NUN A CHANCHINTHA HRIL (Sermon)

NUN A CHANCHINTHA HRIL
Matthaia 28:19,20. Galatia 6:1,2

Pathian hruaina leh awmpuina in Beihrual hun Kohhranhoten kan lo thleng leh ta, he hun hi ringtute kan intih chak tawnna leh mi hla zawk leh chak lo zawk te kan in dawm chhuahna hun atan hmang thei ila a duhawm hle. Hapta hmasa ber ah Mission field hrang hrang te chanchin leh an rawngbawlna tlangpui kan zir chho a, a ngaihnawm in a bengvar thlak hle mai a, Chanchin Tha la tam zia leh tan kan lak a ngaih nasat zia kan hre thei mai awm e.

    Matthaia 28:19,20 ah chuan, “Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u.” tih kan hmu a, chuvangin kan Lalpa Isua hian Chanchin Tha hril hi a ngaipawimawh em em a ni tih a hriat theih, a zirtirte kha a ngen a ni mai lo, an tih ngei ngei tur thupek a hnutchhiah a ni. Keini pawh amah ringtute hian he chanchin Tha hril hi kan ngaihthah thianglo a ni. Khawvel a kan awm chhung chuan kan tih ngei ngei tur a ni kan ti thei awm e. Chuvangin, ringtu inti si a Chanchin Tha hril kan ngaihthah si chuan kan thlarau nun kan inennawn a ngai ngei ang. Chutihrualin, chanchin Tha kan hril theih dan kawng erawh a inanglo ang. Thenkhat ram hla tak tak a an kal laiin thenkhat mahni vengah te, mahni inchhung leh thenawm khawvengah te, chutiang zelin Chanchin Tha hrilna tur a tam thei hle awm e.

Eng nge CHanchin Tha chu: Kan hriat vek hnu mah ni se, kan sawi thar ve duh a, Lal Isua min chhandamna chanchin hi Chanchin Tha chu a ni kan ti thei awm e.(Kawng hrang hrangin a sawi theih awm e) Amaherawhchu, a awmzia hre bel hlei hlui chung hian nunpui kan harsat fo thin. Tawngka mai chuan Lal Isua chanchin sawi in, Chanchin Tha hril a tul zia tlangaupui chiam chiam thin mah i la, keimahni nun ngei a lanchhuahtir a nih loh chuan awmzia a neilo fo thin. Hei tak hi ringtuten kan mu tan a ni fo mai. Khawvel a kan la awm chhung chuan kan in teh lo thei lova, kan thusawi leh kan nitin hun hman a kan nun dan inpersan thin lutuk hian kan rawngbawlpui te leh kan bul hnai a mite beng a ti thlep thei a ni tih kan hriat a tul. Chuvangin, kan nun in he chanchin Tha hi a hril loh chuan chanchin Tha awmzia tak tak hi kan hre tawk lo a ni mai lo maw?

Khawiah nge Chanchin Tha kan hril ang: Pathian tana in pe kan Missionary chhuanawm tak tak ten thahnemngai tak in ram thim ram rovah Chanchin Tha hrilin an awm mek a, keini erawh a hmun nghakin mahni Kohhranah kan phak ang tawk tawk in rawng kan bawl ve bawk a. A hmun nghakte kan pawimawh zia leh tan lak kan ngaih zia kan inhriat hi a tul hle in ka hria. Kan kal chhuah ve theih loh avanga Chanchin Tha hrilna tur nei ta lo mai a inhriatna kan nei ang tih a hlauhawm hle. Kan velah hian Chanchin Tha hrilna tur tam tak a awm a ni tih kan hmu thiam theuh awm e. Keimahni kohhran huang chhungah te, kan khawtlang leh kan inchhung khur ngeiah pawh Chanchin Tha hi kan nun a kan hril zel a pawimawh a ni. A bul te atangin han sawi i la; ringtute hian mahni inchhung theuhah hian he Chanchin Tha hi hrilin kan nupui/pasal, kan tu leh fa, kan nu leh pa leh kan chenpuite mit hmuhah ngei hian nunpui i la, keimahniah Lal Isua hmel an hmuh chuan tunai hian awmzia a neih ngei a rin awm. Chutiang nun kan neih phawt chuan kan thenawmte hnenah te, kan Kohhranah leh khawtlang nun thlengin rah tha a chhuah ngei ang.

Ringtute hnenah pawh Chanchin Tha hril a tul: Galatia 6:1,2 a kan hmuh angin, kan ringtupui te, kan rawngbawlpui te hnena Chanchin Tha kan hril hi a va pawimawh em!! Rinna kawnga chak lo zawk te thuhnuairawlh taka in pui a kan ritphurh te inchhawk tawn tur a min tih hi i hre thar leh ang u. Chutinilova, kan ringtupuite  mit hmuh pawh a Chanchin Tha hi kan nunpui thei lo a nih chuan ringlomite mit hmuah phei chuan Chanchin Tha hi kan nunpui theih a rinawm loh a ni. Chuvangchuan a lawm kan inkhawm ve thin te, Pathian thu kan sawi te leh Pathian hminga ti ve ni a kan inhriat thinna te hian mite nunah awmzia a nei lo thin a ni.

    Chuvangin, kan rawngbawlpuite hnenah ngei pawh hian kan nun in Chanchin Tha hril i la, chu mi atang chuan ringtute kan inchhemalh tawn a nga, Kohhran nung tak, rawngbawlhina nuam tak kan neih ngei ka beisei tlat a. Chuta tang chuan kan theih tawk in tawngtaina nen kan Missionary-te pawh chak zawk in kan pui thei a nga, kan bul vel a ringlo mi awmte pawh in kan nun atangin Lal Isua hi an hmu tawh ngei ang tih hre chungin he Chanchin Tha hril hi i ngaipawimawh deuh deuh ang u.
    Lalpan a thu malsawm rawh se. (Horeb Chanchinbu sermon)

    

THALAITE MAMAWH ISUA (Sermon)

THALAITE  MAMAWH  ISUA

I Samuela 17:38,39    Johana 14:6   

    Tunlai khawvel han thlir ila, a bik in Thalaite hi kan buai tawh em em mai a, khawvelin changkanna tam tak min rawn chhawp chhuah sak avangte pawh a ni mahna, duh leh it zawng kan ngah ta hle mai. Chung kan duh zawng leh kan it zawngte chu mamawh ta riau a inhirtna lian tak kan nei a, chumi neithei tur chuan nasa takin kan bei thin reng a ni. Kan nitin khawsakna a thil tul aiin kan duh zawng leh it zawngte hian hmun a chang lian tawh zawk kan ti thei awm e. Chuvangin, mamawh hlirin kan nun kan hmang a, rual awt reng rengin kan nun kan hmang a ni ber mai, mite neih theih ang neih theihloh hlauvin a thim a var pawh thlu lovin kan bei chu a ni ber awm e. Hetianga duh leh mamawh tam tak nei nia kan in hriat lai hian enge kan mamawh ber chu ni ta? Mobile phone, Bike, Car, thawmhnaw etc etc em ni le? Chu kan mamawh nei tur chuan engtiang chiahin nge kan thawh ve le?

Mihringten mamawh nia kan inhriatte:   
    Mihringten a kan duh ber leh kan zawn ber chu HLIMNA leh NAWMSAKNA a ni kan ti thei awm e.(KTP emaw thian ho emawa hun kan hman reng reng in a nawm leh nawmloh kan inzat thin, a nuam leh hlimawm lo turah chuan kan kal peih tak tak lo a ni e. Hei hian Thalaiten a hlimna leh nawmna kan mamawh zia a tilang awm e) Amaherawhchu, chu hlimna nei tur chuan kan zawn dan erawh a in ang lo. Thenkhatin zu leh sa leh ruaihtheih thil dang dangah hlimna tak tak a awm emaw tiin, chu lamah chuan thahnemngai takin kan tlan mek a, ruih lai chuan nuam pawh kan ti thei khawp mai. Engemaw tih nikhua leh hunpui lothlen chang apiang mai a ruih loh chuan kimlo riaua hriatna kan nei a,  mahni inchhungah vawksa/ui sa/bawngsa inthlahrung miah lova ei teuh ngam khan eng emaw tih nikhua leh chaw eikhawm nikhuaah no 1 tal emaw inloh chuan kan ei ngam tlat lo.

    Thenkhatin nulat tlangval nawm chenna ah nawmsakna tak tak a awm emaw tiin chu lamah chuan kan tlan mek bawk a. Mahse, nulat tlangval nawmchenna hi hlimna tak tak a lo tlinglo a niang, a ruka tih zel a ngai tlat!!! Ngaihtuah chian a tul hle mai. Hlimna leh lawmna min pe tak tak tu chu ni se, kan ram hruaitute leh kan kohhran hruaitute pawh hian an sawi chamchi anga, zirtirna pawh nasa taka kan inpek hial a rinawm. Mahse, hemi hmanga nawmchenna hian a daih reilo emai, kan nun min hliamtu leh damchhung a ser nung min siamtu mai a ni a, a tawpah inchhirna bak engmah rah chhuah a nei chuang lo a ni.

    Thenkhatin sum leh pai ngah hi hlimna tak tak emaw tiin chu lamah chuan thahnem kan ngai em em mai bawk a. Kan sorkar a department hrang hrang han thlir ila, keini ang han hmuh ve phak leh han hriat ve phak mai ah pawh hian sum leh pai diklo taka hmanna a nasat zia kan hmu in kan hria a ni. Dik taka tih a retheih ai chuan hlep rukna hmanga hausak kan duh ta. Chu chuan hlimna min pe emaw kan ti a, he khawvelah hian pawisa hi kan mamawh ber emaw kan ti a, mawi leh mawilo pawh thlu lovin pawisa nei tur hian thahnem kan va ngai em!!! Min siamtu pathian hian eng ang takin ngai ang maw???? A ni lah taka, pawisa hian thil a lo tithei em a tin ni. Kan khawtlang nunah pawh hian nei nung deuh thusawi leh pa berh ve tak thusawi in kawngro a in sut nasat hleih zia hi. Mi nei nung deuh in fiamthu an sawi chuan nuihzat thlak vaklo pawh nise nuih sak a tul thin. An eiruk hmangin In lian tak tak, Car nalh tak tak an nei a, zah a hnekin an la chapo pui lehnghal, zah chu khawi lam hi a ni ringawt.

     Khawtlang nun mai pawh a ni tawhlo, Kohhran huang chhung thleng pawhin a rawn dai zel a, ka sawi sual a nih chuan Pathian leh Kohhran hruaitute pawhin min lo ngaidam se, rawngbawlna chanvo hrang hrang in pek chungchangah te, chumai bakah hruaituten a member te kan thlir dan hrim hrimah pawh hian min neinung leh neinunglo kan thlir dan  pawh a dang deuh em aw!!. Kan Aizawl khawpui a Kohhran tam tak pawh hi han thlir ila, Kohhran Upa atan hial pawh kan inthlang ta zel zawng a nih hi. Pathian leh Kohhran tana a rawngbawlna aiin a sum leh pai thawhah te, a eizawnna hnaah te kan inthlir mah mah ta em? hetiang mite hi Kohhran mipuite pawh hian kan hai lo. Kohhran hian SUM a mamawh berlo, sum tam tak neih a, Thlarau thianghlim a ngam pat chuan si loh ai chuan, Kohhran pachhe ve tak, mahse Thlarau thianghlimin a chenchilh tlat Kohhran chu a thlanawm zawk ngei ang. Chuvangin, Pathian Kohhran te kan nih avangin kan fimkhur ava tul em! Setana hian hmanrua atan ahmang nasa si a, keini Kristian Thalai, nakina Kohhran hruaitu la ni mai turte hi kan fimkhur a tul hle a ni. Kan Lal Isua chuan, Matthaia 6:24- ah “Tuman hotu pahnih rawng an bawl kawp thei lo; pakhat huain pakhat an duh ang; a nih loh leh, pakhat tanin pakhat an hmusit ang. Pathian leh sum rawng in bawl kawp thei lo ve.”  tin a sawi a, keimahni theuh kan in enfiah a ngai hle awm e.

Pathian rin ngam kan mamawh:   
    I Samuela 17:38,39 kan chhiarah khan, Davida’n Goliatha a beih khan an lal Saula khan Davida kha a ma ralthuam bel in, dar lukum a khumtir a, awmphaw a hak tir a, khandaih a pai tir bawk a nih kha. Mahse, Davida chuan Lal Saula hnenah chuan “Ka kalpui thei dawn hauh lo mai a, hetiang hian ka la tichhin ngai lo a ni,” a ti a. Tichuan, Davida chu a inhlip ta a nih kha. Helai thu hi ka rilruah a awm reng thin. Davida khan Goliatha bei tur khan khang ralthuam tha pui pui kha a mamawh lo, a rin Pathian a hre chiang em em a, Ani chuan a tanpui dawn a ni tih a ring tlat a ni. Kha lai hunah khan Lal Saula ralthuam chauh nilo, a aia zangkhai zawk leh te zawk ralthuam dang inbel tur pawh a awm ngei a rinawm. A chhan chu Lal Saula kha palian tak a ni tih kan hre thei a. I Samuela 10:23-ah chuan, “Chutichuan an tlan a, an va hruai chhuak a; tin, mipui zinga a han din chuan mi zingah chuan a sâng ber mai a, tuma a koki khum pawh an awm lo”, a ti a. Chuvangin, Davida khan Lal Saula ralthuam kha a hak tawk hgmel loh hrim hrim a ni. Amaherawhchu, engvangin nge Lal Saula hian ama ralthuam kher kher Davida kha bel? Ngaihdan thenkhatah chuan, Lal Saula hian, Davida kha a zawh loh tur leh a chet pui theih loh tur tih a hriat reng ralthuam a bel tlat danah khan, Davida hian Goliatha hi hneh tak tak turin a duhlo a maw chu aw!!! a tih theih, chuti ni lo se, ama zawh tawk ralthuam bel tur tam tak a awm, ti a ngai pawh an awm.

    Heti zawng hian han sawi dawn ila, keini pawh kan tana tha zawk tur ni a lang thil tha tak tak hmang hian kan hmelma pa Setana hian thuam min bel a, chu chu kan hrethiam lo fova, kan chauh phah a, kan zo lo a, kan chhiat phah thin a ni. Chuvangin, Kan rawngbawlna a kan mamawh loh Setanana min bel zawng zawng hi kan hlih ngam a tul a ni. David pawh khan engtin nge a tih kha.  A.... khawnge min lo beih ve tak thutah invennan phaw tal te chu han keng ve reng reng teh ang emaw, Chemte tal te chu han pai ve reng reng ila pawh a ti chuanglo. A nihna ang angin Pathian rinchhan chungin a pen chhuak mai a, Israel Sipai zawng zawng tena an beih ngamloh Philistia palian chu a that ta mai a ni. Keini pawh han inthlir ila, Pathian rawng kan bawlnaah hian kan mamawhloh pui pui kan in bel hnem viau lo maw? Mite mithmuh a mawi duhna te, mite fak duhna te, tunlai tih dan leh a changkang zawk leh mite mitmhuh a ZEI nih duhna te kan in bel thin. Chuvang chuan a lawm kan rawngbawlna hi a nun theih loh a, rah tha a chhuah theih loh thin. Kan nunah miten Lal Isua hmel an hmu lo thin a ni.  Pathian ropuina atana kan mamawh miah loh ah hian kan inham buai lutuk ang tih a hlauhawm hle. Chuvangin, Davida’n Pathian rinchhan chunga khawvel ralthuam a hlip ngam ang khan, keini pawhin Pathian ropuina dal theitu kan inbel zawng zawng hi i hlip ngam i la, tichuan keimahni hmangin miten Pathian thil tihtheihna leh ropuina an hmu ngei ang.

3. Kan mamawh ber Pathian thil thlawn pek Isua:
    Genesis 3:21 ah chuan “Tin, LALPA Pathian chuan Adama tân leh a nupui tân chuan savun kawrfualte a siamsak a, a haktîr ta a.” tih kan hmu a. Adama leh Evi khan chhia leh tha hriatna thei rah an ei avangin Pathian thupek an bawh chhia a, chuvang chuan a chhia leh tha hriatna neiin Saruak an nih an inhria a, an saruakna khuh turin Theipui hnah an feng tih thu kan hmu a ni. Ti hian ka ngaihtuah thin, Evi leh Adama khan saruak annih an inhriat khan enge an mamawh ber?  Ekhai... khawnge saruak kan ni ta si a zu han rui ila kan saruakna hi a zia deuh mahna emaw chutiang kha tiang chu han ti phawt ila an ti reng reng lo. Kha an saruakna khuh thei tur khan Theipui hnah an feng mai a ni. Thing hnah a zawnga Theipui hnah kher kher, adang pawh a awm lo a maw le? Ti ten ka ngaihtuah thin a, mahse, an saruakna khuhtu tur kha an mamawh em a, an bul hnai a mi, an saruakna hliah thei tur awm chhun kha an hmang mai a nih a rinawm. Khatiang hnah thap lutuk thui pawh kal pui theih loh tur kha an hman a ngai a nia. Chu an mamawh chu hriain Pathian in an tan savun kawrfualte a siam sak a a hak tir a nih kha. Evi leh Adama hunlai deih atang tawh khan Pathian in mihringte mamawh phuhrukna atan khan thisen meuh chhuak in an mamawh a pe a ni. Kha savun kawrfual nei tur khan Ran thisen a chhuah a ngai a sin, tunge thisen chhuak lovin ransa atangin a vun chauh la chhuak thei ang. Chutiang chiah chuan Pathian in mihringte, chatuan a hremna tawk mai tur, hrehawm taka chatuan nun hmang mai tur min hmangaih avangin, a hnen kan thlen theihna atan mamawh kan nei tih a hria a, chu kan nunna tur atan a kan mamawh awm chhun Ama fapa mal neih chhun Lal Isua ngei chu thu mai ni lo, thisen chhuak in hrehawm tinreng tuarin min rawn pe a ni.

    Awle, ka thalaipui duh tak, he khawvel ah hian kan mamawh neih duh reng rengin kan hman hlel a, zu leh sa leh ruihtheih thil dangah te, nulat tlangval nawmchenna-ah te, sum leh pai duhamna leh kan mamawh ni a kan hriat kawng hrang hrangah kan tlan mek reng a. Mahse, heng zawng zawng hian kan mamawh ber min pe si lo, kan thlarau nun chhamdamna leh hlimna min pe thei a awm lo tih kan hriat ava tul em! Pathianin in kan mamawh a hria a, chu Thalaiten a kan mamawh min pek Lal Isua hi i pan mai ang u. A hnenah chauh hlimna leh lawmna tak tak a awm a, Johana 17:3    ah chuan “Hei hi chatuana nunna a ni, nang Pathian tak chauh leh I tirh Isua Krista hriat hi,” a ti a, Amah chauh hi Pa hnen kan thlen theihna kawng awmchhun a ni. “Keimaha kal lo chu tumah Pa hnen an thleng ngailo” a tih kha. Chuvangin sim ngai kan nei a nih chuan sim ila, insiamthat ngai kan nei a nih chuan i in siamtha ang u. Kawng engkim a kan mamawh dik tak Lal Isua hi i buaipui ber tawh zawk ang u.
    Lalpa’n a thu malsawm rawh se. Amen

Thalaite Isuan Min Ko (Sermon)

Thalaite Isuan Min Ko

II Timothea 1:9,Marka 10:49-52

            Kohna chungchang hi sawi dan tam tak a awm thei awm e. Thuthlunghlui lam kan thlir chuan Pathianin mi a koh chanchin leh a koh a te a thu puang tura a tirh thu te pawh kan hmu bawk a. Tun tumah erawh chuan Lal Isuan Thalaite min kohna lam sawi kan tum dawn a ni.

1.         Chhan neiin min ko: Mi kan koh reng rengin chhan nei lo in kan ko ngai lova, kan mamawh avangin leh anmahniah engemaw sawi duh kan neih emaw ti tura duh kan neihin emaw kan in ko thin. (Kan hminga kan in koh te, kut hmang te, mit mei leh thil dang chi hrang hrang hmangin). Chutiang bawk in Lal Isuan keini Thalai te hi min kova, awm mai mai tur leh mahni duh zawng zawng a nung turin min ko lova, chhan neiin a duh ang ti tur leh a mamawha a hman atan min ko kan ti thei awm e.

2.         Kan damna atan min ko: Marka 10:49-52 kan chhiar khan Mitdel Bartimaia tihdam chungchang kan hmu a ni. Bartimaia hi mitdel kutdawh mai a ni. Lal Isua a lo kal a ni tih a hriat khan “Davida fapa mi khawngaih rawh” tiin a auva, a bul a mi ten ngawi tura an khap pawhin a au zual sauh a nih kha, chu a au thawm chu Lal Isua beng a lo thleng ta, Lal Isuan “amah chu han ko teh u” a ti a, tichuan Lal Isuan a ko a ni tih a hriat khan (a ringhlel lo a ni) a puan a paih a a zuang tho nghal a ni. Mithiamte chuan heng kutdawhte tana an puan pawimawhzia an sawi thin a, an puan chu an sina an saruak khuhna atan an hmang a, tin kutdawhna atan an hmang bawk (an eizawnna ber atan an hmang) a ni an ti thin. Chutiang khawpa pawimawh chu Bartimaia hian Isuan a ko a ni tih a hriat khan a paih a, Lal Isua a pan a nih kha!!! Tichuan, Isua chu a hmachhawn ta ngei a, Isuan engtia ka tih nge I duh? a tih khan engmah thil dang a dil lo, “Rabboni hmuh theih ka duh” a ti a nih kha.

Tihian ka ngaihtuah thin, engvangin nge kha mit del kutdawh khan Isua hnenah khan Pawisa te, eitur te a dil loh? Eitur, pawisa, leh thildang a mamawh avangin kut a dawh a ni si a. Mahse, Isua hnenah khan a mamawh dik tak mit varna a dil tlat a ni. Keini ni ta ila, tun dinhmunah hian enge tih sak che ila I duh? Min ti ta se, khawvel hausakna leh ropuina, nawmna, sum leh pai (pawisa tam tawk leh hmanchawp tlem/Car/Bike/mobile phone/nula/tlangval hmeltha tawk fel si…..) te kan dil mai lawng maw? Bartimaia kha Isuan a mamawh tho sum leh pai leh thil dang pe turin a ko lo, a tana pawimawh ber a damna atan a ko a ni. Keini pawh chutiang bawkin, khawvela kan mamawh hrang hrang leh kan duh zawng/chak zawng min pe turin min ko lo, kan tana pawimawh ber kan Thlarau damna atan min ko a ni tih I hre thar leh ang u. Kan thlarau nunah natna tam tak nei, sual kawng thui tak lo zawh tawh leh zawh mek te pawh kan ni ang, tin, damna tak tak chang si lova KTP a inhmang mek (hliam nei reng chunga hnathawh hrehawm zia kan hre heuh awm e), rawngbawlpuite zah avanga ti ve hram hram te pawh kan ni maithei e, chutiang dianhmuna kan ding a nih pawhin tunah hian Lal Isuan a hnen pana damna famkim chang turin min ko a ni.

3.         A rawngbawl turin min ko: Thiltha ti atan a siam Thalaite hi kan thatlai hun hian Isuan a rawngbawl turin min ko a ni tih kan hriat a pawimawh hle. Pathianin Kohhran Committee leh kan hruaitute hmangin kawng hrang hrangin a rawngbawl turin min kova, KTP hruaitu, Group hruaitu, Tantu, Zaipawl, Sunday Scholl Zirtirtu etc…. chutiang zelin, chumai a ni lo, Amah faka inkhawmte, midangte tana malsawmna ni tura nunte kan awmna hmun apianga a rawngbawl turte in min ko a ni. Amaherawhchu, heng Lal Isuan min kohna zawng zawng aia ngaihpawimawh kan neih thin avang hian  min koh chhan ti hlawhtling lovin Jona ang maiin min koh lohna lam ah kan kal fo thin a nih hi!!!!

            Rev. Dr. Billy Graham-a chanchin han tarlang ila, Standard Oil Company in Far East ah Representative atan an sawm a. Hlawh pawh US$ 10000 an tiam a, chu an tiamna chu a hnial a, a vawihnihna atan US$ 25000 an tiam leh a, chu pawh chu a hnial leh a, a vawithumna atan US$ 50000 an tiam leh a chupawh chu a hnial fithla thak a ni. Chutah chuan Company lam chuan, Eng nge thil dik lo awm ta le? Hetiang a hlawh tam tak kan pek dawn chung pawha I hnial zel mai le an ti a, Billy Grahama chuan ti hian a chhang a, “thil dik lo a awm pawhin ka hre lo, ka hlawh atana min tiam pawh a tama atha khawp mai, amaherawhchu, he in hna hi a te lutuk a ni, a aia hna lian zawk leh pawimawh zawk Missionary turin Pathianin min ko a ni”. Tiin a chhang a ni. Keini, hian Pathian min kohna ai hian engnge kan dah len zawk thin le?  

            Vawikhat chu US President Coolridge khan  Missionary JOHN MOTT-A chu Japan-a America Ambassador hna thawk turin a sawm a, a ni pawhin a chhanna chu, “President zahawm tak, Pathianin a Ambassador turin min ko tawh a, ka beng hian kohna dang a hre thei tawh lo a ni”. Tiin a chhang a ni. Keini A rawngbawl tura min koh reng lai hian kan beng hian kohna dang ava hre hnem thin dawn tehlul em!!!! Isuan min kohna aichuan kan Bialnu/Bialpa te kohnain ngaipawimawh a hlawh fova (Nupui nei tawh tan, Isua kohna aiin kan nupuite kohna kan dah pawimawh zawk em??), Zu leh damdawi zun in min kohna te, Nulat tlangval nawmchenna, sum leh pai duhamnate, kan nitin mamawh hrang hrangte (mamawh vak loh, thianho thil tih khawm/intihhlimna etc..) kan dah lian zawk tlat thin a ni. Chumai a ni lo, Rawngbawlna huang chhungah pawh, rawngbawlhna chanvo hrang hrang kan hruaitute kal tlanga min kohna te tih hlawhtlin aiin kan lu na fek fek te, kan pum nuam lo riai riai te, kan peih lo ngawih ngawite kan dah pawimawh zawk tlat thin a ni. Kan in enfiah angai hle mai.

            A tawp berah chuan, Ani chuan kan thiltih angte ni lovin, ama ruat leh khawngaihna ang zawkin min chhandam a, kohna thianghlimin min ko bawk a; tih kan hmuh ang khan, Kan thiltih that vang leh kan tlin vanga a rawngbawltura koh kan ni lo, a khawngaihna zawk a ni tih kan hriat a pawimawh. Chuvangin, A rawng kan bawlna kawng hrang hrangah inthlahdah lovin, phur chang chang chauh ni lovin, A rawngbawltura min kohna ang ngei hian A duh angin rawng I bawl ang u. Thui tak sual kawng zawh tawh leh zawh mek kan ni thei, thlarau nunah hliam na tak tur mek kan ni thei, Lal Isuan kan damna atan min ko a ni tih hriain a hnen pan  ila, Tin, mahni peih chin chauha a rawngbawl thin, Pathian aia mite mithmuha lan mawi zawk tum a rawngbawl kan ni em? Chung chu Pathian rawngbawlna a tling dawn em ni? Inngaihtuah chiang I la, Thalaite hi a rawngbawl turin Isuan min ko a ni tih I hre chungin A duh danin a rawng I bawl ang u.

                        Lalpan a thu malsawm rawn se.   (Dt.22.7.2013 Thawhtan zan KTP Inkhawm Sermon)

Fimkhur Taka Nun hman (Sermon)

Fimkhur Taka Nun hman

Isaia 38:15,  Sam 90:9, Thuhriltu 3:10-12

          Tunlai kan nundan te han thlir hian nasa takin a bikin setana hian thalaite min bei nasa em em a ni. Nula hmeltha tak, an hmelthatna avang ringawta pasal hmu zo chuang lo, natna thalo tak leh nun khawlohna hrang hrangin a tihchhiat mek tam tak an awm a, chutiang bawkin tlangval hmeltha leh pian tha tak tak, Pasal atana neih tlak loh, ruihhloin a tihchhiat tam tak an awm bawk a ni. Hetianga an awmna chhan ber ni alang chu an NUN an hman thiamloh avang a ni kan ti thei awm e. Thuhriltu in “Thalaite u inthat lai chen rawh u” a tih thu chu kan hre em em, hemi changchawi hian Pathianthu pawhin kan thatlai chen te chu a phal a lawm, tiin kan inthiamchawp fo va, mahse, a leh pek a thu “Amaherawhchu, Pathianin inchungah ro ala rel dawn tih hre reng ang che u” tih hi kan hlamchhiah leh fo thin a ni. Kan thatlai hun tawite kan neih hi hlim taka chen turin min duh, chutihrual chuan fimkhur taka kan hman erawh a ngai a ni tih min kawhhmuh zui nghal a ni. Chuvangin, kan nundan kawng engkimah fimkhur taka nun kan nhman a tha hle awm e.

Its my life: Tunlai kan khawvel a tawng lar tak chu Its my life (Ka nun chu ka nun a ni a, tumahin kan nundanah hian sawi tur an nei lo) kan ti thin a ni ah. A nihna tak kan ngaihtuah ngai em aw? He khawvel thil tak pawhin han thlir ila, ka nun chu ka nun a ni a, ka duhdan dan in ka hmang ang tithei dinhmunah hian kan ding reng reng em le? Sap rama mi hausa pui pui awmtha duh lo, khawvela hlimna zawng hrim hrim, duh zawng zawng lei thei a, duhna hmun hmuna zin kual thei, duh hun a nupui/pasal nei a, duh hun a rui a, duh hun hun a Car lei mai thei ten Its my life an lo ti a nih chuan a thiamawm nachen a awm in ka hria. Keini ve erawhchu, mahni cell phone a topup thunna tur takngial pawh tlachham, mahni duhna hmun hmuna zin chu sawiloh Bazar kal tur ringawt pawh a Bus fare chhungte dil chawp ngai tam tak chu kan ni awm e. Chumai a la nilo, kan han rui ve bawka, miin zu tha, taksa pawhin a huat vak lemloh an duh ang ang an in lain, RV zu kan ti, Bee Eee kan ti, Chow pekna sarang ami, pawl deuh phet phut kan han seh tet nawk nawk a, thenkhat nachhawkna lo rui bawk, thenkhat lah pheikhawk charna lo rui bawk nen, chutichung  chuan Its my life kan ti a, a pawr pawr ah chuan kan la tang ve ta nghal a, a zahthlak lam deuh chu a ni e.

          Kan Pathian thu han en ila, ka nun a nia ka thu a lawm tithei kan ni em le? Joba 12:10- ah chuan, “A kutah thil nung tin, nunna leh Mihring chi zawng zawng thlarau a awm.” Tih kan hmu a, Joba hian kan nunna hi min siamtu Pathian ta anih zia a hre chiang hle a ni. Tin, I Korinth 6:19,20 ah chuan,“A nih leh, in taksa chu,in chhunga awm Pathian hnen atanga in hmuh Thlarau Thianghlim in a ni tih in hre lo em ni le? Mahni ta pawh in ni lo va,Mana lei in ni tawh asin, chuvangin in taksaah chuan Pathian chawimawi rawh u.” tih kan hmu a, chuvangin, kan ta emaw kan tih he kan nunna hi Pathian ta a ni tih kan hriat a pawimawh hle a. Chuvangin, kan nunna hian Amah chawimawi mai tur kan ni. KTP te kan innghahna ah pawh “Thiltha ti atan a siama awmin Ama kutchhuak kan ni si a” tih a nih kha. Chuvangin, khawvela ka lo awm ve na chhan, Pathianin nunna min lo pek ve nachhan chu Thiltha ti turin a ni., Hetiang hian tehkhinthu mawlte han sawi ila, ‘Pa pakhat hausa tak mai hian naupang rethei tak mai kawr hak tur pawh neilo hnenah hian kawr a pe a, chu naupang pawh chuan lawm takin a dawng ve mai a, amaherawhchu, chu naupang chuan chu apetu awmlai reng chuan a kawr thar pek chuan a bul a chhuat bal hruk nan chuan a hmang ta hmiah hmiah mai a ni.’ Chutah chuan a petu rilru nat dan tur chu kan hriatthiampui mai awm e. Chutiang chuan keini pawh Pathianin thiltha ti turin nunna min pe a, mahse, thiltha kan tih lohva sual kawng kan zawh chuan Pathianin min pek loh angin kan hmang tihna a ni dawn a ni. Pathian rilru tinatu mai kan ni ang tih a hlauhawm hle a ni.

Kan damchhung ni a rei dawn lo: Sam ziak kan chhiar takah khan “Kan dam chhung ni zawng zawng hi i thinrimnaah a ral thin a: Kan dam chhung kumte hi thawnthu angin kan titawp thin.” Tih kan hmu a, kan chhiar zel chuan kan damchhung kum te chu kum 70 a ni a chakna avangin kum 80 pawh a ni thei e, a ti chauh a ni. Chuvangin, he kan damchhung reilote ah hian fimkhur taka kan nun zel a va pawi mawh em. Mi ropui tak tak te pawh tam tak mual an liam tawh, khawvelah eng pawh lo ti thin mahse, a thi ta…. Tiin an chanchin chu a tawp vek a ni. Chuvangin, Pathianthu in thawnthu angina kan titawp thin a tih hi a dik tak meuh meuh a ni. Engchen nge kan dam anga, enge naktukah lothleng dawn tumahin kan sawi theilo, kan Bible chhiarrual takah khan, “Naktukah chuan engnge lo awm dawn in hre si lo. In nunna chu engnge ni? Chhum rei lo te lo lang a, ral leh ta mai thin ang hi in ni si a.” tih kan chhiar a nih kha, chuvangin enghunah pawh kan nunna hi tawp mai thei a ni tih kan hriat thar leh a tul tak meuh meuh a ni.

Chanchintha Johana ziak 6:27 ah chuan “Chaw dangral mai umin phe phe suh u, chatuana nun thlenga awm reng tur chaw, Mihring Fapain a pek tur che u chu, umin phe zawk rawh u;” tiin Lal Isua thusawi kan hmu a, khawvelah hian kan nunna tak tak nilo zawk buaipui hian kan phe nasa em em mai a, Pathian rawng pawh bawl hman lo lekin kan buai ta a nih hi. Sawitu pakhat chuan, “Eitur neih loh te hi hlauh vak loh tur, mi hausa deuh leh rethei deuh pawh chaw vawikhat ei ah chuan kan la puar zel chu a nih hi, mi hausa in an hausak avangin ni 1 ah chaw vawi 5 vawi 6 an ei chuang lo, In tha neihloh te hi hlauh vak loh tur, a In  in a daih ta lo a a thi ta a lawm le!! Tih tur tumah an la awm lo, kan chenna hian kan damchhung na na na chu min daih vek, tin, thawnhnaw neih loh te kan hlau thin, hausa deuh pawhin an hausak avangin vawikhatah thawmhnaw 4/5 an hak thuah chuang lo,” a ti a. Chuvangin, heng a behbawmah hian kan buai lutuk anga, kan nunna ber hi kan hloh ang tih a hlauhawm hle a ni.

Atawpna atan chuan, Isaia 38:15 kan chhiarah khan Lal Hezekia tawngkam a ni a, a hma thu te kan chhiar chuan, Lal Hezekia kha thih ngamin a dam lova, Pathianin a hnenah Zawlnei Isaia a tir a, , "LALPA chuan heti hian a ti,'I chhûngte khawsak dan tûr relsak rawh; dam chhuak lovin i thi ngei dawn si a,' tiin," he thu a hriat hian Lal Hezekia chu bang lam hawiin a let a, LALPA hnênah a tawngtai a, "Aw LALPA, i hmaah thutak leh thinlung tha famkim pua ka awm thinzia leh, i mithmuha thil \ha ka tih \hinzia kha, khawngaih takin hre reng ang che," a ti a a tap ta zawih zawih a, chu a dilna chu Pathian hnen thlengin a dam hun chhung kum 15 in Pathian in a pawh sei sak leh a nih kha. Lal Hezekia kha Pathian tih mi leh Pathian mithmuh pawha thil tha ti thin a ni. Amaherawhchu, a fate Pathian thu tak a hriattirloh a vangin a nunna Pathianin lak sak a tum a nih kha, chutah chuan Pathian hnenah ngaihdam dilin a tawngtai a, a dilna chhan anih hnuah chuan, “ka dam chhûng kum zawng zawngah chuan zawi tein ka kal dem dem tawh ang.” a ti a nih kha. Chuvangin, keini pawh kan nun kan hman mekah hian he kan nunna kan ta leh kan thu thu emaw kan lo tih thin hi Lal Isuan thisen a min lei, Ama ta a ni tih hre thar leh ila, Kan damchhung reilote, kan thatlai hun tawite ah hian fimkhur takin kan nun I hmang zel ang u. Lalpa’n a thu malsawm rawh se. Amen (Dt.18.2.2013 thawhtan zan KTP inkhawm sermon)