miah lo. A chhan chu Mihring hian ama duh dana zalen taka tal vel hi a thlahlel a, amah control a, kaihruaitu hi hnawk a ti em a, chuvang chuan PATHIAN hi awm lo se a duh a ni an ti. Mihringin Pathian a be (worship) duh lo a nih chuan, ama siamchawp pathian emaw, ama ngaihdan leh suangtuahna emaw tal pathian chawpin a be ngei ngei tho zu ti a!
   
PATHIAN TAM TAK KAN NEI THEI!!
    Pathian nihna leh awmze hrang hrangte leh Pathian awm ringlo te chungchang kan sawi nual tawh a, Pathian Pakhat chauh a awm lai hian keini eerawh chuan Pathian tam tak kan nei fo em? Keimahni theuh kan inchhut ngai em le? I Korinth 6:12 kan chhiarah khan Tirhkoh Paula chuan, thil engkim tih ka tan a thiang a, nimahsela engkim tih a tha kher lo; thil engkim tih ka tan a thiang a, nimahsela engbawihah mah ka in phal lo. a ti a, ka thiltih thin tam tak te bawihah kan insiam a nih chuan chu chu kan Pathian ta tihna a ni thei awm e, tirhkoh chuan chu chu ka phal lo a ti. Pathian aia intuk luhna tur dang neih a duh lo a ni.

Eng te nge kan pathian: Khawthlang ram thenkhat (Sap ram) te kan thlir chuan mi tam takin football an atchilh a sakhuaah an nei a ni ber a, Pathian biakna tur hun pawh nei lovin Weekend-ah Football stadium-ah an khat mup mup thin tih pawh kan hmu theu awm e, chu chu an an Pathian a ni ta ber a, chutiang zelin Pathian pakhat chauh a awm tia kan sawi lai hian thil dang deih kan lo Pathian reng thei a ni tih kan hriat a tul awm e. kawng hrang hrangin sawitur awm mahse kawng 3 chauh han thlir ila;

1.     SUM/PAWISA: Kan nitin nun leh khawsakna kawng hrang hrang han thlir ila kan nunin engnge a dah pawimawh bera, engnge kan nun luahtu ber ni ta ang le? he khawvel damchhung khawsakna leh mamawh ni a kan inhriatna te hian kan nun hi nasa takin a kaihruai tawh a, hna thawk thei tur leh hna tha tak tak min pe tu Pathian aiin a hna min pek kan buaipui a, kan mamawh phuhruk tur atan a Sum min petu Pathian aiin Sum kan ngaipawimawh ta zawk bawk si. Kan sum hmuhna tur kan kal san ai chuan a rawngbawlna han hlamchhiah leh han kal san zawk mai pawh kan awlsam zawk hial in a hriat ta... Chutiang dinhmun a ding kan nih chuan kan pathian a chu kan biak Van Pathian khi nilovin SUM a ni ngei ang. Sawi tur tam tak a awm awm e, m i tam  tak chuan Sum hi kan pathian chiang a ni. mahni theuh inenfiah ngam ang u.

2.    RUIHHLO: Kan hun kal tawh te han chhui kir ila ruihhlo engchi mah la ti ngailo hrim hrim chu sawi tham kan awm meuh lo mai thei a ni. Amaherawhchu, kan tih tam dan erawh a in anglo fur awm e. Kristian inti si in heng ruihhlo te hi thlah harsa kan ti fo thin a, engemaw hunpui leh chaw eikhawm nikhuaah tam tak chuan kan paltlang hlei thei lo chu a ni ber a, chumai ni lovin thenkhat phei chuan kan thlah phal lo a ni ber mai. Chutiang khawpa kan nun kaihruaitu leh kan thlah theih loh a bawih  a kan tan tlat a chu kan lo Pathian reng a ni lo maw?? Chutiang kan awm a nih chuan kan pathian mek a hi kan thlak a ngaih ngei a rinawm a ni.

3.    NULAT/TLANGVALNA: KTP te chu a tam zawk nula/tlangval kan ni a, kan inngaihzawnna kawng chung chang hi tlem a zawng han tarlang ila, tam tak hi chu Pathian aia kan bialnu/bialpa te thu ngaipawimawh zawk, Inkhawm/hla zir/hnatlang leh activity aia kan bialnu/biala te thlang zawk fo hi KTP huang chhungah hian tam tak kan awm ngei a rinawm!! Biak In ah darkar 1 vel lek pawh thuhutna nuam taka thu peih lo khan kan bialnu./bialpa te bulah chuan khawilai hmun remlo leh chep thim rek ruk hmun rimchhe tak karah pawh darkar 2/3 lai pawh kan tawm reng peih tho nia!! Chuvangin, ngaihzawng kan neih pawhin a neih dan tawk kan thiam a tul awm e, kan biak pathian aia ngaihpawimawh zawk ngaihzawng kan neih hi a fuh ber lo maithei a ni (Chutiang bawkin Pathian thu aia nupuite thu ngaipawimawh zawk pawh a awm theih tho a nia.....) Chuvangin, Pathian aia kan ngaihzawng/Nupui te kan dah pawimawh zawk chhung chan kan pathian a ni thei mai zawk lo maw???

    Chuvangin, Engkim siamtu engkim bul leh tawp, min chhandamtu, chatuan nunna min pe theitu chu kan Pathian chauh hi a ni tih kan hriat nawn fo a tul awm e. keimahni duh ang leh chak zawng chauh ngaihtuaha kan nun kan hman chuan kan hriat loh laipawhin a thilsiam thildang tam tak hi kan lo Pathian reng thei a ni tih hre thar chungin keimahniah hian amah chauh hian Pathian nihna dik a chan theihna atan Lalpa’n a thu malsawm rawh se.
      

Pathian hmuh chu thihna a ni (Sermon)

PATHIAN HMUH CHU THIHNA  A NI
THIH CHU PATHIAN HMUHNA A NI

    Pathianin mihringte a siam tirh atangin a thilsiam mihringte nena inlaichinna siam a, inpawlna thianghlim neih hi Pathian chuan a tum reng thin, Evi leh Adama te bawhchhiatna sualah an tluk luh hnuah pawh Pathian chuan mihringe nen inlaichinna kan neih theihna atan kawng hrang hrangin thu a thlung a, Abrahama, Isaka Jakoba te hnenah thuthlung siamin Amah zawkin bul atan zel a. Chutichuan thuttiam avanga a roluah turin Israel fate a thlang a ni. Chung a hnam thlante chun Amah an hawi san chuan a thunun bawk thin a ni. Chutichuan Aiggupta ramah bawihah tangin hrehawm leh rim taka chhawr leh tihduhdahin an awm a, an mangang autham chu Pathian hnen thlengin Pathianin Aigupta ram atangin a hruai chhuaka, tuipui sen kanin thlalerah hun tam tak an hmang tawh a. Sinai tlang thlengin chutah chuan Lalpan Mosia a bia a, Israel faten an zawm tur leh an tihtur an hriat theihna atan he hmunah hian Dan a pe a nih kha.
    He hmunah hian Pathian ropui zia nasa takin a lang kan i thei awm e. Pathianin Mosia hnenah, i miten kei hi Pathian engkimtithei Aigupta bawih ata hruai chhuaktu ka ni tih an hriattheihna atan an hnenah thu ka sawi dawn a ni tiin a hrilh a, amaherawhchu anmahni an intihthianghlim dan tur te, an silhfel thlenga then thianghlim tur thu te a hrilh vek a ni.Chutichuan Pathian rawn chhukna tur tlangah chuan tumah an kal tur a ni lova a tlang a kha mihring emaw ranin emaw a tawh pawh an tawk tur a ni lo, chuti nilova an lo tawk emaw an awm a nih chuan tih hlum ngei tur a ni. Tin, Pathian chu a ropui em avangin a mihringten an hmuh chuan an thi mai dawn a ni tih pawh kan hmu bawk a ni. Chutiang khawpa ropui a thusawi leh thawm ringawt pawh mihringte tana tihbaiawm a nih avangin Mihring pangai tan chuan a hmel han hmuh chi ziazang a ni awm lo ve. Chuvangin, Pathian hmuh chu mihringte tan chuan thihna a ni ringawt mai a ni.

    Kan mittin thil kan hmuh avanga keimahniah danglamna min thlen thintu thil chu kan rin loh lutuk anga kan hmuh emaw, kan ngaihtuah phak baka thil kan hmuh emaw mak kan tih khawp a ropui emaw a nihin, tin kan hlauh zawng tak emaw rapthlak kan tih zawng tak kan hmuh emawin keimahniah danglamna nasa tak min thlen thei a, thenkhat phei chu an thidang hial a. Tin, an hriselna in a tawrh hial te pawh an awm awm e. Chutiang chu mihringte kan dinhmun a nih avangin, Israel fate hunah pawh hian Pathiian hmel a ropuina nasa tak nena an hmu tur chu mihringte tan thih lohna tur rual a ni lo a ni. Chutiang khawpa ropui chuan thuthlunghlui hunah khan pathian chu a mite hnenah a inhriattir thin a, a hming pawh an sawi mai mai ngam ngai lo a ni. Amaherawhchu, chutiang khawpa Pathian tihbaiawm awm leh ropui a ni tih hre mahse Israel fate khan thil tam tak Kanan ram an thlen hma pawhin an tisual fo a, Pathian dang an biak san fo thin a nih kha. Keini pawh Pathian nihna hria inti viau thin mahila, kan bosan in kan tluk san fo thin reng a ni. Pathian ropuina leh nihna hi kan chiang tawklo a ni lo maw?? Chuvangin, keini pawh kan in enfiah fo a tul awm e.

THIH CHU PATHIAN HMUHNA A NI:
    Thuthlunghlui hunah mihringte tan Pathian hmuh leh biak theihloh avang te pawh a ni mahna, Pathian leh mihringte inkara inlaichinna tha nei turin Pathianin kawng hrang hrangin thu thlung mah se, mihring ten kan zawh famkim zo si lova. Amah ngei mihringah lo changin thiamchangna tura mahni inchhandam theilo te chatuana fa nihna kan chan theihna atan a lokal ta a ni. Chumi a chinah chuan mihringte leh Pathian inkara inlaichinna tha siam tur chuan mitinin Pathian kan dawrna leh a thu kan awihnaah a innghat ta a ni.

    Thuthlunghlui hunah Pathian hmuh chu thihna a ni, kan tihlaiin Lal Isua a lolanga Thihna hmangin Sual chu hnehin a awm ta, chuta tang chuan kan chhandamna thuthlung kalkawng chu a inthlak ta thawk mai a ni. Amah Isua kan hmuh theihna tur atan chuan he kan mihring zia hi a thih hmasak phawt a lo ngai ta thin a ni. Sual lamah kan thih loh chuan Amah kan hmu tak tak theilo fo kan ti thei awm e. Amah hmuh phawta chuta tanga a rawngbawl a, a hnungzui chauh turah kan inngaih chuan kan tisual fo awm e. keimahni hian tih hmasak tur kan nei, keimahnia sual tih chakna kawng hrang hranga lo awm thinte hi a pawng atakin min rawn hnehsak ringawt dawn lo. Chu tihduhna sual keimahnia a lo thlen changa kan thihsanna atang chuan a lawm Ahmel kan hmuh thin zawk chu.. Chuvangin, a lawm tuarna phena malsawmna an lo tih thin, keimahnin kan tuar ve hram hramna phenah chuan a hmel mawi tak chu kan hmu a, chu chuan thlamuanna leh lawmna sawi hleihtheihloh min pe zawk thin a ni.

    Tirkoh paula chuan, Nitin ka thi thin a ti a ni. He thu atang pawh hian a chiang mai awm e. Paula hian nitin Amah ka hmu a chumi avang chuan nitinin sual ka thihsan thin a ti lo. helai thu hi han ngaihtuah chiang ila, Bible chang lar tak leh kan hriat lar em em a ni. Amaherawhchu, engnge keimahni nunah hian engangin nge kan sengluh ve le. Kan chakna sual thihsan kan hreh a, kan peihlohna in min uai bet fova, chhuanlam fahrah te te avangin kan thihsan phallo fo thin a ni hi. mitam tak phei chuan keimahah thawktu a awmlo, te kan ti leh ngawt zel a, keimahniah phurna riau loawm a chu mi chin chauha rawngbawl kan tum chuan kan kristianna kha enfiah a ngai ngei ang.

    Thihna han tih hian sawifiah hranpa a ngai lovang chu, dan naranin mithhi tawh hi an tho leh ngailo khawp mai, kan thih chuan thlanah rorelna hun tur nghakin kan inzalh thin a ni. Mahse, engatinge kan rinna nun kawngah hian ka thi kan tih hnuah pawh hian kan thawhleh fo thin le!! Nge thi tak tak lovin kan lo thi der mai mai zawk? Mite kan nihna ngei leh nihna nichiah lo te pawh a min sawina avang mai mai ten thi tawh inti te hi kan nung leh fova, kan ngaihdan lo deuh zawng thil a lo thlen emaw sum leh pai a kan hlawkna tur thil (thianghlim chiah lo pawh ni se) kan hmaah a lo thlen changin kan la thih tak tak loh zia kan tilang leh thin a nih hi maw!! Mihringhlui thih san a Krista hmu tawh tak tak tu nunah chuan engang pawh lo thleng se Isua a hmasa zawk ngei tur a ni dawn lawm mi!

    Hla siamtu chuan “ Sa ruangah min siam rawh, Mulukawlte ei turin” a ti a, tui takin kan sa thup thup thin. Mahse, kan ngaihtuah chiang ngai em? Mulukawlte ei theih tur khawp hian kan thi tak tak reng em? Mulukawlh te chuan sa reng reng a dam lai in an ei ngai lo a ni. Mulukawlhte chu sawi loh kan rawngbawlpuite ei theih tur pawh hian kan thi lo a nih chuan he hla hi sa ngam tur kan ni angem? Miten kan khawi lai pawh hi rawn ei dawn se, ka ngaihdan a ni lo, tiin kan tho at lawng maw,,, ei chu sawiloh chuatiang kha tiang chuan min sawi tih mai mai pawh kan pai dam theilo a nih chuan ei theih tur chuan kan thilo a ni ang.

    Chuvangin, kan mihring hlui hi thih san ila Isua hmel kan hmu anga, chutih hunah chuan Amah angin kan nung tawh anga, tichuan kan rawngbawlpui leh midangten kan nunah eitur an hmu ngei ang. Chutiang a midangte eitlak nun kan neih a, nitina sual kan thih san theihna atan Lalpa’n a thu malsawm rawh se.