Article

KTP  GENERAL  CONFERENCE-                                                      Thlirna tlang dang atangin                                                                                                                                   

    Mizoram a Thalaite fuan khawm tamna ber chu KTP General Conference hi a ni kan ti thei awm e. Tunhma, General Conference neih  hmasa lam atang tawhin tun hun thleng hian ngaihhlut a la hlawh reng a. Rorel mai bakah Branch leh Bial hrang hrangten kawng hrang hrangin hlawkna leh hmasawnna chhar chhuah tur kan la nei thei zel te hi Pathian malsawmna liau liau a ni. He hun hi KTP ten a pur kan chawkna pui ber a ni a, kan programme leh items-ah te hma kan sawn zelna tura Pathianin min pek ka ti lo thei lo a  ni. Chuvangin, kan ngaihhlut thiam a tul awm e.

    Thalai rual, hmun hrang hrang atanga kal khawm; hmel leh pianphung pawh inanglo tak tak kan ni bawk a, han enthuak leh han en chet chet pawh a hmeltha em em mai an awm laiin,  thenkhat lah hmelthat avanga ei hmuh tur ni se chaw khawn fo tur kan ni bawk nen. Khawvel awmtirh ata la inhre ngai reng renglote nen chaw bel khat kan han zen ho bawk a. In khata khawsaho ta nafam chu in nel tak leh inpawh takin kan inkawm ve nawk nawk a.  Zan hnih khat a lo ral meuh chuan kan in ngaina in kan innel ve viau zel zawng a nih kha maw!

    Inkhawmpui tura kal kan ni bawk a, tukinah enge chawhmeh kan siam anga, vawiin lamah enge ka thawh ang? Chumi kha mi chu tih a tul khawp mai, tih pawh ngaituah ngai miah lova,  zing han thawh a chaw ei han nghah ringawt mai pawh kha a hunlai chuan nuam ve angreng tak a ni. Thlen In ten chaw ei tawh ang u le, an tih hun a chaw ei kha a ni mai a. Kan han tlangnel deuh hnu phei kha chuan,  mahni In ai mah mahin chaw ei a lo tui duh deuh a niang,  rinaia tam mah ei a awl khawp mai. Kan thlen In te lahin mikhualte chungah that an lo chhuah leh zel bawk nen, damchhung hun hmanna atan a itawm rum rum dawn a lawm le!  Kan pi leh pu ten Pialral a faisa ring a awm der der an chak ang mai khan, a takin kan chang niber hian ka hre rum rum mai. An ni pawh kha lo tho leh se,  hei ngei hi a ni Pialral chu, an ti hial ta ve ang. A dawngtu tan erawh sum leh pai, tha leh zung tam tak an seng thung a. An thawhrim leh an hah ziate ka hmuh phei chuan, Pathian atang lo chuan khang kan chunga an thatna zozai leh an thawhrimnate kha mihring tan han tih theih rualah ka ruatlo. Pathianin a let tam takin malsawmna in a vur ngei ang tih ka beiseiin duhsakna ka hlan mawlh mawlh a ni.

    Kumin kan General Conference-na hmunin a zir bawk a, inkhawm leh fellowship mai ni lovin la hmu ngailo tan a en chakawm tak tak leh tlawh chak awm tak tak, Thenzawl ramah hian an lo nei nual mai a. Hengte hi Conference tinuamtu pakhat chu a tling ve reng reng in ka hria. Keini Branch pawh Deer Park-ah kalin kan hlim dar dar viau a nih kha maw. Inkhawmpui kan nih miau avangin hmun hrang hrang han tlawhna tur hun a awmlo mai zawk a, theih nise hun thawl zawkah hmun hrang hrang han tlawh kual ila, hun hlimawm tak han hmang ho ila,  kan rawngbawlnaah leh kan thawhona kawng hrang hrangah inpawh lehzualin thawhhona leh inpumkhatna tha lehzual kan neih theihte ka ring  hial a ni. Tunlai, Thalaite khawvelah hian Biak In chhung chauha rawngbawlhona ringawt hian thawhhona tha min siam tak tak lo ni hian ka hre ve tlat a. Khang a hun hlimawm tak hmangtu KTP memberte ngei pawh khan,  hlim leh phur takin kan Kohhran leh KTP huang chhungah hian rawng kan bawl chhunzawm zel ang tih ka beisei takzet a ni.

    Inkhawm leh fellowship-ah lah nise, chanvo neitute inbuatsaihna a that zia kan hmuin kan hria a, a hmuhnawmin beng pawh a tlai khawp mai. Hetiang em em hian a ni maw  Pathian tan hian mite hi an lo in senso a, hetiang em em hian a ni maw an lo inpek thin le! Thusawitute lahin ka mamawh tak hria niawm takin ka tan liau liau an rawn sawi nimai tur a mawi a ni.  In zirna tur leh hmasawnna tur a va tam tak em! Pathianin heng thusawitute leh chanvo neitu hrang hrangte inbuatsaihna hi malsawm lo se chu,  hetiang hi a ni dawnlo tih a hriat reng a ni. Chumaibakah, Pathian faka zaiho a nuam em em a, engtik hunah pawh lamtual a lenglo khawp lam tur an awm reng maite kha a ropui ka ti. Chungte chuan thil tam tak min ngaihtuah tir a. Rawngbawlna chanvo kan neih dawn reng reng a Pathian rawn chunga tih takzet a inbuatsaih a tul zia te,  tun aia Ama tan a thuk zawk leh nasa zawk a in pek a tul zia te min hriat thar tirin,  midangte tan a malsawmna nitur phei chuan eng ang takin nge thawh nasat ngai ang le? tiin ka ngaihtuahna ah hian a awm reng a ni.

    Chutiang taka hun kan hman hnu chuan kan inkhawmpui tiak a lo hun ta reng mai a. “Hei mah mah Lei” an ti mathlawn lovin, Inkhawmpui tiak tawh ngailohna-ah chuan eng ang takin nuam ang maw? He lei a kan hmelhriat tharte nen mah hlim takin Pathian kan fak ho thei a ni a. Chu Inkhawmpui tiak tawh ngailohna-ah chuan kan hmangaih kal ta zawng zawngte nen, chatuan a Pathian kan fak hun tur chu nghakhlel takin min thlir tir a, chumi hun tur chu min tem lawk tir ni berin ka hria.. 

                                                                  - R. Lalengpuia Jt. Editor

                                                                                                                       

         He thu hi Dt.18.3.2012 (Pathianni) ITI Vengchhak Branch KTP Chanchinbu HOREB Vol.12 Issue no.12 a ka ziah a ni a. Hun chep tak kar ah hnawh sarum tak a ziah a nih avangin insit a na duh hle mai. Amaherawhchu, chhiartute cho chhuaktu nithei se a lawmawm hle ang. 

54th KTP General Conference, 1-4 March 2012 at Thenzawl

             Ni 1-4 March 2012 chung khan KTP General conference vawi 54 na chu hman zawh a ni ta. Pathian hruaina leh awmpuina nasa tak kan dawng a, he hunah hian kei pawh kal ve in hlawk thlak ka ti khawp mai. Pathian thusawi a tha thin hle mai a, zai hona pawh a nuam bawk e. Conference chhung hian ruah a sur thin avangin programe thenkhat chu a hun sawn te a ni a, tin ruah a sur nasat avang hian sound system lamah pawh harsatna kan tawk bawk  a. Inrinni zan inkhawmah pawh Zipawl zai turte Sound lam pang a thatloh avangin a tuk Pathianni chawhma inkhawmah an zai hun kha sawn sak an ni bawk a ni.

__________________________________________________________________________________

  Conference lai hian ruah a sur thin kan tih tawh kha, thlalaka kan hmuh ang hian a pandal chung chung hi silpauline mai a nih avangin a far nasa em em mai a, a hul lai zawng in kan kal khawm tuau tuau mai a, a nuih zat thla ang reng khawp mai.

            Thenzawl a tanga Lunglei lam panna kawngpui sir maiah pawh Mizo thuam leh Mizo puan chi hrang hrang lo zuar a ahranpa liau liau a Bazar lo siam tawk an awm bawk a, an lun ang reng khawp mai, an hralh nual pawh a rinawm.

               Pu Lalbiakhnuna (Tea) thenzawl vengthlang in a ni a, kan THLEN IN a ni. An ni hian min duat em em mai a, ei leh in mutna leh kawng engkimah min duat a ni ri ngawt mai. An hnenah hian Lawmthu sawi mawlh mawlh awm tak pawh kan nih laiin sawi dan erawh kan thiam vak hlei lova. Theihnghilh hauh loh tur chu kan thlen In nu Pi Nute-i hi a ni. Engkimah min ngaih sak em em in kan mamawh leh kan duh zawng min ngaihtuah sak a ni ber mai. Pathianin a let tam takin Malsawmna a vur ngei kan duhin kan beisei bawk a, Pathian hruaina an chhungkaw tan kan dil sak mawlh mawlh e.

               Champhai Vengthlang north Branch a mite nen kan thleng hova. Anni hi an fel in an polite em em mai a, an kawm a nuam em em mai bawk si. An ngaihawm dawn khawp mai Inkhawm ah te kan kalho fo thin reng a ni. Pathian hian thlengho awm tak tak min thlenho tir a ni ber mai.                                          Thlalak a kan hmuh ang khian an hming kan tarlang a nge kei tiam lo in aw: Ka bul chiah a mi khi Thari (ITI vengchhak) a dawt khi BSI (ITI vengchhak) a dawt leh khi Chaate-i (Champhai Vengthlang North) a dawt leh a mi khi Mimi-i (ITI vengchhak) a dawt leh a mi khi Madini (Champhai vengthlang north) a sir ber a mi khi Lily-i (Champhai vengthlang north) te kan nih khi. la ngaihawm dawn khawp mai.

              Ni.3.3.2012 Inrinni chawhnu khan Vantawng en ve kan tum a, kan branch atang a kalte Bus in kan han kal chhuak ve e. mahse, thui pawh kan kal hma atangin traffic a jam nasa hle mai a, kan kal luih chuan khua kan thim ngei dawn a kan hriat avangin kan let leh ta ringawt mai a ni.

              Vantawng lama kan kal tak loh avangin Deer park lamah kan kal ta thung a, mi pawh an lo tam khawp mai a, tih tur dang vak a awmlo thla kan la kual vel a ni ber mai, amaherawhchu kan hlim phian mai, a hmun in a zir a, a thlengthaw nuam em em mai a, hmun nuam tak zawng a tling e.

                Thla la tur a lo awm ve te nen chuan, ti rawh u a huhoin thla i la ve reng reng teh ang u kan ti a, kan han in post kual vel a kan hlim dar dar khawp mai. An ni hi Lunglei lam atang a rawn kal an ni e. An fel in an biak a nuam khawp mai

              Kan thlen in te leh kan thlenpuite nen Pthianni zan in Ni.4.3.2012 ah, ka thlenpui kan veng a mite an la rawn haw ve hmanlo a, kim tak tak a har e kan ti a a awm awm in kan han la ve mai a ni e.

              Ni.5.3.2012 Thawhtanni zingah haw turin kan chhuak ta a, a lunglen thlak ve uih mai, Bus leh Sumo a kal kan nih avangin  Thenzawl khaw dai, main counter an siamna hmunah chuan kan in nghak khawm a, rinai deihin Sumo a rawn kalte an rawn thleng har phian mai a, Pailai dang haw ve mek te kan Bye bye vel ta mai mai a, a hlim thlak phian mai. Sumo a kalte an rawn thlen hnu chuan kan insiamrem a Tawngtaina te kan hman zawh in Aizawl lam pan in kal kal ve ta.

               Hmuifang kan thleng a, Chaw eina tur Pu Marem'a min lo  book sak na in chaw leh chawhmeh lam kan chang ta tlat lo mai Hotel dangah te a then kan kal bawk a, engtin tin emaw kan in hnawh puar ve mai. Chaw ei kham lamah thla kan la kual vel a, hun engemaw chen kan thlen hnuah Aizawl lam panin kan kal chhuak ve leh ta. Chhun Dar 12:30 velah kan veng kan thleng thei a, Pathian min hruaina zawng zawngah lawmthu ka sawi mawlh mawlh e.

Kohhran Zaipawl inkaihhruaina

              Pathian leh kan hruaituten Kohhran Zaipawl 2012-2013 atan enkawltu turin min han dah ve leh a. Mahni lam inthlir phei chuan insit a na duh hle mai. Chutihlai mekin Kohhran Zaipawl ten kum dang zawng ai a hma a sawm theihna tur ngaihtuahin Committee lamin thahnem a ngai nasa mai si a. Chungte hre reng chung leh Pathian rawn chungin a hnuai ami ang hian Inkaihhruaina tur kan duang ve tawp mai a. A hlawhtlina chu Pathian kutah awm rawh se.
   
    Kohhran Zaipawlin hma a sawn zel a, nasa zawka Pathin rawng kan kawl theihna atan ahnuai a mi ang hian inkaihhruaina leh kal phung atan a ruahmanna siam a ni a. Conductor-te leh Member ten zawm theuh tur in kan in ngen a ni.

1.    Pathian rawngbawlna pawimawh tak a nih avangin he rawngbawlna hi hlamchhiah lova rawngbawltu rilru pu chungin tawngtaina nen, thahnemngai tak a rawngbawl tur a beisei kan ni.

2.    Rawngbawlna langsar tak a nih avangin chhunglam thlarau nun mai nilovin, pawn lam nunah pawh fimkhur tak a nun tur a ni a. A bikin Ruihtheih thil leh mipat hmeichhiatna ang chi ah te  fihlim tlat tura beisei  kan ni

3.    Hla zir leh rem ngaipawimawh tur a ni a, eng emaw harsatna avang a kan kal thei dawnlo a nih chuan Conductor-te remtihna lak hmasak thin tur a ni. Engmah chanchin hriatloh a hla zirloh/hla remloh mai mai tur a ni lova. Zaipawl rawngbawlna ti thuanawp khawp a attendance thalo kan awm a nih chuan kan ai midang ruat theih a ni ang.

4.    Hla zirna hmunah mumal thei ang bera in vawn tum a ni a, hlazir laiin ei leh in (Eg. Kuhva,sahdah,nepnawi.....etc) tih loh tur a ni a. Tin, Mobile phone hman/khawih a rem changlo a ni.

5.    Hla zirnaah Conductor-te thu awiha  zah thiam tura beisei kan ni a, chawlh hun, ban hun leh thildangah mahni ngaihdan a lo rawt mai lovin Conductor-te ngaih chan thiam tur a ni.

6.    Hla zir emaw hla rem dawnin emaw tan hun bituk a nih reng reng in a hun taka thlen thin hram tum tur a ni a, hetiang hun a engmah chanchin hriat lohva tlaite chu Conductor-ten tha an tih angin hremna an pe thin ang.

7.    Zaipawl thatna tur beisei avanga kan zai danah emaw kan awmdanah emaw Conductor-ten a mimal taka min hrilh/hau a nih pawhin tumahin ngaih huat loh tur a ni a. Zipawl thatna tur a nih chuan Conductor-te leh Member te pawh insiamtha ngam zawk tur a beisei kan ni.

8.    Engemaw rokhawlhna avanga Zaipawl a kan tel chhunzawm thei tawh dawnlo a nih chuan Conductor-te hnenah thlen tur a ni a, annin Branch Committee remtihnain midang an ruat thin ang.

Group Meet 2011 Review na

Group Meet 2011 Review

    Pathian hruaina leh awmpuina a zarah Group Meet 2011 chu Ni.17 - 24.10.2011 chhung khan tluang taka hman zawh a ni ta. Nasa taka Group ten kan inbuatsaihna leh kan hruaitu, thahnem ngai tak tak tena an thawh rah chu kan seng a, hun lokal leh zel turah a rah pawh rah duhawm tak a chhuah zel a rinawm. He hun kan hman liam takah hian kawng hrang hrangah hma kan sawn hlein ka hria a, chutihrual erawh chuan induhkhawp lohna leh hmasawn kan ngaihna kawng tam tak a awm bawk awm e. Chung zing a thenkhat chauh han tarlang ila:

    Zaipawl intihsiak : ‘Jerusalem ka In ropui’ tihhla hmangin Group-ten intihsiakna kan nei a nih kha, hemi atan a kan inbuatsaihna pawh a hautak in a hahthlak em em, kan Group hruaitute phei chu an hah lehzual khawp mai. A hunlaiin han huphurhawm viau mahse, Group Meet ti ropuitu leh tihlawhtlingtu pakhat chu a ni miau a ni. KTP ten a kan rawngbawlna ki pui leh pawimawh ber te zing a mi, Zaipawl rawngbawlna hi kan hlut  thiam a tul hle a, a chhawm nung zel tur chu keimahni vek kan ni tih kan hriat a pawimawh hle a ni. Chutihrual erawh chuan, intihsiakna atan a hla zir kawngah erawh chuan Member-te kan active tawklo hlein a hriat a, kan ngai pawimawh nep ta deuh em aw??? a tih theih. Group Committee chin leh active member a kan ngaihte pawh kan bang chuanglo. Thil reng reng ah hian thatak a titur chuan inbuatsaihna tha kan mamawh a ni tih kan hriat reng a pawimawh a ni. Tum dangah, Zaipawl a intihsiakna te a la awm a nih chuan tun aia tan kan lak deuh deuh a ngai niin a lang.

    Badminton Double : A vawi khatna atan Badminton Double mipa leh hmeichhia hmangin intihsiakna kan nei a nih kha; Member ten kan hlutin a boruak pawh a tha thak thak hle mai. Inkhel a hmuhnawmin Group te pawh kan tang tlang hle a, Group ten kan player-te kan au phur thiam hle mai a, mawilo taka che leh chutiang zawng a harsatna siam kan awmlo kha a lawmawmin kan tihawm reng a ni e, tih leh zel atan pawh a zawng chhang tlak hle dawnin ka hria. A bikin Eliza Group hmeichhiate an inbuatsaihna a tha hle a, thla khat aia tam mah inbuatsaihna atan hian an hmang a nih kha, an Champion pawh kha thil mak a ni love. An Group Leader, Pu Maenga pawh a nui hmel kan hmu hial a nih kha!!!! a lawmawm bawk a niang..

    Outdoor Games : Ka hriat sual loh chuan, Kumtin tih theih deuh thaw hi Outdoor Games kan nei thin a. Amaherawhchu, member-te hian kan hlutlo telh telh ni te pawhin a lang. Kan item hrang hrang a tel tur a Group ten kan ruat thinte hi a hmunah erawh chuan, a awm awm atang a in pawh chawp a ngai ziah thin hi ngaihtuahna a tithui hle mai, a bikin hmeichhe lam hi kan zualkai bik deuh in a hriat, nge kan buai lutuk tawh a, he hun atan hian hunawl kan insiam thei tawhlo zawk le? Kan hruaitu lam pawh hian beng tharin ngaihtuahna han siam tase, tunhnai atan chuan outdoor Games kan hman thin hi kan chawlhsan rih te hi a hun tawh a ni lo maw??  Nge item atana kan hman thin hian a zir lo zawk? Tuna Group meet kan hman zawh tak pawh kha han thlirlet ila, rinaiin member kan thahnem tawklo hle a, item hrang hrang a tel tur zat a kan bituk te pawh kan daih manglo thin a nih kha. Group tin atangin hmeichhia 10 bak kan kalloh avangin a ngaiin kan ti tlut tlut chu a ni ber mai. Member-te pawhin,  kan hruaituten ti thei tur a min ngai anih chuan tih hlawhtlin hram hram kan tum a tha, mi puitling nihna pawh a ni tih kan hriat a pawimawh hle a ni.
    Tuntumah hian Mipa Football hmuhnawm takin kan khel a nih kha, kan hruaituten Group intihsiakna atan a Football hanhman hian kan boruak a thalo mai ang a, kan tan lutukna lamah hian KTP ten a kan tih a mawilo tak te hian kan khel ang tih an hlauthawng fo thin. Amaherawhchu, kan inkhel te han en khan kan changkang tawh hle mai, tang tak siin kan khel a, kan khel pawh a mawi em em mai. KTP inkhelh dan tur dik takin kan khel in ka hria,  a lawmawm hle a ni. Tum dangah pawh kan la ti lehzel a nih chuan kan chhawm nun zel atan a duhawm hle a ni.

    Thingpuisen Night : Rin phak bak leh beisei ngam phak bakin a hlawhtling in ka hria, a hming pawh kan hruaituten an phuah thiamin a inhmeh hle mai.  Member-te inpekna te, he hun atan a an in sen nasat tur ziate kan chhut hian a lawmawm tak meuh meuh a ni. Kan hun la hman ngailoh, hman atan a kan chak ve si, mahse kan huphurh bawk si kha hlawhtling takin kan hmang thei a, kan hruaitute pawh an lawm hlein ka hria. KTP huang chhungah hian hlim takin hun kan hmang thei a ni tih hi, KTP a la rawn inhmang turte hnenah hian kan entir a tul chang a awm thin. KTP huang chhungah hian miten tel ve chak se, tuna kan member ni mek, kan zinga la rawn tel hmanlo leh tel nachang la hrelo te pawh hian hetiang hun hlimawm tak kan hman atang pawh hian kan zinga rawn tel chakna nei se a va duhawm dawn em....

    Result: Kan item in a zir vang nge niang, Group member-te kan in ang tlang zawk le? kan result han thlir hian tumah uang tur kan awmlo hle mai. Champion, Isaia Group ten point = 940 an hmu a, Eliza Group leh Jeremia Group ten Point = 880 ve ve hmuin pahnihna an ni bawk. Kum dang anglo takin result puan dawn hun thleng khan Group Champion tur hriatthiam har khawpin kan in hnehtawk hlawm a nih kha....

    A tawp berah chuan, Group Meet kan hman hi Group-te intihsiakna mai ni lovin, A rawng kan bawlna a min ti chaktu, member hla zawkte hnuk hnaitu leh KTP te thawhhona leh inpumkhatna tha min siamtu atan nise, intihsiakna hmang a Pathian kan chawimawina a ni tih hre reng in, chumi a zarah chuan taksa leh thlarau ah chakna thar chhar theuh ila. Kum dangah pawh Group Meet hlawhtling tak kan hman zel ka beisei tlat a ni.
      
   

Ka pa Sermon (Chanchin Tha hril rawhu)

CHANCHINTHA HI HRIL RAWH U.
( Marka 16:15)
- R.Hrangdawla

    Chanchintha awmzia sawi ka tum lova, keimahniin kan au chhuahpui (kan hril) kher lam hi ka sawi tum a ni ber hek lo. Ka sawi tum lam chu, kan nun leh chetzia leh inpeknain chanchintha a hril dan lam hi a ni.

    A hmasa ber atan chuan.... “Engpawhnise in awm dan chu Krista Chanchintha nen in mawi phawt rawh se,” tih kan Pathian thu in a ti a (Phillipi 1:27)  Kan nundan leh chetziate hi kan ngaihtuah ngai em? Ringtu inti siin, mahni hlawkna tur a nih chuan mi chan lam kan ngaihtuah tawh lo, mahni in haivurna in kan khat zo ta. Hetiang nun neitu chuan chanchintha nilovin, chanchin chhia a hril a ni. II Timothea 4:2 ah chuan, “Thu chu hril rawh, a hunah te, a hun lo ah te pawh bei zel rawh,” a ti. Engtin nge a hun loah te thu kan hril ang? Kan nun leh chetzia in a hril tur a ni dawn lo’m ni? Kan nunah Krista nunze mawi tak  alang chhuak ang a, chu nun chuan mahni hma a sial lova, midangte thatna tur a ngaihtuah thin a, chu chuan mite tan malsawmna a thlen thin. Nang malsawmna ni ang che, tih ziak hi atakin a zawh dik reng a lo ni a. Chutiang nun neitu chuan chanchintha hi engtiklai pawhin a hril thin a lo ni reng mai.

    Kan rin, Lal Isua hian chanchintha hril hi a dah pawimawh hle a. Vana a lawn dawn khan a thuchah hnuhnung ber chu chanchintha hril hi a ni. A  zirtirte hnenah khan, “Khawvel zawng zawngah kal ula, chanchintha hi hril rawh u,” a ti a. Chu hna pawimawh tak chu keini amah ringtute, a Kohhran hote hian kan tih tur hna tul ber leh kan kova a nghah chu a ni.

    Kan Lal Isua thusawi hi tawitein han umzui dawn ila. Engtin nge Khawvel zawng zawngah kan kal ang a, chanchintha hi kan hril ang? Mithiam zawkte chuan, heta Lal Isua’n Khawvel a tih hi ‘Mihring’ a sawina a ni e, an ti a. Tin, Mathaia 28:19,20 ah chuan, ‘Chutichuan kal ula, chitin hnamtin a mi zirtirah te siam ula, Pa leh Fapa leh Thlarau thianghlimah chuan Baptist ula, thu ka pek zawng zawng che u pawm turin zirtir rawh u,’ a ti bawk a ni.

    Aw le, keini lei mihringte, bawhchhiatna avanga thiam loh chang, mahni pawh inchhandam zo lote hnenah hian chanchintha hi i hril ang u. Engtin nge kan hril ang? kan ti a ni mai thei e. Ramthim ramrova kal chhuah a va hril kher lo pawh in chanchintha hi a hril theih a ni. Fakna hla siamtu chuan, “Kal chhuak thei lote pawhin mawhphurhna lian tak kan nei, Thilpeka rawngbawl turin Lalpa’n min ko”, a ti a ni. Kan nun leh chetzia bakah, kan In lum atang pawhin thilpek hmangin chanchintha kan hril thei a nih chu!! Lal Isua la hre lo leh la hmu lote hnen a chanchintha hril turin engangin nge ke i pen ve dawn le ? Unau duhtak, thlarau chhiar sen loh boral tur hi i hmangaih lo em ni ? ‘Pakhat tal rawn hruai rawh,’ ti a ngenna hi i chhang dawn nge? I hnawl zel zawk dawn?

    A tawp ber atan chuan, kan chanchintha hrilin awmzia a neih a, hma a sawn theihna tur chuan..... a ma tana kan inpekna (inhlanna tak tak) neih a ngai a ni. Kan Pathian thu chuan he ti hian a ti, Rom 12:1 ah, “Chutichuan unaute u, Pathian khawngaihna avang hian inthawina nung leh thianghlim leh Pathian lawm tlak niturin in taksa chu inhlanah ka ngen a che u. Chu chu in rawngbawln awm reng a ni, ati a. Kan taksa hi Pathian in a duh anga a hman atan kan pek a ngai a nih chu. Keimahni in tha kan tih anga rawngbawl lovin ama duh dan anga rawngbawl turin, a duh anga a chanchintha hril turin, inhlanna tak tak neih a ngai a ni. Chu chu kan rawngbawl dan tur a ni a, chanchintha kan hril dan tur chu a ni e.
        Lalpa’n a thu malsawm rawh se.